ရန်ကုန်ယူနိုက်တက်အသင်းသည် မြန်မာ့လက်ရွေးစင်တိုက်စစ်မှူး ကျော်ကိုကို၏ အနာဂတ်နှင့်ပတ်သက်၍ လက်ရှိအချိန် အထိ သတင်းထုတ်ပြန်မှုမရှိသေးကြောင်း သိရသည်။

ရန်ကုန်ယူနိုက်တက်အသင်းနှင့် ကျော်ကိုကိုတို့ ချုပ်ဆိုထားသည့် စာချုပ်သက်တမ်း မှာ ယခုဒီဇင်ဘာလအကုန်တွင် ကုန်ဆုံးမည်ဖြစ်သည်။

သို့သော် ရန်ကုန်ယူနိုက်တက်အသင်းသည် ကျော်ကိုကိုအား သက်တမ်းတိုးစာချုပ်ချုပ်ဆိုမည့်ကိစ္စနှင့် ပတ်သက်၍ လက်ရှိအချိန်အထိ ဆုံးဖြတ်ရသေးခြင်းမရှိကြောင်း သိရသည်။

ကျော်ကိုကိုသည် လက်ရှိအချိန်တွင် ထိုင်းလိဂ်-၁ ကလပ် ဆူခိုထိုင်းအသင်း၌ ခြေစွမ်းပိုင်းသွားရောက် စမ်းသပ်ခံနေပြီး လေ့ကျင့်မှုများပြုလုပ်လျက်ရှိသည်။

ကျော်ကိုကိုသည် ယာဘက်ဒူးဒဏ်ရာကြောင့် မြန်မာ့လက်ရွေးစင် အသင်းယှဉ်ပြိုင်ကစားခဲ့သည့် ၂၀၂၂ ကမ္ဘာ့ ဖလားခြေစစ်ပွဲ ပွဲစဉ်အချို့ကိုလည်း လွဲချော်ခဲ့သူဖြစ်သည်။

ကျော်ကိုကိုသည် ၂၀၁၃ ရာသီတွင် ဇေယျာရွှေမြေအသင်း (လက်ရှိ ဖျက်သိမ်းထား) မှ ရန်ကုန်ယူနိုက်တက်အသင်းသို့ ရောက်ရှိလာသူဖြစ်ပြီး ၂၀၁၈ ရာသီတွင် ထိုင်းလိဂ်- ၁ ကလပ် ချင်းရိုင်ယူ နိုက်တက်အသင်းသို့ တစ်ရာသီ အငှားစာချုပ် ဖြင့် သွားရောက်ကစားခဲ့သည်။

ထို့နောက် ကျော်ကိုကိုသည် ပြီးခဲ့သည့် ၂၀၁၉ ရာသီက ထိုင်းလိဂ်-၁ ကလပ်အသင်းပင်ဖြစ်သည့် ဆာမတ်ပရာခန်အသင်းသို့ ပြောင်းရွှေ့ကာ တစ်ရာသီအငှားစာချုပ်ဖြင့် ဆက်လက် ကစားခဲ့ကြောင်း သိရသည်။

ဆူခိုထိုင်းအသင်းသည် ထိုင်းလိဂ်-၁ အမှတ်ပေးပြိုင်ပွဲသို့ ၂၀၁၆ ရာသီက တန်းတက်ခွင့်ရရှိခဲ့ပြီး ပြီးခဲ့သည့် ၂၀၁၉ ရာသီတွင် အဆင့် ၁၂ နေရာ ရပ်တည်နိုင်ခဲ့ကြောင်း သိရသည်။

ဆူခိုထိုင်းအသင်းသည် လက်ရှိအချိန်တွင် မြန်မာ့လက်ရွေးစင်နောက်ခံလူ ဇော်မင်းထွန်းကိုလည်း တစ်ရာသီစာချုပ်ဖြင့် ခေါ်ယူထားသည်။

ထို့ပြင် ဆူခိုထိုင်းအသင်းသည် ဘရာဇီးလ်တိုက်စစ်မှူး ပေါ်လစ္စတာ၊ ကမ္ဘောဒီးယားလက်ရွေးစင်ကွင်းလယ်လူ သီယာရီဘင်တို့ကိုလည်း  လာမည့်ရာသီအတွက် ခေါ်ယူထားကြောင်း သိရသည်။