COVID-19 ရောဂါဆိုင်ရာ စည်းမျဉ်းချိုးဖောက်မှုကြောင့် ကြာသပတေးနေ့က ကစားခဲ့သည့် ဝေးလ်စ်အသင်းနှင့် ခြေစမ်းပွဲကို လွဲချော်ခဲ့သည့် အင်္ဂလန်လက်ရွေးစင်ကစားသမား အေဘရာဟမ်၊ ချီဝဲလ်နှင့် ဆန်ချိုတို့သုံးဦးစလုံး Negative အဖြေထွက်သော်လည်း နေမကောင်းသည့် ချီဝဲလ်မှာမူ ဘယ်လ်ဂျီယံနှင့်ပွဲကို လွဲချော်ဖွယ်ရှိကြောင်း သိရသည်။
ပြီးခဲ့သည့်တစ်ပတ် စနေနေ့က အသက်(၂၃)နှစ်ပြည့် မွေးနေ့ပွဲပြုလုပ်ခဲ့သည့် အေဘရာဟမ်နှင့် ပါတီပွဲသို့တက်ရောက်ခဲ့သူ ချီဝဲလ်၊ ဆန်ချိုတို့သည် ဥရောပဘောလုံးအဖွဲ့ချုပ် (UEFA) ၏ စည်းမျဉ်းအရ ဝေးလ်စ်အသင်းနှင့် ခြေစမ်းပွဲကို လွဲချော်ခဲ့ခြင်းဖြစ် သည်။
UEFA ၏ စည်းမျဉ်းအရ ပွဲမကစားမီ (၄၈) နာရီအတွင်း COVID-19 စစ်ဆေးမှု အဖြေ Negative ထွက်ရန် လိုအပ်ပြီး ၎င်းတို့ (၃)ဦးစလုံး တနင်္ဂနွေနေ့ကစားမည့် ဘယ်လ်ဂျီယံနှင့်ပွဲအတွက် Negative ရလဒ်ထွက်ပေါ်ခဲ့သည်။
သို့သော် အင်္ဂလန်အသင်းနည်းပြ ဆောက်ဂိတ်က "တမ်မီ(အေဘရာဟမ်) နဲ့ ဂျေဒန်(ဆန်ချို)တို့က လွတ်လွတ်လပ်လပ် လေ့ကျင့်နေပါပြီ။ ကစားသမားသုံးဦးစလုံး Negative အဖြေထွက်ပါတယ်။ ဘန်(ချီဝဲလ်) ကတော့ နည်းနည်းနေမကောင်းဖြစ်နေတယ်။ အသေးစားကိစ္စဖြစ်နိုင်ပေမဲ့ ကြိုတင်ကာကွယ်တဲ့အနေနဲ့ တခြားသူတွေနဲ့ သူ့ကိုခွဲထားပါသေးတယ်"ဟု ပြောကြားသည်။
အင်္ဂလန်အသင်းသည် ဝေးလ်စ်အသင်းနှင့် ခြေစမ်းပွဲတွင် (၃)ဂိုးပြတ် အနိုင်ရခဲ့ပြီး အောက်တိုဘာ (၁၁)ရက်တွင် ဘယ်လ်ဂျီယံအသင်းနှင့် UEFA Nations League ပွဲစဉ် ကစားရမည်ဖြစ်သည်။
