ချယ်လ်ဆီးအသင်းနည်းပြ လမ်းပတ်က လိဂ်ဖလားစတုတ္ထအဆင့်တွင် တွေ့ဆုံနေသည့် မန်ယူအသင်းမှာ ခြေစွမ်း ခန့်မှန်း၍မရနိုင်သည့်အသင်းဟု ပြောကြားခဲ့သည်။ 

မန်ယူအသင်းသည် လိဂ်ဖလားတတိယအဆင့်ပွဲစဉ်တွင် League One ကလပ် ရော့ချ်ဒေးလ်အသင်းအား ခက်ခက်ခဲခဲကစားခဲ့ရကာ ပယ်နယ်တီအဆုံးအဖြတ်ဖြင့် အနိုင်ရခဲ့ခြင်းဖြစ်သည်။ 

သို့ရာတွင် လမ်းပတ်က မန်ယူအသင်းမှာ ရာသီအဖွင့်ပွဲစဉ်တွင် မိမိတို့အား (၄-ဝ)ဂိုးဖြင့် အနိုင်ယူခဲ့သည့်အသင်းဖြစ်ပြီး လက်ရှိခြေစွမ်းကိုလည်း မခန့်မှန်းနိုင်ကြောင်း ပြောကြားခဲ့သည်။ 

လမ်းပတ်က "မဲခွဲမှုကတော့ စိတ်ဝင်စားစရာပါပဲ။ အသင်းကြီးနှစ်သင်းတွေ့ဆုံမှုပါ။ အိမ်ကွင်းမှာကစားရမှာဖြစ်လို့ ဝမ်းသာမိပါတယ်။ လက်ရှိအချိန်မှာ သူတို့ခြေစွမ်းကျဆင်းနေပြီလို့ မထင်ပါဘူး။ ဘယ်လိုရလဒ်ထွက်မလဲ စောင့်ကြည့်ကြတာပေါ့"ဟု ပြောကြားခဲ့သည်။

ချယ်လ်ဆီးနှင့် မန်ယူအသင်းတို့၏ လိဂ်ဖလားစတုတ္ထအဆင့်ပွဲစဉ်ကို အောက်တိုဘာ (၁၀) ရက်တွင် စတမ်းဖို့ဒ်ဘရစ်ချ်ကွင်း၌ ကစားမည်ဖြစ်သည်။