ပရော်ဖက်ရှင်နယ် ဘောလုံးသမားဘဝမှ အနားယူသွားပြီဖြစ်သည့် စပိန်ဂန္ထဝင် ကွင်းလယ်လူ အင်နီယေစတာသည် ဒိန်းမတ် တတိယတန်းကလပ် ဟယ်လ်ဆင်ဂေါ်အသင်း၏ ပူးတွဲအသင်းပိုင်ရှင်ဖြစ်လာကြောင်း သိရသည်။
အသက် ၄၀ ရှိပြီဖြစ်သူ အင်နီယေစတာ သည် ပြီးခဲ့သည့် အောက်တိုဘာလဆန်းပိုင်းတွင် ကစားသမားဘဝမှ အနားယူပြီးနောက် ပထမဆုံးခြေလှမ်းအဖြစ် ဟယ်လ်ဆင်ဂေါ် အသင်း၏ရှယ်ယာကို ဝယ်ယူခဲ့ခြင်းဖြစ်သည်။
အင်နီယေစတာ တည်ထောင်ထားသည့် NSN အားကစားစီမံခန့်ခွဲမှုနှင့် အကြံပေးကုမ္ပဏီအနေဖြင့် ဆွစ်ဇာလန်ရင်းနှီးမြှုပ်နှံမှု အုပ်စုဖြစ်သည့် Stoneweg နှင့် ပူးပေါင်းဆောင်ရွက်မည်ဖြစ်ကြောင်း ဟယ်လ်ဆင်ဂေါ်အသင်းက အတည်ပြုထုတ်ပြန်ခဲ့သည်။
ဟယ်လ်ဆင်ဂေါ်အသင်းသည် ၁၂ သင်း ပါဝင်သည့် ဒိန်းမတ်တတိယတန်းလိဂ်တွင် အဆင့် ၇ နေရာ ရပ်တည်နေသည်။
အင်နီယေစတာသည် ကစားသမားဘဝ နောက်ဆုံးအသင်းအဖြစ် ယူအေအီးကလပ် အမ်းမရိတ်စ်အသင်း၌ တစ်ရာသီကစားပြီး နောက် အနားယူခဲ့ခြင်းဖြစ်သည်။
