လီဗာပူးလ်ကို ရှုံးနိမ့်ခဲ့မယ်ဆိုရင် ချန်ပီယံမျှော်လင့်ချက် အဆုံးသတ်သွားနိုင်တယ်လို့ ဂွါဒီယိုလာကိုယ်တိုင် ဝန်ခံထားပါတယ်။ ပြိုင်ပွဲက သုံးပုံတစ်ပုံဝန်းကျင်သာရှိသေးတယ်ဆိုပေမဲ့ ၁၁ မှတ်ပြတ်ပြီးမှ ပြန်လိုက်နိုင်တဲ့အသင်းတော့ ပရီးမီးယားလိဂ်မှာ မရှိဖူးသေးပါဘူး။ လာမယ့်ပွဲမှာ လီဗာပူးလ်သာ အနိုင်ရခဲ့ရင် မန်စီးတီးကို ၁၁ မှတ် ဖြတ်နိုင်မှာဖြစ်ပြီး မန်စီးတီးသာ အနိုင်ရရင်တော့ ၅ မှတ်ကွာအနေအထား ပြန်ဖြစ်သွားမှာပါ။ ဒါကြောင့် လီဗာပူးလ်ထက် မန်စီးတီးအတွက် ပိုအရေးကြီးတဲ့ပွဲ ဖြစ်နေပါတယ်။ တကယ်လို့ မန်စီးတီးအသင်း ရှုံးနိမ့်ခဲ့မယ်ဆိုရင် ဒုတိယနေရာမှာ ဆက်ရှိဖို့လည်း မလွယ်တော့ပါဘူး။ ဒီအတွက် မန်စီးတီးအသင်း မဖြစ်မနေ အနိုင်ရဖို့ လိုအပ်နေပါတယ်။ အန်ဖီးလ်မှာ နိုင်ပွဲရယူနိုင်ဖို့က မန်စီးတီးအတွက် သေရေးရှင်ရေး အရေးကြီးနေပါတယ်။ ဒါပေမဲ့ ယုံကြည်မှုအပြည့်နဲ့ ပုံစံကောင်းပြနေတဲ့ လီဗာပူးလ်ကို မန်စီးတီး ဘယ်လိုအနိုင်ယူမှာလဲလို့ မေးခွန်းထုတ်ရမယ့် အခြေအနေမျိုး ဖြစ်နေတာပါ။ မန်စီးတီးအသင်းရဲ့ ယိမ်းယိုင်မှုက ဂွါဒီယိုလာ ရူးချင်လောက်အောင် ဆိုးရွားနေတာပါ။