အမေရိကန်သမ္မတဂျိုးဘိုင်ဒင်က နိုင်ငံစည်းလုံးညီညွတ်စေရန် ၂၀၂၄ ရွေးကောက်ပွဲမှ ၎င်း နုတ်ထွက်ခဲ့ခြင်းဖြစ်သည်ဟု ဇူလိုင် ၂၄ ရက်တွင် ပြောကြာခဲ့ပြီး မီးရှူးမီးတိုင်ကို ပိုမိုနုနယ်သော အသံများထံ လွှဲပြောင်းပေးရန်အချိန်တန်နေပြီဟု သမိုင်းဝင်ဘဲဥပုံရုံးခန်းတွင် ပြောကြားသောမိန့်ခွန်း၌ ထည့်သွင်း ပြောကြားခဲ့သည်။

“ကျွန်တော်က ဒီရုံးခန်းကို လေးစားကြည်ညိုပါတယ်။ ဒါပေမဲ့ ကျွန်တော့်ရဲ့နိုင်ငံကို ပိုချစ်ပါတယ်”ဟု အသက် ၈၁ နှစ်အရွယ် သမ္မတက ပြောကြားခဲ့သည်။ သဘောထားကွဲနေသောနိုင်ငံသည် ဒီမိုကရေစီကိုလက် ခံယုံကြည်ရန်၊ အမုန်းတရားများကို ရှောင်ရှားရန် ပြောကြားခဲ့သည်။

“အန္တရာယ်ကျရောက်နေတဲ့ ဒီမိုကရေစီကို ခုခံကာကွယ်တာဟာ ဂုဏ်ဒြပ်တွေထက် ပိုမိုအရေးကြီးနေပါတယ်။ ရှေ့ကိုသွားရမယ့် အကောင်းဆုံးလမ်းဟာမီးရှူးမီးတိုင်ကို မျိုးဆက်သစ်ထံ လွှဲပေးတာပဲဖြစ်တယ်လို့ ကျွန် တော်ဆုံးဖြတ်ခဲ့ပါတယ်။ အဲဒါဟာကျွန်တော်တို့ရဲ့နိုင်ငံကို စည်းလုံးစေဖို့ အကောင်းဆုံးနည်းဖြစ်ပါတယ်”ဟု လူကြည့်အများဆုံးအချိန်တွင် တိုင်းပြည်ကို ပြောကြားသော မိန့်ခွန်း၌ ဘိုင်ဒင်က ပြောကြားခဲ့သည်။

ရွေးကောက်ပွဲမှ နုတ်ထွက်ကြောင်း အံ့အားသင့်ဖွယ်ကြေညာခဲ့ပြီးနောက်ပိုင်း ၎င်း၏ ပထမဆုံးမိန့်ခွန်းတွင် ဘိုင်ဒင်က ဒုတိယသမ္မတ ကာမလာဟဲရစ်ကိုလည်း ထုတ်ဖော်ချီးကျူခဲ့သည်။ အသက် ၅၉ နှစ်အရွယ် ဟဲရစ် သည် ဒီမိုကရက်တစ်ပါတီကရွေးချယ်သော သမ္မတလောင်းဖြစ်လာရန်ရှိနေသည်။

“သူက အတွေ့အကြုံရှိပါတယ်။ သူဟာစိတ်ဓာတ်ခိုင်မာပါတယ်။ လုပ်နိုင်စွမ်းရှိသူဖြစ်ပါတယ်”ဟု ဘိုင်ဒင်က ပြောကြားခဲ့သည်။  ဘိုင်ဒင်သည် ယခုမိန့်ခွန်းကို Resolute Desk မှ လေးကြိမ်မြောက်ပြောကြားခြင်းဖြစ်ပြီး သူ၏နောက်ဆုံးမိန့်ခွန်းဖြစ်လာနိုင်သည်။

“အသံသစ်လေးတွေ၊ လတ်ဆတ်တဲ့ အသံလေးတွေ၊ ဟုတ်ပါတယ်၊ ပိုမိုနုနယ်တဲ့ သံလေးတွေအတွက် အချိန်နဲ့နေရာသစ်တို့ရှိ နေပါတယ်။ အခုအဲဒီအချိန်နဲ့နေရာတို့ရဲ့ အလှည့်ပါပဲ”ဟု ၎င်းက ပြောကြားခဲ့သည်။

ဇွန်လထဲတွင် ဒေါ်နယ်ထရန့်နှင့်စကား  စစ်ထိုးရာ၌ အခြေအနေဆိုးရွားခဲ့သဖြင့် ၎င်း၏အသက်အရွယ်၊ စိတ်ပိုင်းဆိုင်ရာ ကြံ့ခိုင်မှုတို့နှင့်ပတ်သက်၍ စိုးရိမ်မှုများ ပေါ်ပေါက်ခဲ့ပြီး သီတင်းပတ်ချီ ဖိအားများကြုံတွေ့ခဲ့ရ သော ဂျိုးဘိုင်ကပါတီနှင့် နိုင်ငံတို့၏အကောင်းဆုံးအကျိုးစီးပွားအတွက် သမ္မတရွေးကောက်ပွဲမှ  နုတ်ထွက်ခြင်းဖြစ်သည်ဟု ပြောကြားခဲ့သည်။

ထရန့်က ၎င်း၏ Truth Social တွင် ပို့စ်များတင်ကာ ဘိုင်ဒင်နုတ်ထွက်ခြင်းမှာ ဘိုင်ဒင်သည် သမ္မတရွေးကောက်ပွဲအတွက် မသင့်လျော်တော့သည့်အပြင် သမ္မတတာဝန်ကို ထမ်းဆောင်ရန် မသင့်လျော်တော့ဟု ဖော်ပြခဲ့သည်။

ဘိုင်ဒင်နုတ်ထွက်မည့်ကိစ္စမှာ တချိန်ကများစွာမျှော်လင့်ထားသည့်ကိစ္စဖြစ်ခဲ့သည်။  ကိုရိုနာဗိုင်းရပ်စ်ကူးစက်ခံထားရသဖြင့် ဒယ်လာဝဲကမ်းခြေနေအိမ်တွင် နေထိုင်နေရင်း နေပြန်ကောင်းလာချိန်၌ ကြိုတင်ပြောကြားခြင်းမရှိဘဲ ရွေးကောက်ပွဲတွင် ပါဝင်ယှဉ်ပြိုင်တော့မည်မဟုတ်ဟူသော ကြေညာချက်သည် နောက်ဆုံးတွင် ထွက်ပေါ်လာခြင်းဖြစ်သည်။

“သမ္မတဖြစ်ရတာဟာ ကျွန်တော့်ရဲ့ဘဝမှာ အကြီးမားဆုံး ဂုဏ်ယူစရာဖြစ်ပါတယ်” ဟု ၎င်းက ပြောကြားခဲ့သည်။    

Ref: AFP