"ခုတ်ရာတခြား ရှရာတခြား"၊ "ယုန်တောင်ပြေး ခွေးမြောက်လိုက်"၊ "မရောင်ရာ ဆီလူး"ဆိုတဲ့ မြန်မာစကားပုံတွေ ကြားဖူးမှာပါ။ အနာတခြား ဆေးတခြား ဖြစ်နေပုံကို ရည်ရွယ်ဆိုလိုတဲ့ စကားပုံတွေပါ။ ဘာကြောင့် အဲဒီလို အလွဲလွဲအချော်ချော် ဖြစ်နေရသလဲဆိုတာကို သေချာပြန်သုံးသပ်မယ်ဆိုရင် ပရော်ဖက်ရှင်နယ် မဟုတ်လို့ပါပဲ။ ပရော်ဖက်ရှင်နယ်ဆိုတာ ကျွမ်းကျင်ပိုင်နိုင်မှု၊ တိကျသေချာ​သေသပ်မှု၊ ပြီးပြည့်စုံအောင် အဆုံးသတ်နိုင်မှု၊ အောင်မြင်အောင်အကောင်အထည်ဖော်ဆောင်နိုင်မှု စတာတွေကို ရည်ညွှန်းပါတယ်။ ကျွန်တော်တို့ဟာ ကိုယ့်ပရော်ဖက်ရှင်နယ်မဟုတ်တဲ့ နယ်ပယ်တွေမှာ Hero သွားလုပ်ချင်လို့မရပါဘူး။ လက်သမားဆရာကို ဆေးကုခိုင်းပြီး ဆရာဝန်လုပ်ခိုင်းလို့မရသလိုပါပဲ။