ရန်ကုန်ဆိပ်ကမ်းဧရိယာရှိ မြန်မာ့စက်မှု ဆိပ်ကမ်းအား တွေ့ရစဉ်
သီလဝါဆိပ်ကမ်းဒေသရှိ မြန်မာ့ဆိပ်ကမ်း အာဏာပိုင်မှ ပိုင်ဆိုင်သော မြေကွက်အမှတ်၂၁ နှင့် ၂၂ တွင် တည်ဆောက်နေသည့် အထွေထွေကုန်စည်နှင့် ကောက်ပဲသီးနှံ တင်ချဆိပ်ခံတံတား တည်ဆောက်မှု ၂၀၁၇ ခုနှစ် နိုဝင်ဘာတွင် ပြီးစီးမည်ဖြစ်ကြောင်း Wilmar Myanmar Port Terminals (Thilawa) Ltd မှ သတင်းရရှိသည်။
သီလဝါဆိပ်ကမ်းဒေသရှိ မြန်မာ့ဆိပ်ကမ်းအာဏာပိုင် မြေကွက်များပေါ်တွင် နိုင်ငံတကာအဆင့်မီ အထွေထွေ ကုန်စည်နှင့် ကောက်ပဲသီးနှံတင်ချ ဆိပ်ခံတံတားနှင့် ဆိပ်ကမ်းဆိုင်ရာ အဆောက်အုံ တည်ဆောက်ရန် Wilmar Myanmar Port Terminals (Thilawa) Ltd မှ ငှားရမ်းလုပ်ကိုင်ခွင့် ရရှိခဲ့ခြင်းဖြစ်ပြီး စီမံကိန်း အကောင်အထည် ဖော်နိုင်ရန်အတွက် မြန်မာနိုင်ငံ ရင်းနှီးမြုပ်နှံမှု ကော်မရှင်၏ ခွင့်ပြုချက် ရရှိလုပ်ကိုင်နေခြင်း ဖြစ်သည်။
အဆိုပါ မြေကွက်အမှတ်၂၁ နှင့် ၂၂ အား မြန်မာ့ဆိပ်ကမ်း အာဏာပိုင်နှင့် ပို့ဆောင်ရေးဝန်ကြီးဌာနမှ နှစ်ရှည်မြေဂရန် ငှားရမ်းခြင်း (မြေငှားစာချုပ်) ဖြင့် ဆောင်ရွက်ခြင်းဖြစ်ပြီး လက်ရှိတွင် ဆိပ်ခံတံတားနှင့် သက်ဆိုင်ရာ အဆောက်အုံများ တည်ဆောက်နေပြီဖြစ်သည်။
အထွေထွေကုန်စည်နှင့် ကောက်ပဲသီးနှံ တင်ချဆိပ်ခံတံတား တည်ဆောက်မှုအား ၂၀၁၆ ခုနှစ် ဧပြီတွင် စတင်တည်ဆောက် ခဲ့ခြင်းဖြစ်ပြီး ယခုနှစ် နိုဝင်ဘာတွင် ပြီးစီးမည်ဖြစ်ကာ ဂျုံစက်ရုံနှင့် ဆီသိုလှောင်ကန်များ တည်ဆောက်မှုမှာ ၂၀၁၈ ခုနှစ်တွင် ပြီးစီးနိုင်မည်ဟု သိရသည်။
“ကျွန်မတို့အနေနဲ့ ဆိပ်ခံတံတား တည်ဆောက်မှုကို ၂၀၁၆ ခုနှစ် ဧပြီလမှာ စတင်ခဲ့တာဖြစ်ပြီး လက်ရှိမှာတော့ ဆိပ်ခံတံတား တည်ဆောက်မှုက သုံးရာခိုင်နှုန်းလောက် ပြီးစီးနေပြီ ဖြစ်ပါတယ်။ အခြား ကျန်တဲ့ စက်ရုံနဲ့ ဆီသိုလှောင်ကန်တွေ တည်ဆောက်မှုကတော့ ၂၀၁၈ ခုနှစ်လောက်မှာ ပြီးစီးနိုင်မှာ ဖြစ်ပါတယ်” ဟု Wilmar Myanmar Port Terminals (Thilawa) Ltd မှ တာဝန်ရှိသူတစ်ဦးက ပြောကြားသည်။
လက်ရှိ သီလဝါဆိပ်ကမ်း ဧရိယာ၌ တည်ဆောက်ဆဲဖြစ်သည့် အထွေထွေကုန်ပစ္စည်းတင် တံတားလေးစင်းနှင့် ကောက်ပဲသီးနှံတံတား လေးစင်းရှိပြီး ဆိပ်ကမ်းတံတား တည်ဆောက်ရန် မြေနေရာရှစ်ခု လျာထားကြောင်း မြန်မာ့ဆိပ်ကမ်း အာဏာပိုင်မှ သတင်းရရှိသည်။
လာမည့် ၂၀၁၈ ခုနှစ်အတွင်း ဂျပန်အိုဒီအေ ချေးငွေဖြင့် တည်ဆောက်နေသည့် ဆိပ်ခံတံတားနှစ်စင်း အပါအဝင် ကုန်သေတ္တာတင် တံတားလေးစင်းအား အသစ်ဖွင့်လှစ် အသုံးပြုနိုင်မည်ဖြစ်ကြောင်း သိရသည်။
ရန်ကုန်ဆိပ်ကမ်း ဧရိယာ၏ ပြင်ပဖြစ်သည့် သီလဝါ အထူးစီးပွားရေးဇုန်အနီးရှိ သီလဝါကမ်းနားဒေသတွင် မြန်မာ့ဆိပ်ကမ်း အာဏာပိုင်မှ အကျယ်မီတာ ၂၀၀၊ မီတာ ၇၅၀ ရှည်ပြီး ၃၇ ဒသမ ၇ ဧကရှိသော ဆိပ်ကမ်း ၃၇ ကွက် ဖော်ဆောင်ပြီး ဆိပ်ကမ်းလုပ်ငန်းများ ဆောင်ရွက်နိုင်ရန် စီစဉ်ထားခြင်း ဖြစ်သည်။
