ကိုလံဘီယာ - ဗင်နီဇွဲလား (မြန်မာစံတော်ချိန် အောက်တိုဘာ ၁၀ ရက်၊ နံနက် ၆:၀၀ နာရီ)
နောက်ဆုံးတွေ့ဆုံမှု(၁၃)ပွဲမှာ နှစ်သင်းစလုံး (၄)ပွဲစီ အနိုင်ကစားထားပြီး ကျန်(၅)ပွဲကတော့ သရေကျခဲ့ပါတယ်။ ဗင်နီဇွဲလားအသင်းမှာ ဝါရင့်တိုက်စစ်မှူး ရွန်ဒွန် မပါဝင်တာကလွဲလို့ လူစုံနီးပါး ရွေးချယ်ထားတယ်။ ဒါပေမဲ့ ကိုလံဘီယာမှာတော့ ဥရောပထိပ်တန်းလိဂ်တွေက နေရာအလိုက် ခြေစွမ်းပြသူတွေ များပါတယ်။ မူရီယဲလ်၊ ဇာပါတာတို့အတွက် ဖယ်လ်ကာအိုအလွန် ခေတ်တစ်ခေတ်ကို တည်ဆောက်ဖို့ အချိန်တန်နေပါပြီ။ ကိုလံဘီယာ ဂိုးပြတ်၊ မပြတ်ပဲ ကြည့်ရမှာပါ။
ဘရာဇီးလ် - ဘိုလစ်ဗီးယား (မြန်မာစံတော်ချိန် အောက်တိုဘာ ၁၀ ရက်၊ နံနက် ၇:၀၀ နာရီ)
ဘရာဇီးလ်အသင်းလူစာရင်းမှာ ဒဏ်ရာပြဿနာရှိနေတဲ့ အယ်လစ်ဆန်၊ ဂျေးဇူးတို့ကလွဲလို့ ပါသင့်ပါထိုက်သူတွေအားလုံးကို နည်းပြ ထိထီက ရွေးချယ်ထားပါတယ်။ ၂၀၁၉ ကိုပါအမေရိကပြိုင်ပွဲမှာ ဗိုလ်စွဲပြီးကတည်းက ခြေစမ်းပွဲတွေမှာ ရလဒ်ပိုင်း ဆိုးရွားခဲ့တဲ့ ဘရာဇီးလ်အသင်းအတွက် ကမ္ဘာ့ဖလားခြေစစ်ပွဲအဖွင့်မှာ တာထွက်ကောင်းဖို့တော့ လိုအပ်နေပါတယ်။ ဘိုလစ်ဗီးယားကတော့ ပြန်တည်ဆောက်နေတဲ့အသင်းဖြစ်ပြီး အသင်းမှာ နိုင်ငံတကာပွဲတစ်ပွဲမှ မကစားဖူးသေးသူ အတော်များများ ပါဝင်ပါတယ်။ ဘရာဇီးလ် ဂိုးပြတ်ဖို့ မခက်လောက်ပါဘူး။
