နေပြည်တော်၌ ကျင်းပလျက်ရှိသည့် (၁၉) ကြိမ်မြောက် အာဆီယံတက္ကသိုလ်အားကစားပြိုင်ပွဲ၏ ဝူရှူးပြိုင်ပွဲ ဒုတိယနေ့ကို ဒီဇင်ဘာ (၁၀) ရက်က ပြုလုပ်ရာ မြန်မာတက္ကသိုလ် ဝူရှူးအဖွဲ့က ရွှေ(၃)ခု၊ ငွေ(၁)ခု ထပ်မံဆွတ်ခူးရရှိခဲ့ကြောင်း သိရသည်။
မြန်မာဝူရှူးအဖွဲ့သည် ရွှေတံဆိပ်ဆုများကို ထောက်လုပြိုင်ပွဲမှ (၂)ခု၊ ဆန်းဆိုပြိုင်ပွဲမှ (၁)ခု ရယူနိုင်ခဲ့ခြင်းဖြစ်သည်။ အမျိုး သား ထိုက်ချိချွမ်+ထိုက်ချိကျန့်ပြိုင်ပွဲ၏ ဒုတိယနေ့ဖြစ်သည့် ထိုက်ချိကျန့်ပြိုင်ပွဲကို ဆက်လက်ကျင်းပရာ ငြိမ်းချမ်းကိုကိုက (၉.၆၀) မှတ်ရရှိပြီး ပြိုင်ပွဲနှစ်ခုပေါင်းတွင် (၁၉ .၂၂) မှတ်ဖြင့် ရွှေတံဆိပ်ရယူနိုင်ခဲ့သည်။
ယင်းပြိုင်ပွဲတွင် ခန့်မင်းထက် (မြန်မာ) က (၁၉. ၁၀) မှတ်ဖြင့် ဒုတိယ၊ ဂူနာဝမ် (အင်ဒို နီးရှား) က (၁၉. ၀၉) မှတ်ဖြင့် တတိယတို့ ရရှိသည်။
အမျိုးသမီးထိုက်ချိချွမ်ပြိုင်ပွဲတွင် မြန်မာမှ မြတ်နိုးအိမ်က (၉.၆၀) မှတ်ဖြင့် ရွှေတံဆိပ်ရခဲ့ပြီး ချန်လူယီ (မလေးရှား) က (၉.၅၄) မှတ်ဖြင့် ငွေတံဆိပ်၊ ဗီရာတန် (စင်ကာပူ)က (၉. ၅၃) မှတ်ဖြင့် ကြေးတံဆိပ်ရရှိသည်။
ဆန်းဆိုပြိုင်ပွဲ ၀ိတ်တန်းနှစ်ခု၏ ဗိုလ်လုပွဲများ ကျင်းပခဲ့ပြီး အမျိုးသား ၅၂ ကီလိုတန်းတွင် မြန်မာကစားသမားနှစ်ဦးဖြစ်သည့် နိုင်းတန်နှင့် ဖြိုးဇေယျာတို့ တွေ့ဆုံရာ နိုင်းတန်က နှစ်ပွဲပြတ်အနိုင်ရပြီး ရွှေတံဆိပ်ရခဲ့သည်။
အမျိုးသား (၅၆) ကီလိုတန်းတွင် ရိုမင်တို (အင်ဒိုနီးရှား) က အန်ဂါကီး (ထိုင်း)ကိုအနိုင်ရပြီး ရွှေတံဆိပ်ရခဲ့သည်။