လီဗာပူးလ်နဲ့ပွဲကို ဒဏ်ရာပြဿနာကြောင့် ဆာကာနဲ့ ကာလာဖီအိုရီတို့လည်း လွဲချော်နိုင်ခြေရှိနေပါတယ်။ ဆာလီဘာကလည်း ပွဲပယ်ခံထားရပါတယ်။ အော်ဒီဂွါ၊ တင်ဘာတို့ကိုပါ ထည့်တွက်လိုက်ရင် လီဗာပူးလ်နဲ့ပွဲကို အာဆင်နယ်အသင်းရဲ့ အဓိကကစားသမား ၅ ယောက်လောက် လွဲချော်သွားနိုင်တဲ့ အခြေအနေပါ။ ဒါဟာ လက်ရှိအချိန်မှာ ပုံစံကောင်းပြနေတဲ့ လီဗာပူးလ်ကို ရင်ဆိုင်ရပိုခက်သွားနိုင်တဲ့ အခြေအနေပါ။ ကစားရမှာက အိမ်ကွင်း အီမရိတ်စ်ဆိုပေမဲ့ ယာဂန်ကလော့ပ်လက်ထက် နောက်ပိုင်းဆုံတွေ့မှုတွေမှာတော့ အာဆင်နယ်အတွက် အားသာချက် မဖြစ်ခဲ့ပါဘူး။ လာမယ့်ပွဲစဉ်မှာရော အာဆင်နယ်အမှတ်ပြည့်ရအောင် ယူနိုင်ပါ့မလား။ လောလောဆယ် ၄ မှတ်ကွာဟနေတဲ့ ပြိုင်ဘက်ဆီက အမှတ်လုယူဖို့ အခွင့်အရေးကောင်းတစ်ခု ဖြစ်နေပေမဲ့ ဒါကို အာဆင်နယ်အသင်း လုပ်နိုင်ပါ့မလား။ ဒီပွဲက မန်စီးတီးအတွက် စိန်ခေါ်သူအစစ်က ဘယ်အသင်း ဖြစ်မလဲဆိုတာ ရွေးချယ်ပေးမယ့်ပွဲတစ်ပွဲလည်း ဖြစ်လာနိုင်ပါတယ်။ အာတီတာကတော့ သူ့ကို ယုံကြည်ပါလို့ ရဲရဲဝံ့ဝံ့ပြောကြားထားပါတယ်။