မိုနာကိုအသင်းနည်းပြသစ် နီကိုကိုဗက်သည် ရီးယဲလ်တိုက်စစ်မှူး ယိုဗစ်အား ခေါ်ယူရန် အလိုရှိနေကြောင်း ပြင်သစ်မီဒီယာများက ဖော်ပြနေကြသည်။
အသက် (၂၂)နှစ်အရွယ်ရှိ ဆားဘီးယားတိုက်စစ်မှူး လူကာယိုဗစ်သည် ၂၀၁၉ နွေရာသီအပြောင်းအရွှေ့ကာလတွင် ယူရိုသန်း (၆၀)ဖြင့် ဖရန့်ဖတ်အသင်းမှ ရီးယဲလ်အသင်းသို့ ပြောင်းရွှေ့ကစားခဲ့သူဖြစ်သည်။
သို့သော် ယိုဗစ်သည် ရီးယဲလ်အသင်းတွင် ပုံမှန်နေရာရရန် ရုန်းကန်ခဲ့ရပြီး ယခုရာသီ ပြိုင်ပွဲစုံ (၂၆)ပွဲတွင် (၂)ဂိုးသာ သွင်းယူနိုင်ခဲ့သည်။
ထို့ကြောင့် ရီးယဲလ်အသင်းသည် ယခုနွေရာသီအပြောင်းအရွှေ့ကာလတွင် ယိုဗစ်ကို ရောင်းချရန် စီစဉ်နေပြီး ၎င်းကို ခေါ်ယူရန် အေစီမီလန်နှင့် မိုနာကိုအသင်းတို့က စိတ်ဝင်စားနေကြောင်း သိရသည်။
မိုနာကိုနည်းပြဖြစ်လာသည့် နီကိုကိုဗက်သည် ဖရန့်ဖတ်အသင်းကို ကိုင်တွယ်စဉ်က ယိုဗစ်နှင့်လက်တွဲဖူးသူဖြစ်ပြီး ယခုအခါ မိုနာကိုအသင်းတွင် ၎င်းနှင့် ပြန်လည်လက်တွဲရန် အလိုရှိနေခြင်းဖြစ်သည်။
ယိုဗစ်သည် ဖရန့်ဖတ်အသင်းတွင် နီကိုကိုဗက် လက်အောက်၌ ကစားခဲ့သည့် ၂၀၁၇-၁၈ ရာသီတွင် ခြေစွမ်းပြကစားနိုင်ခဲ့ပြီး ဖရန့်ဖတ်အသင်းနှင့်အတူ ဂျာမန်ပိုကယ်လ်ဖလားကို ရယူနိုင်ခဲ့သည်။
