အာဆင်နယ်နည်းပြ အာတီတာက လီဗာပူးလ်နှင့်ပွဲတွင် ၎င်းတို့အသင်း၏ အကောင်းဆုံးပုံစံကို မြင်ရမည်ဟု ပြောကြားခဲ့သည်။

ပရီးမီးယားလိဂ်ပွဲစဉ် (၈) အပြီးတွင် အာဆင်နယ်အသင်းသည် ရမှတ် (၁၇)မှတ်ဖြင့် အဆင့် (၃)၌ ရပ်တည်နေပြီး အမှတ်ပေးဇယားထိပ်ဆုံးမှ လီဗာပူးလ်အသင်း(၂၁ မှတ်)နှင့် (၄) မှတ်ကွာဟနေသည်။

အာဆင်နယ်အသင်းသည် ပရီးမီးယားလိဂ်ပွဲစဉ် (၉)အဖြစ် လီဗာပူးလ်အသင်းကို အိမ်ကွင်းတွင် လက်ခံကစားရမည်ဖြစ်သည်။

အာတီတာက ''နိုင်ငံတကာပွဲအပြီးမှာ ကစားသမားတွေ ပင်ပန်းနေလို့ ဘုန်းမောက်နဲ့ပွဲမှာ ပေးဆပ်မှုကြီးမားခဲ့တာပါ။ အခုနားရက် (၄)ရက်ရထားပြီး တနင်္ဂနွေနေ့ပွဲမှာ ကျွန်တော်တို့ရဲ့အကောင်းဆုံးပုံစံကို မြင်ရမှာပါ''ဟု ပြောကြားခဲ့သည်။