တူနီးရှားနိုင်ငံတွင် မငြိမ်သက်မှုများ ပြန်လည်ဖြစ်ပေါ်စေခဲ့သော သေဆုံးသွားသည့် တူနီးရှားဆန္ဒပြသူ၏ဖခင်က ၎င်း၏သားသည် လူထုတော်လှန်ရေးအပြီး ငါးနှစ်အတွင်း ဖြစ်ပွားခဲ့သော ခြစားမှုများနှင့် ကတိမတည်မှုများ၏ သားကောင်ဖြစ်သည်ဟု ဆိုခဲ့သည်။အာရပ်နွေဦးတော်လှန်ရေး စတင်ပေါက်ဖွားရာ တူနီးရှား၏ ဆင်းရဲမွဲတေသော နိုင်ငံအလယ်ပိုင်းမှ လမ်းမများပေါ်တွင် ဆန္ဒပြသူများ တစ်ဖန်ထွက်ပေါ်လာခဲ့ကြပြီး လုံခြုံရေးတပ်ဖွဲ့ဝင်များနှင့် တိုက်ခိုက်မှုများ ဖြစ်ပွားခဲ့ကာ လူရာနျှင့်ချီ၍ ဒဏ်ရာရခဲ့ကြသည်။ ၂၀၁၀ ပြည်နှစ် ဒီဇင်ဘာကလည်း နိုင်ငံအလယ်ပိုင်းရှိ မြို့တစ်မြို့မှပင် အလုပ်အကိုင်မရှိမှု၊ ရဲတပ်ဖွဲ့၏ နှောင့်ယှက်မှုများကို ဆန့်ကျင်ဆန္ဒပြမှု တစ်ခုအတွင်း လမ်းဘေးဈေးရောင်းသူတစ်ဦးသည် ကိုယ့်ကိုယ်ကိုယ် မီးရှို့အဆုံးစီရင်ခဲ့ရာမှ လူထုအုံကြွမှုကြီး စတင်ခဲ့ခြင်းဖြစ်သည်။ ယင်းမှတစ်ဆင့် နိုင်ငံကို ကာလရှည်ကြာ အုပ်ချုပ်ခဲ့သော အာဏာရှင် ဇင်အယ်အဘိုင်ဒင်ဘင်အလီကို ဖြုတ်ချနိုင်ခဲ့ပြီး ဒေသတွင်း၌လည်း တော်လှန်ရေးများ ဖြစ်ပေါ်လာစေရန် လှုံ့ဆော်ပေးခဲ့သည်။သက်တမ်းရှည် အာဏာရှင်ကြီးများကို ဖြုတ်ချနိုင်ခဲ့သည့် အခြားထင်ရှားသော တော်လှန်ရေးများဖြစ်ပွားခဲ့သည့် လစ်ဗျား၊ အီဂျစ်တို့နှင့် နှိုင်းယှဉ်လျှင် တူနီးရှားသည် အခြေအနေကောင်းမွန်ခဲ့သည်။ သို့သော် တူနီးရှား၏ အကူးအပြောင်းကာလသည် ဆင်းရဲမွဲတေမှု၊ အလုပ်လက်မဲ့ဖြစ်မှုနှင့်အတူ မြင့်တက်လာသော ဂျီဟတ်ခြိမ်းခြောက်မှုတို့၏ စမ်းသပ်ခြင်းကို ခံခဲ့ရသည်။ဇန်နဝါရီ ၁၆ ရက်က အလယ်ပိုင်းမြို့ ကက်ဆာရင်းတွင် အသက် ၂၈ နှစ်အရွယ် အလုပ်လက်မဲ့တစ်ဦးဖြစ်သည့် အော့မန်ယီဒါယူသည် အစိုးရ၏ အလုပ်ခေါ်စာရင်းတွင် ၎င်း၏အမည် ဖယ်ရှားခံရသဖြင့် ဓာတ်တိုင်ပေါ်တက်၍ ဆန္ဒပြခဲ့ရာ ဓာတ်လိုက်ပြီး သေဆုံးသွားခဲ့သည်။ “ကျွန်တော့်သားဟာ ခြစားမှု၊ ဘက်လိုက်မှု၊ ကတိမတည်မှုတွေရဲ့ သားကောင်တစ်ဦးပါ။ ခြစားမှုတွေသာ မရှိခဲ့ရင် သူနာမည်လည်း စာရင်းကဖယ်ထုတ်ခံရဦးမှာ မဟုတ်သလို သူလည်း အသက်ရှင်ဦးမှာပါ” ဟု အသက် ၆၅ နှစ်အရွယ် ဖခင်ဖြစ်သူက