ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီးနှင့် တနင်္သာရီတိုင်းဒေသကြီး ဝန်ကြီးချုပ် အပါအဝင် ခုနစ်ဦးအား ဆောက်လုပ်ရေး ကုမ္ပဏီတစ်ခုက အထွေထွေလျော်ကြေးငွေ ကျပ်သိန်းပေါင်း ၅၀၀၀၀ ရလိုမှုဖြင့် တနင်္သာရီတိုင်းဒေသကြီး တရားလွှတ်တော်တွင် တရားမမှုဖြင့် စွဲဆိုထားမှုမှာ ကာလစည်းကမ်း သတ်မှတ်ချက် ကျော်လွန်နေသည့်အတွက် စွဲဆိုထားမှုအား ပလပ်ကြောင်း အမိန့်ချခဲ့သည်ဟု သိရသည်။
ထားဝယ်ခရိုင် သရက်ချောင်းမြို့ ပြည်သူ့ဆေးရုံရှိ ဝန်ထမ်းအိမ်ရာ ဆောက်လုပ်ခြင်းလုပ်ငန်းကို တင်ဒါအောင်မြင်ခဲ့သည့် ကုမ္ပဏီအား တည်ဆောက်မှုလုပ်ငန်း ရပ်ဆိုင်းစေခဲ့သည့် ကိစ္စနှင့်ပတ်သက်၍ လုပ်ငန်းရပ်ဆိုင်းခြင်း ခံရသည့် Super Local ကုမ္ပဏီက ယင်းလုပ်ငန်း ရပ်ဆိုင်းစေမှုကြောင့် ကုမ္ပဏီ၏ ဆုံးရှုံးမှုများအပေါ် အထွေထွေလျော်ကြေးငွေ ကျပ်သိန်း ၅၀၀၀၀ ရလိုမှုဖြင့် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီးနှင့် တနင်္သာရီတိုင်းဒေသကြီး ဝန်ကြီးချုပ်အပါအဝင် အစိုးရအဖွဲ့နှင့် ဌာနဆိုင်ရာ အရာရှိ ခုနစ်ဦးအား တရားစွဲဆိုရန် တနင်္သာရီတိုင်းဒေသကြီး တရားလွှတ်တော်၌ ပြီးခဲ့သည့် မတ် ၁၂ ရက်က တရားမမှု အဆိုလွှာကို တင်ခဲ့ပြီး မတ် ၂၄ ရက်တွင် အဆိုလွှာအပေါ် တိုင်းဒေသကြီး တရားလွှတ်တော်က စိစစ်လက်ခံခဲ့ပြီးနောက် ခြောက်ကြိမ်မြောက် ရုံးချိန်းဖြစ်သည့် ဇူလိုင် ၆ ရက်တွင် အမှုနှင့် ပတ်သက်၍ ရုံးတော်က တရားလိုနှင့် တရားပြိုင်များ၏ အဆိုလွှာ၊ အချေလွှာနှင့် နှစ်ဖက်တင်ပြခဲ့သည့် စာရွက်စာတမ်းများအရ ကာလစည်းကမ်းသတ် အက်ဥပဒေအရ တရားစွဲဆိုနိုင်သည့် အချိန်ကာလကို ကျော်လွန်နေကြောင်း စစ်ဆေးပေါ်ပေါက်ခဲ့သောကြောင့် ယင်းဥပဒေအရ အမှုကို ပလပ်ခဲ့ခြင်းဖြစ်သည်ဟု သိရသည်။
