မော်လမြိုင်မြို့၊ ငန်းတေးရပ်ကွက်၊ ငန်းတေးလမ်း ထွေ/အုပ်ဝန်ထမ်းအိမ်ယာရှေ့တွင် ယမန်နေ့ ညပိုင်းအချိန်က (၁၀) ဘီး ကုန်တင်ယာဉ်နှင့် ဟိုင်းဂျက်ယာဉ်တို့ ယာဉ်တိုက်မှုဖြစ်ပွားခဲ့ရာမှ ဟိုင်းဂျက်ယာဉ်ပေါ်လိုက်ပါ လာသူတစ်ဦးသေဆုံးကာ၊ တစ်ဦးထိခိုက်ဒဏ်ရာများရရှိခဲ့ကြောင်း သိရသည်။
အောက်တိုဘာလ ၂၃ ရက် ည ၉ နာရီ ၁၅ မိနစ်ခန့်က အဆိုပါ ငန်းတေးရပ်ကွက်၊ ငန်းတေးလမ်း၊ ထွေ/အုပ်ဝန်ထမ်းအိမ်ယာရှေ့တွင်ကျွဲခြံကုန်းရပ်ကွက်ဘက်မှ ငန်းတေးရပ်ကွက်ဘက်သို့ မောင်းနှင်လာသည့် ၁၀ ဘီး ကုန်တင်ယာဉ်နှင့် ငန်းတေးရပ်ကွက်ဘက်မှ ကျွဲခြံကုန်းရပ်ကွက်ဘက်သို့ မောင်းနှင်နေသည့် ဟိုင်းဂျက်ယာဉ်တို့တိုက်မိခဲ့ခြင်းဖြစ်ကြောင်း ရပ်ကွက်နေပြည်သူတစ်ဦးက ပြောကြားသည်။
၎င်းကဆက်လက်ပြီး “ကားနှစ်စီးက ဘယ်လိုတိုက်ကြလဲတော့ မသိရဘူး။ ယာဉ်တိုက်မှုဖြစ်တယ်လို့ကြားလို့ သွားကြည့်တော့ ဟိုင်းဂျက်ကားခေါင်းခန်းမှာ ဒရိုက်ဘာဘေးက လူတစ်ယောက်က ညှပ်နေတယ်။ ယာဉ်မောင်းကတော့ ထိခိုက်ဒဏ်ရာတွေရသွားတယ်” ဟု ပြောကြားသည်။
အဆိုပါ ဟိုင်းဂျက်ကားခေါင်းခန်းတွင် ညှပ်နေသူအား မြန်မာနိုင်ငံမီးသတ်တပ်ဖွဲ့ ကယ်ဆယ်ရေးအဖွဲ့နှင့်အတူ မော်လမြိုင်မြို့ခံ လူမှုကူညီကယ်ဆယ်ရေးဖွဲများမှ ကတ်တာများအသုံးပြုကာ ဆွဲထုတ်နိုင်ခဲ့သော်လည်း လူနာသေဆုံးနေပြီးကြောင်း ၎င်းကဆိုသည်။
ထို ယာဉ်တိုက်မှုမှ ထိခိုက်ဒဏ်ရာရရှိခဲ့သူ ဟိုင်းဂျက်ယာဉ်မောင်း ဖြစ်သူနှင့် သေဆုံးသွားသည့် ဟိုင်းဂျက်ယာဉ်ခေါင်းခန်းတွင်လိုက်ပါလာသူ တို့အား လူမှုကူညီကယ်ဆယ်ရေးအဖွဲ့မှ မော်လမြိုင်မြို့၊ ပြည်သူ့ဆေးရုံကြီးသို့ ပို့ဆောင်ပေးထားကြောင်း သိရသည်။
ဘိုဘိုမြင့်
