ပေကျင်းမြို့ လမ်းမပေါ်က လူတွေဆုံးတဲ့ အရပ်သုံး ဘန်းစကားတွေနဲ့ ဟစ်ဟော့တေးသွား ဖန်တီးထားတဲ့ IN3 တေးဂီတအဖွဲ့ကို တရုတ်အဖွဲ့ကို တရုတ်အာဏာပိုင်တွေက ပိတ်ပစ်လိုက်ပါတယ်။ ဒီအဖွဲ့ဟာ တေးဂီတ အယ်ဘမ်တွေ ဆက်တိုက်လွှင့်ခဲ့တာ ယခုဆိုရင် အမှတ် ၁၇ ရောက်ခဲ့ပါပြီ။ပေကျင်းမြို့မှာ ဆယ်စုနှစ် တစ်ခုစာမျှ ရပ်တည်ခဲ့တဲ့ အဖွဲ့သား သုံးဦးကို တရုတ်အာဏာပိုင်တွေက ဖမ်းဆီးခဲ့ပြီးတဲ့နောက် ယဉ်ကျေးမှု ဝန်ကြီးဌာနက သူတို့ရေးဖွဲ့ သီဆိုထားတဲ့ တေးသီချင်းပုဒ်ရေ ၁၂၀ ကို အင်တာနက်ကနေ ထုတ်လွှင့်မှုကိုလည်း တားမြစ်လိုက်ပါတယ်။ ညစ်ညမ်းမှု၊ အကြမ်းဖက်မှု၊ ရာဇဝတ်မှုတွေ ပါဝင်နေသော တေးသီချင်းများသည် လူ့အဖွဲ့အစည်း၏ ကျင့်ဝတ်ဆိုင်ရာများကို ထိခိုက်စေတယ်ဆိုတဲ့ အကြောင်းပြချက်နဲ့ ပိတ်ပင်ခဲ့တာ ဖြစ်ပါတယ်။ရှီကျင်ပင်း လက်ထက်မှာ တရုတ်ပြည် ကွန်မြူနစ် ပါတီရဲ့ သြဇာတိက္ကမ ပိုကြီးမားလာပါတယ်။ အာဏာရ အစိုးရဟာ ကွန်မြူ နစ်ပါတီရဲ့ မူဝါဒဖြစ်တဲ့ စာပေနဲ့ အနုပညာဟာ ဆိုရှစ်လယ် စနစ်ကို အလုပ်အကျွေး ပြုရမယ်ဆိုတဲ့ မူဝါဒကို ကိုင်စွဲပြီး စာပေနဲ့ အနုပညာရပ်တွေကို ချုပ်ကိုင်ခဲ့တာ ဖြစ်ပါတယ်။IN3 အဖွဲ့ဟာ တရုတ်ကွန်မြူနစ် ပါတီကို ရှုတ်ချပြစ်တင်မှု၊ ဝေဖန်မှုတွေ မပြုရဆိုတာကို သိထားတာကြောင့် တိုက်ရိုက် မရည်ညွှန်းကြပါဘူး။ ဒါပေမဲ့ တရုတ် လူ့အဖွဲ့အစည်းကို ဝေဖန်တဲ့ တေးသီချင်းတွေ ရေးဖွဲ့ခဲ့ကြတာဟာ တရုတ်ကွန်မြူနစ် ပါတီအစိုးရကို ရည်ညွှန်းနေသလို ဖြစ်နေပါတယ်။ IN3 အဖွဲ့ဟာ လက်ရှိအချိန်မှာ အွန်လိုင်းအသုံးပြုမှု ပိတ်ပင်ထားတဲ့အတွက် ပြည်တွင်းမှာ သူတို့အဖွဲ့ရဲ့ တေးဂီတတွေကို ထုတ်လွှင့်ခွင့် မရတော့ပါဘူး။'ပေကျင်းရဲ့ ညနေခင်းများ' တေးသီချင်းဟာ တရုတ်အစိုးရ မကြိုက်နှစ်သက်တဲ့ စာရင်းထဲမှာ နံပါတ်သုံး နေရာက ပါဝင်နေပါတယ်။ ဒီသီချင်းက ပေကျင်းမြို့တော်ရဲ့ ညကိုဖွဲ့ဆိုထားတာ ဖြစ်ပါတယ်။ အရက်မူးပြီး ကားမောင်းနေတာ၊ မိန်းမပျိုတွေနောက် တကောက်ကောက် ပါအောင်လိုက်နေတာ၊ အရက်ဆိုင် ပိုင်ရှင်တွေနဲ့ အရက်သမားတွေ ဆူညံသောက်စား မူးယစ်နေတာတွေကို ရေးဖွဲ့ထားပါတယ်။ ဒါ့အပြင် ဆေးဝါးတွေ ဈေးကြီးနေတာ၊ ကျောင်းလခတွေ မြင့်တက်နေတာ၊ ကားကျပ်နေတာ၊ လူနေတိုက်ခန်းတွေရဲ့ တိုက်နံရံတွေ အရည်အသွေး မကောင်းတာကြောင့် တစ်ခန်းနဲ့တစ်ခန်း စကားပြောသံတွေ မကြားချင်ဘဲ ကြားနေရတာတွေကို  ဖွဲ့ဆိုထားတာကြောင့် သာယာဝပြောသော လူ့အဖွဲ့အစည်း တစ်ရပ်ကို တည်ဆောက်နေပါတယ်လို့ တဖွဖွကြွေးကြော်နေတဲ့ အာဏာပိုင်တွေ အတွက်တော့ လက်ခံနိုင်စရာ မရှိပါဘူး။'လူတချို့ဆိုရင် မြေအောက်ရထားဘူတာရုံ ပလက်ဖောင်းမှာ အိပ်နေကြရတယ်။ အဲဒီအချိန်မှာ လူတချို့က အစိုးရ ငွေကြေးတွေကို ဝါးမျိုနေကြတယ်' လို့ IN3 အဖွဲ့သားတွေက အစိုးရအဖွဲ့ထဲမှာ အကျင့်ပျက် ခြစားမှုတွေကို ရည်ညွှန်းပြီး တေးသီချင်းအဖြစ် သီဆိုခဲ့ကြပါတယ်။အမည်းရောင် ဟစ်ဟော့ဦးထုပ်ဆောင်းထားတဲ့ IN3 အဖွဲ့ဝင် တစ်ဦးဖြစ်တဲ့ ကျိဝေက ကျွန်တော်တို့က လူ့အဖွဲ့အစည်းကို ဝေဖန်ရုံတင်မကဘူး လူ့အဖွဲ့အစည်း တိုးတက်စေချင်တဲ့ စိတ်ရှိပါတယ်လို့ ထုတ်ဖော် ပြောကြားခဲ့ပါတယ်။ တရုတ်အာဏာပိုင်တွေက ဘယ်လောက်ပဲ နိုပ်ကွပ်နေပါစေ မိမိအနေနဲ့ ဟစ်ဟော့တေးဂီတကို စွန့်လွှတ်မှာ မဟုတ်ဘူးလို့ သူက ပြောကြားခဲ့ပါတယ်။တရုတ်နိုင်ငံမှ အဓိက ပြဿနာတစ်ခုဖြစ်တဲ့ တင်းကျပ်တဲ့ ပညာရေး စနစ်ကိုလည်း IN3 က ပြင်းထန်တဲ့ စကားလုံးတွေနဲ့ ဝေဖန်ခဲ့ပါတယ်။ ပညာရေးနဲ့ ပတ်သက်ပြီး ရေးဖွဲ့သီဆိုထားတဲ့ သီချင်းအမည်က 'ဟဲလို ဆရာမ' ဖြစ်ပါတယ်။ ဒီသီချင်းဟာလည်း အာဏာပိုင်တွေ မျက်စိဆံပင်မွေးစူးစေတဲ့ သီချင်းတစ်ပုဒ် ဖြစ်ခဲ့ပါတယ်။IN3 အဖွဲ့ဝင် တစ်ဦးဖြစ်တဲ့ ကျန်ဟောင်ရန်ဟာ တရုတ်နိုင်ငံရှိ နာမည်ကျော် တေးဂီတကျောင်းမှာ ကလဲနက်လေမှုတ် တူရိယာ ဘာသာရပ်ကို သင်ယူခဲ့သူတစ်ဦး ဖြစ်ပါတယ်။ ၂၀၀၈ ခုနှစ် ပေကျင်းအိုလံပစ်ပွဲတော် ကျင်းပချိန်မှာ ပြည်တွင်းရုပ်သံ အဖွဲ့တစ်ဖွဲ့က IN3 အဖွဲ့ရဲ့ ရပ်စာသား သီချင်းတွေကို ရုပ်သံ ရိုက်ကူးခဲ့ပါတယ်။ 'ပေကျင်းဟာ မွေးရပ်မြေ၊ နိုင်ငံခြားသားတွေ ပေကျင်း မြို့သားတွေလို့ ပြောနိုင်ကြတယ်' အဲဒီအချိန်တုန်းက အာဏာပိုင်တွေက မသိကျိုးကျွန် ပြုထားပါတယ်။ ၂၀၀၉ မှာ အစိုးရပိုင် သတင်းစာတွေက ချီးကျူးမှုတွေ ပြုခဲ့ကြပါတယ်။ဒါပေမဲ့ သူတို့ဟာ လွတ်လပ်စွာ ထုတ်ဖော်ပြသမှု မရပါဘူး။ နောက်ပိုင်းတွေမှာ သူတို့အဖွဲ့ ဖျော်ဖြေပွဲတွေကို ကန့်သတ်ချုပ်ချယ်မှုတွေ ပြုလာခဲ့ပါတယ်။၂၀၁၄ ခုနှစ်မှာတော့ တရုတ်ကွန်မြူ နစ်ပါတီ ခေါင်းဆောင်လည်းဖြစ်၊ သမ္မတလည်းဖြစ်တဲ့ ရှီကျင်ပင်းက အနုပညာရှင်များသည် ရုန့်ရင်းကြမ်းတမ်းသော အနုပညာ မမြောက်သြာ လက်ရာများ အသုံးပြုနေပြီး လူကြိုက်များအောင် မလုပ်သင့်ဘူးလို့ ပြောကြားခဲ့ပါတယ်။'အနုပညာနဲ့ ယဉ်ကျေးမှုဟာ အပြုသဘောဆောင်တဲ့ စွမ်းအားဖြစ်တယ်' ဆိုတဲ့ မော်စီတုန်း စကားကို ရေရွတ်ပြီး အနုပညာဟာ ပြည်သူလူထု အလုပ်အကျွေး ပြုရမယ်ဆိုတဲ့ အယူအဆဟောင်းကို ပြန်လည် အသက်သွင်းခဲ့ပါတယ်။
ပေကျင်းကနေ ၁၈၆၅ မိုင်ဝေးတဲ့ ယူနန်ပြည်နယ်ကို တိမ်းရှောင်ခဲ့တဲ့ IN3 အဖွဲ့သားတွေဟာ လေယာဉ်ပေါ်မှာ ဆင်းသက်ပြီး မိနစ်ပိုင်း အတွင်းမှာပဲ ရဲတပ်ဖွဲ့က ဖမ်းဆီးလိုက်ပါတယ်။ IN3 တွေဟာ မူးယစ်ဆေးဝါးမှုနဲ့ ပတ်သက်လို့ ဖမ်းဆီးခြင်းဖြစ်ကြောင်း ရဲတပ်ဖွဲ့က ပြောကြားခဲ့ပါတယ်။ ပေကျင်းအာဏာပိုင်တွေက ထင်ရှားကျော်ကြားသော အနုပညာရှင်တွေကို မူးယစ်ဆေးဝါးမှု အကြောင်းပြပြီး အရေးယူမှုတွေ ပြုလုပ်နေပါတယ်။ ၂၀၁၅ ဇန်နဝါရီကပဲ ဂျက်ကီချန်းရဲ့ သားဟာ မူးယစ်ဆေးဝါးမှုနဲ့ ထောင်ဒဏ် ခြောက်လ ကျခံခဲ့ဖူးပါတယ်။
ကျိဝေကို တစ်ပတ်အကြာမှာ ပြန်လွှတ်ပေးလိုက်ပါတယ်။ မူးယစ်ဆေးဝါးသုံးစွဲမှု မရှိပေမယ့် သူတို့ရဲ့ တေးဂီတကို အာဏာပိုင်တွေက မုန်းတီးနေတာကြောင့် သြဂုတ်လမှာပဲ အနုပညာ ဖန်တီးခွင့်ကို ပိတ်ပင်လိုက်ပါတယ်။ပေကျင်းမြို့မှာ ကျင်းပတဲ့ ပေါ်ပြူလာ တေးဂီတ ယှဉ်ပြိုင်ပွဲတွေ အားလုံးကို တရုတ် အာဏာပိုင်တွေက တစ်စုံတစ်ရာ အကြောင်းပြချက်မရှိဘဲ ရပ်ဆိုင်းထားပါတယ်။ ခုချိန်မှာတော့ ပေကျင်းဟာ တေးဂီတအတွက် အလားအလာကောင်းတွေ မရှိပါဘူးလို့ ကျိဝေက မှတ်ချက်ချခဲ့ပါတယ်။ရှီကျင်ပင်း အာဏာရပြီးတဲ့ နောက်ပိုင်းမှာ တရုတ်ကွန်မြူနစ်ပါတီ သြဇာကြီးထွားလာမှုနဲ့အတူ စာပေယဉ်ကျေးမှုနဲ့ အနုပညာဟာ ပြည်သူလူထုကို အလုပ်အကျွေး ပြုရမယ်၊ ပြည်သူအတွက် ဖြစ်ရမယ်ဆိုတဲ့ အယူအဆ ပြန်လည် အားကောင်းလာတာကြောင့် အစိုးရရဲ့အကျင့်ပျက် ခြစားမှုများ၊ မတရား ဖိနှိပ်မှုများကို ဆန့်ကျင်နေတဲ့ လူ့အခွင့်အရေး လှုပ်ရှားမှုများ၊ တက်ကြွလှုပ်ရှားသူများနဲ့ အနုပညာရှင်များဟာ ဖိနှိပ်မှုတွေ ပိုခံစားနေရပါတယ်။