မန်ယူအသင်း၏ ပြင်သစ်လက်ရွေးစင်ကွင်းလယ်လူ ပေါ့ဘာသည် ပြင်သစ်လက်ရွေးစင်အသင်း၏ ပွဲစဉ်များအတွက် ပြင်သစ်နိုင်ငံသို့ ရောက်ရှိနေစဉ်အတွင်း မီဒီယာများနှင့်တွေ့ဆုံရာတွင် ရီးယဲလ်မက်ဒရစ်အသင်းသို့ ပြောင်းရွှေ့ရန်မှာ သူ၏အိပ်မက်ဖြစ်သည်ဟု ထုတ်ဖော်ပြောကြားခဲ့သည်။
ပေါ့ဘာကို သတင်းစာရှင်းလင်းပွဲတွင် ဂျာနယ်လစ်များက ရီးယဲလ်မက်ဒရစ်အသင်းနှင့် ပတ်သက်ပြီးမေးမြန်းခဲ့ရာ ၎င်းက "ဟုတ်တာပေါ့။ ဘောလုံးသမားတိုင်း ရီးယဲလ်မက်ဒရစ်လိုအသင်းကြီးမှာ ကစားခွင့်ရဖို့ အိပ်မက်ကြတာပဲ။ ကျွန်တော့်အတွက်လည်း ဒါက အိပ်မက်ပဲပေါ့။ တစ်နေ့နေ့မှာ ဘာကြောင့်မဖြစ်နိုင်ရမှာလဲ" ဟု ပြောကြားခဲ့ခြင်းဖြစ်သည်။
သို့ရာတွင် သူသည် လက်ရှိမန်ယူကစားသမားဘဝတွင် ပျော်ရွှင်နေသည်ဟုလည်း ပြောကြားခဲ့ပြီး "ကျွန်တော်က အခု မန်ယူမှာကစားနေပြီး ကျွန်တော့်အသင်းကို ကျွန်တော်ချစ်ပါတယ်။ ပျော်လည်းပျော်ပါတယ်။ ဒီအသင်းနဲ့ ထိုက်တန်တဲ့အရာတွေကို ရရှိအောင် ကျွန်တော် အစွမ်းကုန်လုပ်သွားမှာပါ" ဟု ဆိုခဲ့သည်။
ပေါ့ဘာသည် မန်ယူအသင်းနှင့် စာချုပ်သက်တမ်းကုန်ဆုံးရန် နီးစပ်နေပြီဖြစ်သော်လည်း "ကျွန်တော့်ကို ဘာမှမပြောကြသေးဘူး။ အက်ဒ်ဝုဒ်ဝက်ဒ်နဲ့ စကားမပြောရသေးသလို စာချုပ်သစ်ကိစ္စ ပြောထားတာလည်း မရှိသေးပါဘူး"ဟု ၎င်းကဆိုသည်။
