ပို့ကုန်ရငွေ၏ ရာခိုင်နှုန်း ၄၀ ခန့်မှာ မြန်မာ့ဘဏ်များဆီသို့ အမှန်တကယ် ဝင်ရောက်လာမှု နည်းပါးနေခြင်း အပါအဝင် အချိန်တိုအတွင်း ငွေလဲလှယ်နှုန်း အတက်ကြမ်း၊ အကျကြမ်း ဖြစ်ပေါ်နေမှုကို ဖြေရှင်းပေးရန် အချက် ၁၂ ချက်ကို  ဒုတိယသမ္မတ ဦးမြင့်ဆွေ ဦးဆောင်သည့် ပုဂ္ဂလိကကဏ္ဍ ဖွံ့ဖြိုးတိုးတက်ရေး ကော်မတီသို့ ကုန်သည်စက်မှုအသင်းချုပ်မှ ဒုတိယဥက္ကဋ္ဌ ဦးရဲမင်းအောင်က တင်ပြထားကြောင်း သြဂုတ် ၂၅ ရက်တွင် သိရသည်။

အမေရိကန်ဒေါ်လာနှင့် မြန်မာကျပ်ငွေအကြား အချိန်တိုအတွင်း အတက်ကြမ်း၊ အကျကြမ်း ဖြစ်ပေါ်နေမှုကို စနစ်တကျ ဖြေရှင်းဆောင်ရွက်နိုင်ရန်နှင့် အများပြည်သူနှင့် လုပ်ငန်းရှင်များအကြား စိုးရိမ်ပူပန်စိတ်များ လျော့နည်းပပျောက်စေရန် အစိုးရနှင့် ဗဟိုဘဏ်က ဆောင်ရွက်ပေးသင့်သည့် အချက်များကို ငွေလဲနှုန်း တည်ငြိမ်စေရေးအတွက် ဦးရဲမင်းအောင်က တင်ပြခဲ့ခြင်းဖြစ်ပြီး အဓိက အချက်များအဖြစ် ပြည်တွင်း၌ ထုတ်လုပ်နေသော ကုန်ပစ္စည်းများအား ပြည်ပမှ တင်သွင်းမှုအပေါ် Quota, Tariff Rate Quota, Minium Access, Standards, Specifications၊ အခွန်နှင့် အကောက်ခွန်စနစ်တို့ဖြင့် ထိန်းကွပ်ဆောင်ရွက်ရန် တင်ပြခဲ့သည်။

ထို့ပြင် နိုင်ငံခြားဘဏ်များ၏ Trade Financing လုပ်ငန်းများ ပိုမိုကျယ်ပြန့်စွာ ဆောင်ရွက်နိုင်ရေး စီစဉ်ပေးရန်၊ တရုတ်နိုင်ငံနှင့် ကုန်သွယ်မှုအတွက် ယွမ်ငွေကို သုံးခြင်းနှင့် ထိုင်းနိုင်ငံနှင့် ကုန်သွယ်မှုအတွက် ဘတ်ငွေကိုသုံးခြင်း စသည့် အဓိက ကုန်သွယ်ဖက်နိုင်ငံများနှင့် Bilateral Currency Swap အစီအစဉ်ကို ညှိနှိုင်းဆောင်ရွက်ရန်၊ Interbank Currency Market ကို ယခုထက်ပိုပြီး ဖွံ့ဖြိုးတိုးတက်ရေး ဗဟိုဘဏ်က ကြီးမှူးဖော်ဆောင်ပေးရန်နှင့် ပြည်တွင်းပြည်ပ ရှယ်ယာရှင်များ ပါဝင်မှုဖြင့် ပို့ကုန်သွင်းကုန်ဘဏ်ကို အများပိုင် ဘဏ်အဖြစ် အမြန်ဆုံး ဖွဲ့စည်းတည်ထောင်နိုင်ရေး လုပ်ငန်းအဖွဲ့ ဖွဲ့၍ ဆောင်ရွက်ပေးရန် စသည့်အချက်များ ပါဝင်ကြောင်း သိရသည်။

ထို့ပြင် ပို့ကုန်မြှင့်တင်ရေး ပိုမိုထိရောက်စွာ အားပေးဆောင်ရွက်ရေးအတွက် ပို့ကုန်လုပ်ငန်းများအား အခွန်ဆိုင်ရာ သက်သာခွင့်၊ ဦးစားပေး အစီအစဉ်များဖြင့် ဆောင်ရွက်ပေးရန်၊ National Export Promotion ဖွဲ့စည်းပြီး နိုင်ငံတကာဈေးကွက် ထိုးဖောက်ရောင်းချခြင်းနှင့် ရလဒ်ထွက်သည့် ကုန်သွယ်ရေးဆိုင်ရာ ညှိနှိုင်းမှုများကို ဆောင်ရွက်ပေးရန်နှင့် ပို့ကုန်ရငွေ၏ ရာခိုင်နှုန်း ၄၀ ခန့်မှာ မြန်မာ့ဘဏ်များဆီသို့ အမှန်တကယ် ဝင်ရောက်လာမှု နည်းပါးနေသောကြောင့် တရားဝင်ကုန်သွယ်မှု ဖြစ်စေရေးအတွက် သက်ဆိုင်ရာ ကုန်သွယ်ဖက် နိုင်ငံများနှင့် ဦးစားပေးညှိနှိုင်း ဆောင်ရွက်ကာ နယ်စပ်ကုန်သွယ်မှုများတွင် ဘဏ်များကို တွင်ကျယ်စွာ အသုံးပြုလာရေး ညှိနှိုင်းပေးရန်၊ ပြည်တွင်းတွင် ဒေါ်လာအလွန်အကျွံအသုံးပြုမှု မဖြစ်ပေါ်စေရေးအတွက် ဒေါ်လာဖြင့် ပေးချေမှုများအပေါ် တားမြစ်သည့် ညွှန်ကြားချက်များ ထပ်မံထုတ်ပြန်ပြီး ညွှန်ကြားချက်များကို လိုက်နာရန် ပျက်ကွက်ပါက ဒဏ်ကြေး၊ ပြစ်မှု၊ ပြစ်ဒဏ်များပါ ထည့်သွင်းဖော်ပြကာ ထိရောက်စွာ ကိုင်တွယ်ဆောင်ရွက်သွားရန် လိုအပ်ကြောင်း တင်ပြခဲ့သည်။

