ဂျပန်တို့၏ ကိုလိုနီအုပ်ချုပ်မှုအောက်မှ လွတ်မြောက်ခဲ့သည့် နှစ်ပတ်လည်နေ့ အထိမ်းအမှတ် အခမ်းအနား ကျင်းပစဉ်မြောက် ကိုရီးယားခေါင်းဆောင် ကင်ဂျုံအွန်က ရုရှားသမ္မတ ဗလာဒီမာပူတင်ထံ ပေးပို့ခဲ့သည့် သ ဝဏ်လွှာတွင် ရုရှားနှင့် ပူးပေါင်းဆောင်ရွက် မှုများကို ပိုမိုနက်ရှိုင်းစွာလုပ်ဆောင်မည်ဟု ထပ်လောင်းကတိပြုခဲ့ကြောင်း နိုင်ငံပိုင် KCNA သတင်းစာက သြဂုတ် ၁၆ ရက်တွင် ဖော်ပြခဲ့သည်။

သြဂုတ် ၁၅ ရက်တွင် ကျရောက်သည့် လွတ်လပ်ရေးနေ့ အထိမ်းအမှတ်နှစ်ပတ်လည်နေ့အတွက် ပူတင်က ဂုဏ်ပြုသဝဏ်လွှာပေးပို့မှုကို ကင်က သဝဏ်လွှာပြန်လည် ပေးပို့ခဲ့ခြင်းဖြစ်သည်။

“နှစ်နိုင်ငံပြည်သူအချင်းချင်းနဲ့ စစ်တပ်အချင်းချင်း ချစ်ကြည်ရင်းနှီးတဲ့ ခံစားမှုတွေဟာ ပိုမိုခိုင်မာလာခဲ့ပြီး ဘုံရန်သူကို အတူတကွ တွန်းလှန်တိုက်ပွဲဝင်မှုဟာ ချစ်ကြည်ရင်းနှီးတဲ့ ဆက်ဆံရေးနဲ့ ပူးပေါင်းဆောင်ရွက်မှု တွေကို ပြီးပြည့်စုံတဲ့ မဟာဗျူဟာမြောက် မိတ်ဖက်ဆက်ဆံရေးနဲ့ အနိုင်မခံအရှုံးမပေးတဲ့ ရဲဘော်ရဲဘက်စိတ်ဓာတ် ဖြစ်ထွန်းလာစေဖို့ ခိုင်မာတဲ့ တွန်းအားတစ်ခုဖြစ်တယ်”ဟု ကင်က ပြောကြားခဲ့သည်။

တစ်နှစ်နီးပါးအတွင်း ဒုတိယအကြိမ်အဖြစ် ယခုနှစ်ဇွန်လက ထိပ်သီးဆွေးနွေးပွဲ ပြုလုပ်စဉ်အတွင်း ကင်နှင့် ပူတင်တို့သည် အပြန်အလှန်ကာကွယ်ရေး သဘောတူညီချက် အပါအဝင် ဘက်ပေါင်းစုံ မဟာဗျူဟာမြောက် မိတ်ဖက်ဆက်ဆံရေးထူထောင်သည့် သဘောတူညီမှုတစ်ရပ်ကို လက်မှတ်ရေးထိုးခဲ့သည်။ ပူတင်သည် ၂၄ နှစ်အတွင်း ပထမဆုံးအ ကြိမ်အဖြစ် ပြုံယမ်းသို့ သွားရောက်ခဲ့ခြင်းဖြစ်သည်။

ဒုတိယကမ္ဘာစစ်အပြီး မြောက်ကိုရီးယား နိုင်ငံတည်ထောင်ပြီးကတည်းက မြောက်ကိုရီးယားနှင့် ရုရှားတို့သည် မဟာမိတ်များအဖြစ်ရပ်တည်ခဲ့ကြပြီး ၂၀၂၂ ခုနှစ်တွင် ယူကရိန်းကို ကျူးကျော်ပြီးနောက်ပိုင်း ကမ္ဘာ့နိုင်ငံရေး ဇာတ်ခုံတွင် အထီးကျန်လာသည့် ရုရှားသည် မြောက်ကိုရီးယားနှင့် ဆက်ဆံရေးပိုမိုရင်းနှီးလာခဲ့သည်။

ပူတင်သည် ကိုရီးယားလူမျိုးများ၏ အချစ်ခင်ရဆုံး မိတ်ဆွေဖြစ်သည်ဟု ကင်ကပြောကြားခဲ့ပြီး ယူကရိန်းစစ်ပွဲတွင် ရုရှားဘက်မှ အပြည့်အဝထောက်ခံမည်ဟုလည်း အခိုင်အမာကတိပြုခဲ့သည်။    

၁၉၁၀ မှ ၁၉၄၅ ခုနှစ်အထိ ဂျပန်တို့၏ ကိုလိုနီပြုသိမ်းပိုက်မှုကို အဆုံးသတ်စေရန်အတွက် တွန်းလှန်တိုက်ပွဲဝင်ခဲ့သည့် ကိုရီးယား တော်လှန်ရေးတပ်သားများကို အောက်မေ့ဂုဏ်ပြုသည့် အထိမ်းအမှတ် ဂူဗိမာန်နှင့် ဆိုဗီယက်တပ်နီတော်မှစစ်သားများကို အောက်မေ့ဂုဏ်ပြုသည့် လွတ်လပ်ရေးကျောက်တိုင်သို့ ကင်ဂျုံအွန် သွားရောက်ခဲ့သည်ဟု KCNA သတင်းဌာနက ဆိုသည်။

ဆိုဗီယက်ယူနီယံခေါင်းဆောင် ဂျိုးဆက် စတာလင်သည် ဒုတိယကမ္ဘာစစ်အဆုံး သတ်ခါနီးတွင် ဂျပန်တို့အား စစ်ကြေညာကာ လက်ရှိမြောက်ကိုရီးယားခေါင်းဆောင် ကင်ဂျုံအွန်၏ အဘိုးဖြစ်ပြီး မြောက်ကိုရီးယားနိုင်ငံ တည်ထောင်သူဖြစ်သည့် ကင်အီဆွန်းအား ကျောထောက်နောက်ခံပေးခဲ့သည်။

ဆိုဗီယက်တို့က ကင်အီဆွန်း၏ ကွန်မြူနစ်တပ်များကို ကျောထောက်နောက်ခံပေးခဲ့ပြီးနောက် ၁၉၄၈ ခုနှစ်တွင် ကိုရီးယားကျွန်းဆွယ် ဂျပန်လက်အောက်မှ လွတ်မြောက်ခဲ့ပြီး မြောက်ကိုရီးယားနိုင်ငံကို တည်ထောင်ခဲ့သည်။                            

Ref: Reuters