ဘင်္ဂါလီမွတ်စလင် (မူရင်းတွင် ရိုဟင်ဂျာဟုဖော်ပြ) အကျပ်အတည်းကြောင့် နစ်နာဆုံးရှုံးမှုများအတွက် မြန်မာနိုင်ငံသည် လျော်ကြေး ဒေါ်လာခြောက်ဘီလျံခန့် ပေးသင့်သည်ဟု သြစတြေးလျ တက္ကသိုလ်တစ်ခု၏ လေ့လာမှုက အကြံပြု ဖော်ပြခဲ့သည်။

ဒါကာရှိ ဘင်္ဂလားဒေ့ရှ် ဒီပလိုမာ အင်ဂျင်နီယာအသင်း၌ ဖေဖော်ဝါရီ ၁၂ ရက်က ကျင်းပခဲ့သော ဘင်္ဂါလီမွတ်စလင် အကျပ်အတည်းဆိုင်ရာ ဆွေးနွေးပွဲတွင် ထုတ်ပြန်ခဲ့သော ထိုလေ့လာမှုကို သြစတြေးလျရှိ Swinburneနည်းပညာတက္ကသိုလ်က ဆောင်ရွက်ခဲ့ခြင်း ဖြစ်သည်။

လူ ၁၆၀၀၀ ခန့်ကို တွေ့ဆုံမေးမြန်းခဲ့ပြီး အိမ်ထောင်စု ၃၃၀၀ မှ ရရှိခဲ့သော အချက်အလက်များမှ ဘင်္ဂလားဒေ့ရှ် အစိုးရသည် ဒေါ် လာ ၂ ဒသမ ၆ ဘီလျံခန့် နစ်နာကြေးရသင့်ကြောင်း ထိုသုတေသနက ကောက်ချက်ချခဲ့သည်။ နစ်နာကြေးကို ကဏ္ဍနှစ်ရပ်ခွဲ၍ ပေးသင့်ပြီး စီးပွားရေးဆိုင်ရာ နစ်နာမှုနှင့် စိတ်ပိုင်းဆိုင်ရာ နစ်နာမှုတို့အတွက် ပေးသင့်ကြောင်း ထိုလေ့လာမှုက ပြောကြားခဲ့သည်။

ဘင်္ဂါလီမွတ်စလင်များကို လက်ခံထားမှုကြောင့် သဘာဝပတ်ဝန်းကျင်ဆိုင်ရာ ထိခိုက်မှု၊ ဆုံးရှုံးမှုနှင့် အကျပ်အတည်း တုံ့ပြန်ရေးအတွက် အသုံးစရိတ်တို့အတွက် ဘင်္ဂလားဒေ့ရှ်အစိုးရသည် နစ်နာကြေး ရသင့်သည်ဟု ယင်းလေ့လာမှုက အကြံပြုခဲ့သည်။

ဘင်္ဂါလီမွတ်စလင်တို့ ပိုင်ဆိုင်သော ပိုင်ဆိုင်မှုများကို အခြေခံတွက်ချက်မှုအရ ဘင်္ဂါလီမွတ်စလင်များသည် မြေဆုံးရှုံးမှုအတွက် ဒေါ်လာ ၁၆၅ သန်း ရသင့်ကြောင်း သြစတြေးလျ၏ လေ့လာမှုက ဖော်ပြခဲ့သည်။ ဘင်္ဂါလီ မွတ်စလင်များသည် ပျမ်းမျှတစ်ဦးလျှင် မြေနှစ်ဧကနှင့် ရေကန်သုံးကန်ကို ပိုင်ဆိုင်ကြောင်း လေ့လာမှုက တွေ့ရှိခဲ့သည်ဟု ဆိုသည်။

ရွှေ့ပြောင်းနေထိုင်ရမှုအတွက် နစ်နာမှုသည် ဒေါ်လာ ၇၇၁ သန်းခန့်ရှိပြီး ဘင်္ဂါလီ မွတ်စလင်တို့၏ အိမ်များတန်ဖိုးသည် ဒေါ်လာ ၉၈ သန်းခန့်နှင့် အခြားပိုင်ဆိုင်မှုများ ဆုံးရှုံးမှုအတွက် ဒေါ်လာ သန်း ၂၂၀ ခန့် နစ်နာဆုံးရှုံး ခဲ့သည်ဟုလည်း လေ့လာမှုက ဆိုခဲ့သည်။

ထို့ပြင် ခွဲခြားဖိနှိပ် ဆက်ဆံခံရမှုအတွက် ဘင်္ဂါလီမွတ်စလင် ဒုက္ခသည်များ စိတ်ပိုင်းဆိုင်ရာ ထိခိုက်ခံစားရမှု အတွက် မြန်မာက ဒေါ်လာ ၂ ဒသမ ၁ ဘီလျံခန့် လျော်ကြေးပေးသင့်ကြောင်း ယင်းလေ့လာမှုက ကောက်ချက်ချသင့်သည်။ ဘင်္ဂလားဒေ့ရှ်ရှိ အပြည်ပြည်ဆိုင်ရာ ရွှေ့ပြောင်းအခြေချအဖွဲ့ (IOM) ၏ ဌာနေကိုယ်စားလှယ် ဂျော့ဂီဂါအူရီက ဘင်္ဂါလီမွတ်စလင် ဒုက္ခသည်များသည် ဒေသခံများထက် ပို၍များပြားခဲ့ပြီး ဒေသခံများက လူနည်းစုများ ဖြစ်သွားခဲ့ကာ အလုပ်အကိုင်နှင့် လူနေမှုစံတို့ကို ကပြောင်းကပြန် ဖြစ်စေခဲ့ကြောင်း ပြောကြားခဲ့သည်။

ဘင်္ဂါလီမွတ်စလင် အကျပ်အတည်းပြီးနောက် ကော့ဘဇားတွင် အမှုအခင်း မြင့်တက်လာခဲ့ကြောင်း ဒုရဲမှူး တက်တွန်နာဆရင်းက ပြောကြားခဲ့သည်။ အကျပ်အတည်း နောက်ပိုင်းမှစပြီး ဘင်္ဂါလီမွတ်စလင်တို့နှင့် ဆက်နွှယ်သောအမှု ၅၀၀ ခန့်ရှိခဲ့ကြောင်း၊ ဥပဒေစိုးမိုးမှု ယိုယွင်းပျက်စီးမည်ကို စိုးရိမ်နေကြောင်းလည်း ၎င်းက ပြောကြားခဲ့သည်။

Ref : Dhaka Tribune