အမေရိကန်တွင် ဓာတ်ဆီလက်ကျန် မြင့်မားနေဖွယ်ရှိသောကြောင့် ရောင်းလိုအား ပိုလျှံနေသော ကမ္ဘာ့ရေနံဈေးကွက်ကို ပိုမိုဆိုးရွားစေခဲ့ပြီး ရေနံဈေးနှုန်းသည် ဖေဖော်ဝါရီ ၃ ရက်က အာရှတွင် တစ်စည်လျှင် ဒေါ်လာ ၃၀ အောက်သို့ ပြန်လည်ကျဆင်းခဲ့သည်။ ရုရှားနှင့် အိုပက်အဖွဲ့ဝင်နိုင်ငံများ က ရေနံထုတ်လုပ်မှု လျှော့ချရန် သဘောတူညီမှု ရရှိမည်ဟူသော မျှော်မှန်းချက်များကြောင့် ပြီးခဲ့သည့်တစ်ပတ်က ရေနံဈေးနှုန်း အနည်းငယ် ပြန်လည်မြင့်တက်ခဲ့သည်။ အမေရိကန် စွမ်းအင်ဌာနက အပတ်စဉ် ရေနံလက်ကျန်စာရင်းကို ဖေဖော်ဝါရီ ၃ ရက်တွင် ထုတ်ပြန်ခဲ့ရာ ရေနံဈေးနှုန်းကို အကျသို့ ဦးတည်စေခဲ့သည်။ ကမ္ဘာတွင် ရေနံသုံးစွဲမှု အများဆုံးနိုင်ငံတစ်နိုင်ငံဖြစ်သော အမေရိကန်တွင် ဝယ်လိုအား နှေးကွေးမှုကြောင့် မတ်လအတွက် ကြိုပေးဈေးကွက်တွင် ရေနံတစ်စည်လျှင် ၂၉ ဒသမ ၇ ဒေါ်လာသို့ ကျဆင်းခဲ့သည်။ အမေရိကန်ရေနံဈေးနှုန်း အညွှန်းကိန်း WTI သည် ဖေဖော်ဝါရီ ၂ ရက်က ၂၉ ဒသမ ၈၈ ဒေါ်လာဖြင့် ဈေးပိတ်ခဲ့ပြီး ဇန်နဝါ ရီ ၂၁ ရက် နောက်ပိုင်း တစ်စည်လျှင် ဒေါ်လာ ၃၀ အောက်သို့ ပထမဆုံးအကြိမ် ပြန်လည် ကျဆင်းခဲ့ခြင်းဖြစ်သည်။ ရုရှားက ဇန်နဝါရီလတွင် တစ်ရက်လျှင် ရေနံစည် ၁၈ ဒသမ ၉ သန်းခန့် ထုတ်လုပ်ခဲ့ကြောင်း ဖေဖော်ဝါရီ ၂ ရက်တွင် ကြေညာခဲ့သည်။ရုရှားသည် ရေနံထုတ်လုပ်မှုကို လျှော့ချဖွယ်ရှိပြီး အိုပက်နှင့် ပူးပေါင်းဆောင်ရွက်ရန် မျှော်လင့်ထားကြသော်လည်း အိုပက်က ထုတ်လုပ်မှု လျှော့ချရန်တောင်းဆိုချက်အား ဒီဇင်ဘာက ပယ်ချထားခဲ့သည်။ ဝယ်လိုအားနှေးကွေးမှု၊ ရောင်းလိုအား ပိုလျှံမှု၊ အလွန်အကျွံ ထုတ်လုပ်မှု၊ ကမ္ဘာ့စီးပွားရေးနှေးကွေးမှု၊ ဒေါ်လာတန်ဖိုး ခိုင်မာမှုတို့ကြောင့် ရေနံဈေးနှုန်းသည် ၂၀၁၄ ခုနှစ် နှစ်လယ်မှစပြီး ၇၅ ရာခိုင်နှုန်းခန့် ကျဆင်းခဲ့သည်။