“၂၀၂၀ ပြည့်နှစ် ဇူလိုင်လ ၆ ရက်နေ့က တနင်္သာရီတိုင်းဒေသကြီး တရားလွှတ်တော် ၂၀၂၀ ပြည့်နှစ်တရားမကြီး အမှုအမှတ် (၁) Super Local Engineering ဆောက်လုပ်ရေး ကုမ္ပဏီလီမိတက် ၎င်း၏ကိုယ်စား မန်နေးဂျင်းဒါရိုက်တာ ဦးတင်ထွန်းက ပြည်ထောင်စုဝန်ကြီး (ကျန်းမာရေးနှင့် အားကစား ဝန်ကြီးဌာန) နှင့် ဝန်ကြီးချုပ် (တနင်္သာရီတိုင်း ဒေသကြီးအစိုးရအဖွဲ ့) အပါအဝင် ခုနစ်ဦးအပေါ် အထွေထွေလျော်ကြေးငွေ ကျပ်သိန်းငါးသောင်း ရလိုမှု စွဲဆိုမှုကို ပလပ်ကြောင်း အမိန့် ချမှတ်ခဲ့ပါတယ်။ တရားလို Super Local ကုမ္ပဏီရဲ့ စွဲဆိုမှုဟာ ကာလစည်းကမ်းသတ် ကျော်လွန်နေတဲ့အတွက် ပလပ်တဲ့အမိန့် ချမှတ်ခဲ့ခြင်း ဖြစ်ပါတယ်။ Super Local ကုမ္ပဏီအနေနဲ့ ကာလစည်းကမ်းသတ် အက်ဥပဒေ ပုဒ်မ ၁၅၆ အရ အမိန့်ချမှတ်တဲ့နေ့ကနေ စပြီးတော့ ရက်ပေါင်း ၉၀ အတွင်းမှာ ပြည်ထောင်စု တရားလွှတ်တော်ချုပ်ကို အယူခံဝင်ရောက် နိုင်ပါတယ်” ဟု တနင်္သာရီတိုင်းဒေသကြီး တရားလွှတ်တော် တိုင်းတရားရေးဦးစီးမှူး ဒေါ်အေးအေးသန်းက ပြောကြားသည်။
ကာလစည်းကမ်းသတ် အက်ဥပဒေ ပထမဇယား အပိုဒ် ၂၂ အရ တရားမမှုအဖြစ် စွဲဆိုမည့် တရားလိုဖြစ်သူမှာ ၎င်းနစ်နာကြောင်း စတင်သိရှိသည့်နေ့မှ တစ်နှစ်အတွင်း တရားစွဲဆိုရမည် ဖြစ်သော်လည်း လက်ရှိအမှုတွင် တရားလိုနှင့် တရားပြိုင်များဘက်က တင်ပြခဲ့သည့် စာရွက်စာတမ်းများအရ အဆိုပါ လုပ်ငန်းကိစ္စရပ်မှာ ၂၀၁၇ ခုနှစ်က ဖြစ်ပွားခဲ့သောကြောင့် လက်ရှိအချိန်တွင် အချိန်သုံးနှစ်ခန့် ကြာမြင့်နေပြီဖြစ်ပြီး တရားစွဲဆိုရန် သတ်မှတ်ထားသည့် အချိန်ကာလထက် နှစ်နှစ်ခန့် ကျော်လွန်နေသည့် အနေအထား ဖြစ်နေကြောင်း သိရသည်။
တနသာင်္ရီတိုင်းဒေသကြီး တရားလွှတ်တော်က ၎င်းစွဲဆိုထားသည့်အမှုအား ပလပ်ခဲ့ခြင်းနှင့် ပတ်သက်၍ ပြည်ထောင်စု တရားလွှတ်တော်ချုပ်ထံ အယူခံ တက်ရောက်သွားမည်ဖြစ်ပြီး အမှန်တရားကို ရှာဖွေမည် ဖြစ်ကြောင်း Super Local Engineering ဆောက်လုပ်ရေး ကုမ္ပဏီလီမိတက်၏ မန်နေးဂျင်း ဒါရိုက်တာ ဦးတင်ထွန်းက ဆိုသည်။
“ဗဟိုကို ဆက်တက်မှာပေါ့။ အမှန်တရားတစ်ခု ပေါ်ထွက်ဖို့အတွက် အစအဆုံး လုပ်ရမှာပေါ့။ တစ်ဆင့်ပြီး တစ်ဆင့်ပေါ့။ အဓိကက အမှန်တရားရှာမယ်” ဟု ဦးတင်ထွန်းက ထားဝယ် အခြေစိုက် မီဒီယာများကို ဖြေကြားသည်။
