နီပေါနိုင်ငံတွင် မိုးသည်းထန်စွာရွာသွန်းမှုကြောင့် ရေလွှမ်းမိုးမှုများနှင့် မြေပြိုမှုများဖြစ်ပွားပြီး ၂၄ နာရီအတွင်း လူ ၁၀ ဦးထက်မနည်းသေဆုံးခဲ့ကာ ခုနစ်ဦးပျောက်ဆုံးနေကြောင်း တာဝန်ရှိသူများက စက်တင်ဘာ ၂၈ ရက်တွင် ပြောကြားခဲ့သည်။
တောင်အာရှ၏ နှစ်စဉ် မုတ်သုံမိုးရွာသွန်းမှုများကြောင့် ဒေသတွင်း မိုးသည်းထန်စွာရွာသွန်းမှုများဖြစ်ပွားခဲ့ပြီး မုတ်သုံရာသီပြန်ထွက်ရန် သီတင်းတစ်ပတ်ကြာ နောက်ကျခဲ့ပြီးနောက် နီပေါနိုင်ငံအတွင်းရှိ မြစ်အများစုတွင် မြစ်ရေများလျှံပြီး လမ်းများနှင့် တံတားများပေါ်သို့ ရေများလျှံတက်လာခဲ့သည်ဟု အာဏာပိုင်များက ပြောကြားခဲ့သည်။
မြေပြိုမှုများကြောင့် ပိတ်ဆို့သွားခဲ့သည့် အဝေးပြေးလမ်းများကို ပြန်လည်ဖွင့်လှစ်ရန်နှင့် အပျက်အစီးများကို ရှင်းလင်းရန် ရဲတပ်ဖွဲ့က လုပ်ဆောင်နေသည်ဟု ရဲတပ်ဖွဲ့ပြောရေးဆိုခွင့်ရှိသူက ပြောကြားခဲ့သည်။
"စက်တင်ဘာ ၂၉ ရက် မနက်ပိုင်းအထိ မိုးတွေဆက်တိုက်ရွာနေနိုင်ပါတယ်။ မိုးတိတ်မှ ရာသီဥတုက ကောင်းမွန်သွားနိုင်ပါတယ်" ဟု မိုးလေဝသပညာရှင် ဘီနူ မဟာဂျန်က ရိုက်တာသတင်းဌာနကို ပြောကြားခဲ့သည်။
တောင်များထူထပ်သည့် နီပေါနိုင်ငံတွင် နှစ်စဉ်နှစ်တိုင်း မုတ်သုံရာသီတွင် မြေပြိုမှုများ ရေလွှမ်းမိုးမှုများကြောင့် လူပေါင်းရာချီ သေဆုံးခဲ့သည်။
