ချယ်လ်ဆီးအသင်းက ကစားသမားတွေဟာ လာမယ့်ရာသီမှာ ချန်ပီယံလိဂ်ဝင်ခွင့်မရရင် လစာ(၃၀)ရာခိုင်နှုန်းဝန်းကျင် လျှော့ချခံရမှာဖြစ်ကြောင်း ဗြိတိန်မီဒီယာတချို့က ဖော်ပြခဲ့ပါတယ်။
ချယ်လ်ဆီးအသင်းဟာ ကစားသမားအများစုကို နှစ်ရှည်စာချုပ် ချုပ်ဆိုထားရာမှာ အခြေခံလစာနှုန်းထားကို ပြိုင်ဘက်အသင်းတွေလောက် ပေးချေခြင်းမရှိဘဲ ချန်ပီယံလိဂ်ဝင်ခွင့်ရရှိမှ၊ ဆုဖလားအောင်မြင်မှုတွေရရှိမှ တိုးမြှင့်ပေးတဲ့စနစ်ကို ကျင့်သုံးကြောင်း သိရပါတယ်။
ချန်ပီယံလိဂ်ဝင်ခွင့် မရရှိခဲ့ရင် လစာလျှော့ချမယ့် သဘောတူညီချက်လည်း စာချုပ်မှာ ထည့်သွင်းထားတာကြောင့် ချယ်လ်ဆီးအသင်းမှာ လစာအများဆုံးရရှိနေတဲ့ ကစားသမားတွေအနေနဲ့ တစ်ပတ်ကို ပေါင်(၃၀၀၀၀)ကနေ (၄၀၀၀၀)ကြားအထိ လျှော့ချခံရဖွယ်ရှိနေကြောင်းလည်း သိရပါတယ်။
ချယ်လ်ဆီးအသင်းဟာ လက်ရှိအချိန်မှာ ပရီးမီးယားလိဂ်အမှတ်ပေးဇယား အဆင့်(၉)နေရာရောက်ရှိနေပြီး ပြိုင်ပွဲပြီးဆုံးဖို့ (၃)ပွဲအလိုမှာ အဆင့်(၅)နေရာကအသင်းနဲ့ (၁၀)မှတ်ကွာဟနေပြီဖြစ်တာကြောင့် ပုံမှန်အတိုင်းဆိုရင် ချန်ပီယံလိဂ်ဝင်ခွင့်ရဖို့ မဖြစ်နိုင်တော့ပါဘူး။
ဒါပေမဲ့ အက်စတွန်ဗီလာအသင်းက အဆင့်(၅)နေရာမှာ ရပ်တည်ပြီး ယူရိုပါလိဂ်ဖလား ရယူနိုင်ခဲ့ရင်တော့ အဆင့်(၆)နေရာက အသင်းလည်း ချန်ပီယံလိဂ်ဝင်ခွင့်ရရှိမှာဖြစ်တာကြောင့် ချယ်လ်ဆီးအသင်းမှာ မျှော်လင့်ချက်ရှိနေသေးကြောင်း သိရပါတယ်။
