ခေတ်ပေါ်ဘောလုံးကမ္ဘာထဲ ဘာပေရဲ့နာမည်လင်းပလာချိန်ကစလို့ မက်ဆီလို၊ စီရော်နယ်လ်ဒိုလို ဖြစ်လာမယ့်သူဆိုပြီး နိမိတ်ဖတ်ခံရတယ်။ အာစင်ဝင်းဂါးက မိုနာကိုမှာ ဘာပေကိုမြင်တော့ "မိုနာကိုအသင်းမှာ ပီလီလက်သစ် ရှိနေပြီ" ဆိုပြီး ဂုဏ်ယူစွာပြောဖူးတယ်။ တကယ်လည်း ဘာပေက ပီလီ ဆန်ခဲ့ပါတယ်။ ဆယ်ကျော်သက်အရွယ်မှာပဲ ပီလီလိုမျိုး ကမ္ဘာ့ဖလားဖိုင်နယ်ဂိုး ပိုင်ဆိုင်ခဲ့တယ်။ ၁၉၅၈ ကမ္ဘာ့ဖလားဖိုင်နယ်မှာ ဆယ်ကျော်သက် ပီလီ ဂိုးသွင်းပြီးနောက် နှစ်ပေါင်း (၆၀)အကြာ ၂၀၁၈ ကမ္ဘာ့ဖလားဖိုင်နယ်မှာ (၁၉) နှစ်အရွယ် ဘာပေက သွင်းဂိုးပိုင်ဆိုင်ခဲ့တာပါပဲ။ ၂၀၂၂ ကမ္ဘာ့ဖလားဖိုင်နယ်မှာလည်း ဘာပေရဲ့ ထူးချွန်မှုဟာ တိတ်ဆိတ်မနေခဲ့ဘူး။ ဟက်ထရစ် သွင်းပြီး မက်ဆီနဲ့အပြိုင် ဖျော်ဖြေခဲ့ပါတယ်။