ရှားပါးတိရစ္ဆာန် စာရင်းဝင် လူဝံလေးများ ရန်ကုန်တိရစ္ဆာန်ဥယျာဉ်ကို ရောက်ရှိနေကြောင်း Yangon zoo ၏ ထုတ်ပြန်ချက်အရ သိရသည်။
အဆိုပါ ထုတ်ပြန်ချက်တွင် လူသားမျိုးနွယ်စုများနှင့် ဗီဇအနီးစပ်ဆုံးဖြစ်ပြီး အလွန်ဉာဏ်ရည်ထက်မြက်ကြတဲ့ အမြှီးမပါသည့် မျောက်ဝံ (Ape) မျိုးနွယ်စုဝင် မလေးဘာသာစကားအရ "သဘာဝတောတွင်းလူသားကြီးများ" ဟု အဓိပ္ပာယ်ရတဲ့ "လူဝံ" (Bornean Orangutan) စုံတွဲလေး ရန်ကုန်တိရစ္ဆာန်ဥယျာဉ်သို့ ရောက်ရှိသည်။
အဆိုပါ မျိုးစိတ်အနေဖြင့် လက်ရှိ သဘာဝတောတွင်း၌ မျိုးသုဉ်းရန် အန္တရာယ်နှင့် အလွန်နီးကပ်နေသည့် (Critically Endangered Species) စာရင်းဝင် ရှားပါးတိရစ္ဆာန်လည်း ဖြစ်သည်။
ရန်ကုန်တိရစ္ဆာန်ဥယျာဉ်တွင် လူဝံများကို လွန်ခဲ့တဲ့ နှစ်ပေါင်း (၄၀) ခန့်က နောက်ဆုံးပြသခဲ့ခြင်းဖြစ်ပြီး ယခုအခါ လူဝံအထီးလေး (လီယို) နှင့် အမလေး (ပင်ကီ) တို့ကို ပြန်လည်တွေ့ဆုံခွင့်ရရှိခြင်း ဖြစ်သည်။
ထို့ပြင် လူဝံမျိုးစိတ်များကို အရှေ့တောင်အာရှရှိ ဆူးမားတြားနှင့်ဘော်နီယိုကျွန်းဆွယ်များမှာ တွေ့ရှိနိုင်ကြောင်း၊ သဘာဝတောထဲတွင် သစ်ပင်အမြင့်ကြီးများပေါ်၌ အသိုက်ဆောက်ကာ နေထိုင်လေ့ရှိပြီး မိမိတို့၏ ရှည်လျားသန်မာသော လက်များကို အသုံးပြု၍ တစ်ပင်မှတစ်ပင် ကူးသန်းသွားလာတတ်ေကြာင်း၊ ထို့အပြင် ပြဿနာများကို ကိုယ်တိုင်ဖြေရှင်းနိုင်ပြီး အသုံးအဆောင်ပစ္စည်းများကိုပါ ကိုင်တွယ်အသုံးပြုနိုင်လောက်အောင် ဉာဏ်ရည်မြင့်မားကြောင်း သိရသည်။
