ဗီယက်နမ်သမ္မတ တိုလမ်သည် နိုင်ငံ၏ သြဇာအကြီးဆုံး ရာထူးဖြစ်သော အာဏာရ ကွန်မြူနစ်ပါတီ ခေါင်းဆောင်အဖြစ် သြဂုတ် ၃ ရက်က အတည်ပြုခန့်အပ်ခံခဲ့ရသည်။

ယင်းသို့ခန့်အပ်ခံရပြီးနောက် တိုလမ်ကကျယ်ပြန့်သော အဂတိလိုက်စားမှု တိုက်ဖျက်ရေး အစီအစဉ်ကို အရှိန်မြှင့်တင်မည်ဟု ကတိပြုပြောကြားခဲ့သည်။

သြဂုတ် ၃ ရက် နံနက်ပိုင်းတွင် ပြုလုပ်သည့် ကွန်မြူနစ်ပါတီ အစည်းအဝေး၌ တိုလမ်အား ပါတီ၏ အထွေထွေအတွင်းရေးမှူးအဖြစ် တင်မြှောက်ခဲ့သည့်အတွက် သူသည် ဗီယက်နမ်၏ ခေါင်းဆောင်ပိုင်းတွင် သြဇာအကြီးဆုံးပုဂ္ဂိုလ် ဖြစ်လာခဲ့သည်။

အရှိန်ပြင်းပြင်း တောက်လောင်နေသော မီးပြင်းဖိုဟုခေါ်တွင်သည့် အကျင့်ပျက်ခြစားမှု တိုက်ဖျက်ရေး အစီအစဉ်ကို ဦးဆောင်ခဲ့ပြီး ဆယ်စုနှစ်များအတွင်း ဗီယက်နမ်၏ သြဇာအကြီးဆုံး ခေါင်းဆောင်ဖြစ်သည့် ကွန်မြူနစ်ပါတီ အထွေထွေအတွင်းရေးမှူး ငုယင်ဖူကျောင့် ကွယ်လွန်ခဲ့ပြီး သီတင်းနှစ်ပတ်အကြာတွင် လမ်က ၎င်း၏အရိုက်အရာကို ဆက်ခံခဲ့ခြင်းဖြစ်သည်။

၁၉၈၆ ခုနှစ်က ဗီယက်နမ်တွင် စီးပွားရေးဆိုင်ရာ ဖြေလျှော့မှုများလုပ်ဆောင်ခဲ့ပြီး နောက်ပိုင်း ငုယင်ဖူကျောင့်သည် ပါတီခေါင်းဆောင်ရာထူးကို သက်တမ်းသုံးကြိမ်ဆက် တာဝန်ယူခွင့်ရခဲ့သည့် ပထမဆုံး ခေါင်းဆောင်ဖြစ်သည်။

ပါတီအထွေထွေ အတွင်းရေးမှူးအဖြစ် တင်မြှောက်ခံရပြီးနောက် ပထမဆုံးအကြိမ်မှတ်ချက်ပြုပြောဆိုရာတွင် လမ်ကထိပ်ပိုင်းအစိုးရအရာရှိကြီး အများအပြားနှင့် စီးပွားရေးနယ်ပယ်မှ အထင်ကရ ပုဂ္ဂိုလ်များကို ဖမ်း ဆီးအရေးယူခဲ့သည့် အဂတိလိုက်စားမှုတိုက် ဖျက်ရေးအစီအစဉ်ကို အရှိန်မြှင့်တင်မည်ဟု ကတိပြုခဲ့သည်။

“ဘယ်သူ့ဘယ်သူကိုမှ ငဲ့ကွက်နေမှာမ ဟုတ်ဘဲ အကျင့်ပျက်ခြစားမှု တိုက်ဖျက်ရေးကို အရှိန်အဟုန်မြှင့်ပြီး ဆက်လက်ဆောင်ရွက်သွားမှာဖြစ်တယ်” ဟု လမ်က သတင်းစာရှင်းလင်းပွဲ၌ ပြောကြားခဲ့သည်။

“မိမိတို့ရဲ့ ကြိုးပမ်းအားထုတ်မှုတွေအတွက် လူထုနဲ့ နိုင်ငံတကာက မိတ်ဆွေတွေရဲ့ ယုံကြည်မှုကို ရရှိထားတယ်” ဟု ၎င်းက ထပ်မံပြောကြားသည်။

ဗီယက်နမ်၏ ခေါင်းဆောင်ပိုင်း ဖွဲ့စည်းမှုပုံစံအရ ပါတီခေါင်းဆောင်သည် သြဇာအကြီးဆုံး ပုဂ္ဂိုလ်ဖြစ်ပြီး သမ္မတရာထူးမှာမူ ပြည်ပနိုင်ငံများမှ အကြီးအကဲများကို လက်ခံတွေ့ဆုံခြင်း အပါအဝင် နိုင်ငံတော်အခမ်းအနား များကိုဦးဆောင်ရသည့် အဆောင်အယောင်ရာထူးဖြစ်သည်။

အဂတိလိုက်စားမှုကို ကျယ်ကျယ်ပြန့်ပြန့် လုပ်ဆောင်မှုများအကြား သမ္မတဗိုဗန်သွန်း ရာထူးမှနုတ်ထွက်သွားပြီးနောက် လမ်သည် မေလထဲတွင် သမ္မတဖြစ်လာခဲ့သည်။ ၎င်းအနေဖြင့် သမ္မတရာထူးကိုပါ တစ်ပြိုင်နက်တည်း တာဝန်ယူမည်လောဆိုသည်ကိုမူ လတ်တလောတွင် ရှင်းရှင်းလင်းလင်း မသိရပေ။

တရုတ်သမ္မတ ရှီကျင်းပင်က ဗီယက်နမ်၏ သြဇာအကြီးဆုံး ခေါင်းဆောင်ရာထူးကို ရယူနိုင်ခဲ့သည့် လမ်အား ဂုဏ်ပြုသဝဏ်လွှာပေးပို့ခဲ့ကြောင်း တရုတ်နိုင်ငံပိုင် CCTV ရုပ်သံက ထုတ်လွှင့်ဖော်ပြခဲ့သည်။

၆၇ နှစ်အရွယ် လမ်သည် ၂၀၁၆ ခုနှစ်မှ သမ္မတမဖြစ်လာမီအချိန်ထိ ပြည်သူ့လုံခြုံရေး ဝန်ကြီးအဖြစ် တာဝန်ယူခဲ့သည်။ တစ်ပါတီစနစ် ကျင့်သုံးသည့် ဗီယက်နမ်တွင် ပြည်သူ့လုံခြုံရေးဝန်ကြီးဌာနသည် တက်ကြွလှုပ်ရှားသူများနှင့် အတိုက်အခံများကို မျက်ခြည်မပြတ် စောင့်ကြည့်ရသည်။

အဓိကအားဖြင့် အဂတိလိုက်စားမှုတိုက်ဖျက်ရေး အပါအဝင် ယခင်ခေါင်းဆောင် ငုယင်ဖူကျောင့်၏ အမွေအနှစ် မူဝါဒများကို ဆက်လက်ထိန်းသိမ်းကာ bamboo diplomacy ဟု လူသိများသော နိုင်ငံခြားရေးမူဝါဒကိုလည်း လက်တွေ့ကျကျ ချဉ်းကပ်မည်ဟု လမ်က ကတိပြုခဲ့သည်။          

Ref: AFP