ထို့ပြင် နိုင်ငံခြားရောက် ငွေကြေးများ ပြည်တွင်းသို့ ပြန်လည်စီးဝင်လာနိုင်ရန်နှင့် ပြည်ပရောက် မြန်မာလုပ်သားများ၏ လုပ်ခလစာငွေများ ပြည်တွင်းသို့ လွယ်ကူစွာ အလုံးအရင်းဖြင့် ပြန်လည်ဝင်ရောက် နိုင်ရေးအတွက် ပုဂ္ဂလိက နိုင်ငံခြား ငွေလွှဲလုပ်ငန်းများကို ပိုမိုတိုးချဲ့ လုပ်ကိုင်ခွင့် ခွင့်ပြုပေးရန်၊ ရင်းနှီးမြှုပ်နှံမှုအတွက် Capital Brough – in အမှန်တကယ် အလုံးအရင်းဖြင့် ဝင်ရောက်စေရေးအတွက် နိုင်ငံခြား ရင်းနှီးမြှုပ်နှံသူများကို ကူညီအားပေးရန်နှင့် ရင်းနှီးမြှုပ်နှံမှုကို MIC, DICA တို့က လွယ်ကူစွာ ခွင့်ပြုဆောင်ရွက် ပေးထားသော်လည်း လက်တွေ့မြေပြင်တွင် အကောင်အထည်ဖော်ရာ၌ မြေသုံးစွဲမှု အပါအဝင် အခက်အခဲများစွာ ကြုံတွေ့ရသဖြင့် စီးပွားရေးရပ်ဝန်း လွယ်ကူလျင်မြန်စေရေး ဆောင်ရွက်ပေးရန်၊ ပြည်ပတင်ပို့ကုန် လုပ်ငန်းများအတွက် အကောက်ခွန် ဦးစီးဌာန၏ ဝန်ထမ်းအင်အား တိုးချဲ့ပေးပြီး ၂၄ နာရီ ခုနစ်ရက် ပိတ်ရက်မရှိ ဝန်ဆောင်မှုပေးနိုင်ရေး ဆောင်ရွက်ပေးရန်နှင့် အသေးစား ငွေကြေးဝန်ဆောင်မှု လုပ်ငန်းများ၏ ပြည်ပမှ ချေးငွေများ၊ ရင်းနှီးမြှုပ်နှံမှုရယူမှု၊ စီးဝင်မှုများကို ဗဟိုဘဏ်နှင့် စီမံကိန်းနှင့် ဘဏ္ဍာရေး ဝန်ကြီးဌာနတို့မှ လျင်မြန်စွာ စိစစ်ပေးရန် လိုအပ်ကြောင်း ဦးရဲမင်းအောင်က တင်ပြခဲ့သည်။

လက်ရှိအခြေအနေတွင် ငွေကြေးတည်ငြိမ်မှုမရှိဘဲ ကျပ်ငွေတန်ဖိုး ကျဆင်းစေမှုမှာ ကုန်ဈေးနှုန်းများ ထပ်မံမြင့်တက်မည့် စိုးရိမ်စရာ အခြေအနေ ဖြစ်ပေါ်နေပြီး ထိုသု့ိဖြစ်ပေါ်နေမှုများအတွက် ငွေကြေးလဲလှယ်နှုန်း တည်ငြိမ်ရေး အပါအဝင် အကြံပြုချက်များ ဆောင်ရွက်ရန် ကုန်သည်စက်မှု အသင်းချုပ် အနေဖြင့် ကော်မတီတစ်ရပ် ဖွဲ့စည်းဆောင်ရွက်နေကြောင်း ကုန်သည်စက်မှု အသင်းချုပ်ဥက္ကဋ္ဌ ဦးဇော်မင်းဝင်းက ပြောကြားသည်။

“ဒေါ်အောင်ဆန်းစုကြည်ကို တင်ပြတဲ့ အခါမှာလည်း ဒီငွေလဲနှုန်းကိစ္စကိုပဲ ဆွေးနွေးမယ်။ ဒီလိုဆွေးနွေးတဲ့ အခါမှာ စီးပွားရေးတက်မယ်။ ကျမယ်မပြောဘူး။ စီးပွားရေးကို ရှေ့ဆက်ပြီး ဘယ်လိုကောင်းအောင် လုပ်မယ်ဆိုတဲ့ အဓိက အချက်တွေပဲ တင်ပြမယ်” ဟု ဦးဇော်မင်းဝင်းက ပြောကြားသည်။

လက်ရှိတွင် ပြည်တွင်း၌ နိုင်ငံခြားငွေ အလွန်အကျွံသုံးစွဲမှု မဖြစ်စေရေးအတွက် ဗဟိုဘဏ်က နိုင်ငံခြားငွေအစား ကျပ်ငွေသာ သုံးစွဲရန် တတိယအကြိမ်မြောက် ညွှန်ကြားစာ ထုတ်ပြန်ထားကြောင်း မြန်မာနိုင်ငံတော် ဗဟိုဘဏ်က ညွှန်ကြားရေးမှူးချုပ် ဦးဝင်းသော်က ရေးသားထားသည်။