ယခုရာသီကုန်တွင် ရီးယဲလ်အသင်းမှထွက်ခွာပြီး ယူရို ၂၀၂၄ ပြိုင်ပွဲအပြီးတွင် ကစားသမားဘဝမှ အနားယူမည့် ဂျာမန်ဝါရင့်ကွင်းလယ်ကစားသမား တိုနီကရို့စ်က ရီးယဲလ်အသင်းတွင် ၎င်း၏နေရာကို ဘယ်လင်ဟမ် ဆက်ခံနိုင်သည်ဟု မှတ်ချက်ပြုခဲ့သည်။
အသက် (၃၄) နှစ်အရွယ်ရှိ တိုနီကရို့စ်သည် ယခုရာသီတွင် စာချုပ်သက်တမ်းကုန်ဆုံးမည့် ရီးယဲလ်မက်ဒရစ်အသင်းနှင့် စာချုပ်သက်တမ်း ထပ်မတိုးတော့ဘဲ လမ်းခွဲကာ မွေးရပ်မြေ ဂျာမနီနိုင်ငံတွင် ကျင်းပမည့် ယူရို ၂၀၂၄ ပြိုင်ပွဲအပြီးတွင် ကစားသမားဘဝမှ အနားယူမည်ဟု မေလ (၂၁) ရက်တွင် ကြေညာခဲ့ခြင်းဖြစ်သည်။
ကစားသမားဘဝမှ အနားယူမည်ဟု ကြေညာခဲ့သည့် တိုနီကရို့စ်ကို ဘောလုံးသမားများစွာက ဆုမွန်ကောင်းများ တောင်းပေးခဲ့ကြပြီး ရီးယဲလ် အသင်းဖော် ဘယ်လင်ဟမ်ကလည်း ၎င်း၏ Post အောက်တွင် Comment ရေးခဲ့သည်။
ဘယ်လင်လမ်က "တစ်နှစ်တည်း တွဲကစားရတာ မလုံလောက်ပါဘူး။ ဘောလုံးပွဲစဉ်တွေအတွင်း ခင်ဗျားစွမ်းဆောင်ခဲ့တဲ့ အရာတွေအတွက် ကျေးဇူးတင်ပါတယ်။ ခင်ဗျား ကစားတာကို ပရိသတ်တစ်ယောက်အနေနဲ့ရော အသင်းဖော်တစ်ယောက်အနေနဲ့ပါ အရမ်းကို နှစ်သက်ပါတယ်"ဟု ရေးသားခဲ့သည်။
ဘယ်လင်ဟမ်၏ Comment ကို တိုနီကရို့စ်က "ကျေးဇူးတင်ပါတယ် သူငယ်ချင်း။ နှစ်တွေအကြာကြီး တွဲကစားရင် မတရားရာ ကျမှာပေါ့။ မင်းနဲ့တွဲကစားခဲ့တဲ့မိနစ်တိုင်းကို မြတ်နိုးပါတယ်။ မင်းက ကွင်းလယ်ကိုထိန်းဖို့ အသင့်ဖြစ်နေပါပြီ"ဟု Reply ပြန်ခဲ့သည်။
