မန္တလေးမြို့ အောင်မြေသာဇံမြို့နယ်၊ ၁၃ လမ်းနှင့် ၁၄ လမ်းကြား၊ ၈၀ လမ်းနှင့် ၈၁ လမ်းကြား ပြည်လုံးချမ်းသာ (တောင်တစ်လုံးဝင်း) ရှိ နေအိမ်တစ်အိမ်တွင် ယနေ့ (စက်တင်ဘာ ၆ ရက်) နံနက် ၁၁ နာရီကျော်ခန့်က လုယက်မှုတစ်ခု ဖြစ်ပွားခဲ့ကြောင်း သိရသည်။ဖြစ်စဉ်မှာ လုယက်ခံခဲ့ရသည့် နေအိမ်၌ ဒေါ်နီနီအောင်မှာ တစ်ဦးတည်းရှိနေစဉ် ယခင်က ယင်းနေအိမ်၌ အလုပ်လုပ်ခဲ့ဖူးသည့် အလုပ်သမားဟောင်း လူငယ်နှစ်ဦးမှ ဝင်ရောက်လုယက်ခဲ့ခြင်းဖြစ်ကြောင်းသိရသည်။
ထိုသို့ လုယက်ရာတွင် ရွှေ ၁၀ ကျပ်သားခန့်ရှိ ရွှေဆွဲကြိုးနှင့် ဖုန်းတို့ လုယက်ခံရပြီး ဆိုင်ကယ်ဖြင့် ထွက်ပြေးသွားကြောင်း ဒေါ်နီနီအောင်၏ အမဖြစ်သူက ပြောကြားသည်။အဆိုပါ လုယက်မှုတွင် လုယက်ခံရသူ ဒေါ်နီနီအောင်မှာ ဓားဖြင့် ထိုးခံရသောကြောင့် ဆေးရုံသို့ ပို့ထားရကြောင်း ကနဦး သတင်းများအရ သိရှိရပါသည်။
လက်ရှိတွင် လုယက်ခဲ့သူ နှစ်ဦးအား (ပ) ‎၁၇၃/၂၀၁၆ ပုဒ်မ ၃၉၄ ဖြင့် အမှုဖွင့်ထားပြီး အမြန်ဆုံးဖမ်းမိအောင် ဆောင်ရွက်နေကြောင်း အောင်မြေသာဇံမြို့နယ် အမှတ် ၄ ရဲစခန်းမှူး ရဲအုပ်မြတ်ကျော်သူက ပြောကြားသည်။