ပြောကြားခဲ့သည်။ဘင်အလီကို ဖြုတ်ချစဉ်က လူထုအုံကြွမှုအတွင်း သေဆုံးခဲ့သည့် လူပေါင်း ၃၃၈ ဦးကဲ့သို့ပင် ဖခင်ယီဒါယူက အီလက်ထရွန်မက်ကင်းနစ်ဖြင့် ဘွဲ့ရထားသော သူ၏သားကို အာဇာနည်တစ်ဦးအဖြစ် အာဏာပိုင်များက အသိအမှတ်ပြုပေးရန် လိုလားနေသည်။ “ကျွန်တော့်သား အသိအမှတ်အပြုမခံရရင် ကျွန်တော့်ရဲ့ တခြားမိသားစုဝင်တွေကိုပါ စတေးဖို့အဆင့်သင့်ပါပဲ” ဟု ယောကျ်ားလေး နောက်ထပ်ခြောက်ဦးနှင့် မိန်းကလေးနှစ်ဦးတို့၏ ဖခင်ဖြစ်သူယီဒါယူက ပြောကြားခဲ့သည်။ယီဒါယူ၏ သားအကြီးဆုံးဖြစ်သော မာရတ်ဇ်ကလည်း ညီဖြစ်သူ၏ ဓာတ်ပုံကိုင်ဆောင်ကာ ဆန္ဒပြခဲ့ပြီး အာဏာပိုင်များသည် လူငယ်များကို မူးယစ်ဆေး မှောင်ခိုသူနှင့် အကြမ်းဖက်သမားဘဝရောက်အောင် တွန်းပို့နေသည်ဟု စွပ်စွဲခဲ့သည်။ အိမ်နီးချင်း ဆီးရီးယားနှင့် လစ်ဗျားတို့တွင် ဂျီဟတ်အဖွဲ့များနှင့်အတူ သွားရောက်တိုက်ခိုက်နေသော တူနီးရှားနိုင်ငံသား ထောင်ပေါင်းများစွာကို သွယ်ဝိုက်၍ ပြောကြားခဲ့ခြင်းဖြစ်သည်။ပြီးခဲ့သည့် နှစ်များအတွင်း ရာနှင့်ချီသော ဆန္ဒပြအုပ်စုများကို ရဲများက မျက်ရည်ယိုဓာတ်ငွေ့များ၊ ရေပိုက်များဖြင့် နှိမ်နင်းခဲ့ရပြီး ဆန္ဒပြသူအချို့ကလည်း တာယာများကို မီးရှို့ခြင်း၊ ကျောက်ခဲများဖြင့် ပစ်ခြင်းများကို ပြုလုပ်ခဲ့ကြသည်။အဆိုပါ မငြိမ်သက်မှုများသည် မြို့တော်တူးနစ်အပါအဝင်နိုင်ငံ၏ ဒေသအများအပြားသို့ ပျံ့ နှံ့သွားခဲ့သည်။ တူးနစ်မြို့ရှိ ဆင်ခြေဖုံးရပ်ကွက်တွင်မူ ဈေးဆိုင်များကို မီးရှို့လုယက်မှုများပင် ဖြစ်ပေါ်ခဲ့ပြီး အစိုးရက နိုင်ငံတစ်ဝန်း ညမထွက်ရ အမိန့်ထုတ်ခဲ့သည်။ဇန်နဝါရီ ၂၀ ရက်က ဖီရီနာမြို့တွင် ဆန္ဒပြသူများအား ဖြိုခွင်းမှုတစ်ခုအတွင်း ရဲတစ်ဦးသေဆုံးခဲ့သည်ဟု ပြည်ထဲရေးဝန်ကြီးဌာနက ထုတ်ပြန်ခဲ့သည်။တူနီးရှားသည် မြင့်တက်လာသော ဂျီဟတ်ခြိမ်းခြောက်မှုများနှင့်လည်း ရင်ဆိုင်နေရသည်။ ပြီးခဲ့သည့်နှစ်က တူးနစ်မြို့ရှိ ဘာဒိုအမျိုးသားပြတိုက်နှင့် မြေထဲပင်လယ်မှ ဆောဆီအပန်းဖြေစခန်းတို့တွင် IS တို့၏လက်ချက်ဖြင့် အကြမ်း ဖက်တိုက်ခိုက်မှုများဖြစ်ပွားခဲ့ရာ လူ ၆၀ နီးပါးသေဆုံးခဲ့ရသည်။