ချယ်လ်ဆီးအသင်းရဲ့နည်းပြ မာရက်စကာက အင်္ဂလန်တောင်ပံကစားသမား ပါလ်မာရဲ့ ပေါင်ခြံဒဏ်ရာ သက်သာခြင်းမရှိတဲ့အတွက် နောက်ထပ်ခြောက်ပတ် ထပ်နားရမယ်လို့ အတည်ပြုပြောကြားခဲ့ပါတယ်။

ပါလ်မာဟာ ပြီးခဲ့တဲ့ရာသီမှာ ပြိုင်ပွဲစုံ ၁၈ ဂိုးသွင်းယူကာ ခြေစွမ်းပြခဲ့သူဖြစ်ပြီး နွေရာသီမှာ ကျင်းပခဲ့တဲ့ ကလပ်ကမ္ဘာ့ဖလားပြိုင်ပွဲမှာလည်း အကောင်းဆုံးကစားသမားဆု ရရှိခဲ့ပါတယ်။

ဒါပေမဲ့ ရာသီသစ်စတင်ချိန်မှာ ပေါင်ခြံဒဏ်ရာနဲ့ ရင်ဆိုင်ခဲ့ရတဲ့အတွက် ပရီးမီးယားလိဂ်သုံးပွဲနဲ့ ချန်ပီယံလိဂ်တစ်ပွဲသာ ကစားနိုင်ခဲ့ပါတယ်။

မာရက်စကာက ပါလ်မာကို အောက်တိုဘာလ နိုင်ငံတကာရက်သတ္တပတ် မတိုင်ခင်ကတည်းက အနားပေးခဲ့ပြီး နိုဝင်ဘာလမှာ ကြံ့ခိုင်မှုပြည့်ဝစွာနဲ့ ပြန်ကစားနိုင်ဖို့ မျှော်လင့်ခဲ့ပေမဲ့ အခု သူ့ရဲ့ ထင်မြင်ချက် မှားယွင်းခဲ့ပြီဖြစ်ကြောင်းလည်း ဝန်ခံခဲ့ပါတယ်။

ဒီနေ့ ပြုလုပ်ခဲ့တဲ့ သတင်းစာရှင်းလင်းပွဲမှာ မာရက်စကာက ''ကျွန်တော် မှားယွင်းခဲ့ပါတယ်။ ကံမကောင်းစွာပဲ သူက နောက်ခြောက်ပတ် အနားယူဖို့ လိုအပ်နေပါတယ်။ ကျွန်တော်တို့ သူ့ကို ကာကွယ်ပေးဖို့ တတ်နိုင်သလောက် ကြိုးပမ်းခဲ့ပါတယ်။ အရေးအကြီးဆုံးက သူ ပြန်ကစားနိုင်ချိန်မှာ ကြံ့ခိုင်မှုပြည့်ဝနေဖို့ပါ။ ဆေးအဖွဲ့က မှော်ဆရာတွေ မဟုတ်ပါဘူး။ ခြောက်ပတ်က လုံလောက်မယ်လို့ ကျွန်တော်တို့ မျှော်လင့်ပါတယ်။ တစ်ဆင့်ချင်း စောင့်ကြည့်သွားရမှာပါ။ သေချာတာကတော့ သူ အဆင်ပြေမှာပါ'' ဟု ပြောကြားခဲ့သည်။

ပါလ်မာသည် ဒီဇင်ဘာလဆန်းမှ ပြန်ကစားနိုင်မှာဖြစ်လို့ ချယ်လ်ဆီးအသင်းရဲ့ ပွဲစဉ် ၁၀ ပွဲခန့်ကို ထပ်မံလွဲချော်ဖွယ်ရှိနေပြီး ပရီးမီးယားလိဂ်မှာ စပါး၊ အာဆင်နယ်၊ ချန်ပီယံလိဂ်မှာ ဘာစီလိုနာနဲ့ ဆုံတွေ့ရမယ့်ပွဲတွေလည်း ပါဝင်နေကြောင်း သိရပါတယ်။