ရန်ကုန်မြို့ရှိ နိုင်ငံခြားငွေ လဲလှယ်ရောင်းဝယ်ရေး ကောင်တာတစ်ခုကို တွေ့ရစဉ် (ဓာတ်ပုံ-ကျော်ဇင်ဖြိုး)

နိုင်ငံခြားငွေ ရောင်းဝယ်ရာတွင် လိုက်နာရမည့် သတ်မှတ်ချက်ဘောင်ကို မြန်မာနိုင်ငံတော် ဗဟိုဘဏ်က ပယ်ဖျက်ခဲ့ပြီးနောက် နိုင်ငံခြားငွေလဲနှုန်း တစ်ဒေါ်လာ ၁၄၈၈ ကျပ်အထိ စံချိန်တင် ဆက်လက် မြင့်တက်ခဲ့ကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။

နိုင်ငံခြားငွေ ရောင်းဝယ်ရာတွင် ဗဟိုဘဏ်၏ သတ်မှတ်ချက် (ဗဟိုဘဏ် ရည်ညွှန်း ငွေလဲလှယ်နှုန်း + ၀ ဒသမ ၈ ရာခိုင်နှုန်း) ဘောင်အတွင်း ဆောင်ရွက်ရန် ၂၀၁၂ ခုနှစ် နိုဝင်ဘာလအတွင်း ညွှန်ကြားခဲ့ခြင်းဖြစ်ပြီး ယခုဗဟိုဘဏ်က သြဂုတ် ၁၃ ရက်တွင် အမှာစာဖြင့် ပယ်ဖျက်ခဲ့ခြင်းဖြစ်သည်။ အဆိုပါ ညွှန်ကြားချက်မှာ နိုင်ငံခြားရသုံးငွေများ ရောင်းဝယ်ဖောက်ကားသည့် လုပ်ငန်းလိုင်စင် (Authorized Dealer License – A.D) ရ ဘဏ်များအားလုံး၊ နိုင်ငံခြားငွေများ ဝယ်ယူရောင်းချ လဲလှယ်ပေးခွင့်လိုင်စင် (Money Changer License – M.C) ရရှိသူများအားလုံး အကျုံးဝင်သည်။

“ဗဟိုဘဏ်က ရည်ညွှန်းသတ်မှတ်ဈေးနဲ့ အပြင်ဈေးနှုန်း သိပ်မကွာအောင်၊ ပြင်ပပေါက်ဈေးနဲ့ ဘဏ်ကောင်တာဈေးနှုန်း မကွာအောင် လုပ်တဲ့သဘောပါ။ ဒီလိုလုပ်တဲ့အတွက် ဘဏ်တွေနဲ့ တရားဝင ငွေလဲကောင်တာတွေ အပြင်ပေါက်ဈေးအတိုင်း တရားဝင် အရောင်းအဝယ်လုပ်လို့ ကောင်းလာမှာပါ။ ငွေကြေးဈေးကွက်အတွက် ကောင်းတဲ့အပြောင်းအလဲလို့ ယူဆပေမယ့် သာမန်လူတွေအတွက် သိပ်နားမလည်တော့ ဈေးကွက်တော့ အလှုပ်အခတ် ဖြစ်သွားတယ်။ ဒီကိစ္စ ပြေလည်သွားရင် ကမ္ဘာ့ဒေါ်လာဈေး ကျတာနဲ့ ပြန်ကျလာမှာပါ။ ဒီနေ့တောင် ကမ္ဘာ့ဈေးကွက်မှာ ဒေါ်လာဆက်မတက်ဘူး။ ဒီမှာသာ တက်သွားတာပါ” ဟု နိုင်ငံခြားငွေကြေး လဲလှယ်ရောင်းဝယ်ရေး ကောင်တာပိုင်ရှင် တစ်ဦးက ပြောကြားသည်။

သြဂုတ် ၁၃ ရက်တွင် ကမ္ဘာ့ဒေါ်လာဈေး အညွှန်းကိန်း ၁၃ လအတွင်း အမြင့်ဆုံးနှုန်းအဖြစ် ၉၆ ဒသမ ၃၅ ပွိုင့်ဝန်းကျင်ရောက်ပြီး သြဂုတ် ၁၄ ရက်တွင် ၉၆ ဒသမ ၀၃ ပွိုင့်ဝန်းကျင်သို့ ပြန်ကျခဲ့သည်။ ဒေါ်လာသည် အမြင့်ဆုံးတန်းမှ ပြန်ကျပြီး ယွမ်ငွေတန်ဖိုး အကျရပ်သွားသော်လည်း ပြည်တွင်းဈေးကွက်တွင် ငါးရက်အတွင်း ကျပ် ၃၀ ကျော် မြင့်တက်ခဲ့ခြင်းဖြစ်သည်။

၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ်စံချိန်ကို ဇူလိုင် ၃၀ ရက်တွင် ကျပ် ၁၄၄၀ ဖြင့် ချိုးခဲ့ပြီး ဇူလိုင် ၃၁ ရက်တွင် ၁၄၄၃ ကျပ်၊ သြဂုတ် ၁ ရက်တွင် ၁၄၄၇ ကျပ်၊ သြဂုတ် ၂ ရက်တွင် ၁၄၅၁ ကျပ်၊ သြဂုတ် ၃ ရက်တွင် ၁၄၆၅ ကျပ်၊ သြဂုတ် ၇ ရက်တွင် ၁၄၇၅ ကျပ်အထိ စံချိန်တင် ဆက်လက်မြင့်တက်ခဲ့သည်။ သြဂုတ် ၁၀  တွင် ၁၄၅၅ ကျပ်အထိ ကျဆင်းခဲ့သော်လည်း သြဂုတ် ၁၄ ရက်တွင် ၁၄၈၈ ကျပ်အထိ စံချိန်တင် ဆက်လက်မြင့်တက်ခဲ့သည်။

ဈေးကွက်အတွင်း ဒေါ်လာဈေး မြင့်တက်မှုကြောင့် နိုင်ငံတော်ဗဟိုဘဏ်သည် ပြည်တွင်းဘဏ်များ လေလံဈေးကွက်မှတစ်ဆင့် နေ့စဉ် ဒေါ်လာတစ်သိန်း ထုတ်ရောင်းလျက်ရှိပြီး ပုဂ္ဂလိကဘဏ်များကို ဒေါ်လာများ ထုတ်ချေးရန်နှင့် သွင်းကုန်လုပ်ငန်းရှင်များကို ဒေါ်လာထုတ်ရောင်းရန် စီစဉ်နေကြောင်း သတင်းများ ထွက်ပေါ်လျက်ရှိသည်။ သြဂုတ် ၁၄ ရက်အတွက် သတ်မှတ်ထားသော ဗဟိုဘဏ်ရည်ညွှန်း ငွေလဲနှုန်းမှာ ကျပ် ၁၄၆၀ ဖြစ်သည်။

ပြီးခဲ့သည့် ငါးလအတွင်း အမြင့်ဆုံး ဖြစ်ပေါ်ခဲ့သော ကမ္ဘာ့ဒေါ်လာဈေး အညွှန်းကိန်းများမှာ ဖေဖော်ဝါရီတွင် ၉၀ ဒသမ ၄၃ ပွိုင့်၊ မတ်တွင် ၉၀ ဒသမ ၃၇ ပွိုင့်၊ ဧပြီတွင် ၉၁ ဒသမ ၇၁ ပွိုင့်၊ မေတွင် ၉၄ ဒသမ ၈၃ ပွိုင့်၊ ဇွန်တွင် ၉၅ ဒသမ ၂၁ ပွိုင့်ဖြစ်ပြီး ဇူလိုင်တွင် ၉၅ ဒသမ ၃၉ ပွိုင့်ဝန်းကျင် ဖြစ်ပေါ်ခဲ့ကာ သြဂုတ် ၁၄ ရက်တွင် ၉၆ ပွိုင့်ကျော် ဖြစ်ပေါ်ခဲ့သည်။

၂၀၁၈ ခုနှစ် မေလမှစတင်ကာ ကမ္ဘာ့ဒေါ်လာဈေး အညွှန်းကိန်း သိသိသာသာ ပြန်လည်မြင့်တက် ခဲ့ခြင်းဖြစ်ပြီး  ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်း အနိမ့်ဆုံးနှင့် အမြင့်ဆုံးနှုန်းများမှာ ဇန်နဝါရီတွင် ၁၃၂၃-၁၃၅၄ ကျပ်၊ ဖေဖော်ဝါရီတွင် ၁၃၂၃-၁၃၃၁ ကျပ်၊ မတ်တွင် ၁၃၂၆-၁၃၃၄ ကျပ်၊ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊ ဇွန်တွင် ၁၃၄၅-၁၄၀၇၊ ဇူလိုင်တွင် ၁၃၈၄-၁၄၄၃ တို့ဖြစ်ပြီး ဇွန်လတွင် ကွာဟချက် အများဆုံးဖြစ်ခဲ့သည်။

ပြည်တွင်းဈေးကွက်အတွင်း သြဂုတ် ၁၄ ရက်တွင် ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှု နှုန်းထားများမှာ ယူရို ၁၆၇၅ ကျပ်၊ စင်ကာပူဒေါ်လာ ၁၀၇၂ ကျပ်၊ မလေးရှားရင်းဂစ် ၃၅၈ ကျပ်၊ ထိုင်းဘတ် ၄၄ ဒသမ ၅၀ ကျပ်၊ တရုတ်ယွမ် ၂၁၄  ကျပ်၊ ဂျပန် ယန်း ၁၃ ဒသမ ၂၀ ကျပ်၊ တောင်ကိုရီးယားဝမ် ၁ ဒသမ ၄၀ ကျပ်ဖြစ်သည်။