ဒုက္ခသည်များနှင့် ပတ်သက်၍ ထားရှိသော လစ်ဘရယ် သဘောထားကြောင့် ပါတီတွင်း ပုန်ကန်မှု ဖြစ်ခဲ့ရပြီး ပါရီ အစုအပြုံလိုက် သတ်မှုကြောင့် စိုးရွံ့မှုများ ပေါ်ပေါက်နေချိန်၌ ဂျာမန် ဝန်ကြီးချုပ် အင်ဂျလာမာကယ်သည် နိုဝင်ဘာ ၂၂ ရက်တွင် အာဏာ ရရှိသည့် သက်တမ်း ဆယ်စုနှစ် တစ်ခု ပြည့်သွားခဲ့ပြီ ဖြစ်သည်။သံကန့်လန့်ကာ နောက်ကွယ်တွင် ကြီးပြင်းခဲ့ပြီး ပရိုတက်စတင့် သင်းအုပ်ဆရာ၏ သမီးဖြစ်သူ မာကယ်သည် ဂျာမနီ ဝန်ကြီးချုပ် ဖြစ်လာရန် မကြုံစဖူး ခက်ခဲသော ခရီးကို လှမ်းခဲ့ရသူ ဖြစ်သည်။ နှစ်ကြိမ် အိမ်ထောင်ကျဖူးပြီး သားသမီးမရှိသော အသက် ၆၁ နှစ်အရွယ် မာကယ်အတွက် ရွှေ့ပြောင်းအခြေချ အကျပ်အတည်းသည် သူ၏နိုင်ငံရေး ဘဝကို အဆုံးအဖြတ် ပေးမည်ဖြစ်သည်။မာကယ်သည် ဘာလင် တိုက်ခန်းတွင် နေထိုင်ပြီး ဝင့်ဝါခြင်းမရှိဘဲ ပါဝါ၏ ပိတ်လှောင်ထားမှုလည်း ခံနေရဖွယ် မရှိပေ။ သူ၏ ခင်ပွန်း သိပ္ပံပညာရှင် ယိုအားဟင်ဆော်အာကိုလည်း မြင်တွေ့ရခဲသည်။ မာကယ်သည် အနီးရှိ စူပါမားကက်တွင်သာ ဈေးဝယ်လေ့ရှိပြီး အဲ့ပ်တောင်တန်းတွင် အားလပ်ရက် အပန်းဖြေရက်များကို ကုန်ဆုံးစေသူ ဖြစ်သည်။ဂျာမန် မဲဆန္ဒရှင်များက မာကယ်ကို “အမေ” ဟု ခေါ်ဝေါ်ကြပြီး သြဇာကြီးမားမှုထက် ထူးခြားမှု မရှိသည့် သူ၏အသွင်အပြင်ကို ပိုနှစ်သက်ကြသည်။ သို့သော်လည်း အဓိကကျသော အချိန်များတွင် မာကယ်သည် ရဲတင်းစွာ ဆောင်ရွက်လေ့ ရှိသည်။ ၂၀၁၁ ခုနှစ်တွင် ဂျပန်၏ ဖူကူရှီးမား သဘာဝဘေး အန္တရာယ် ဖြစ်ရပ်ဆိုးပြီးနောက် ဂျာမနီတွင် နျူကလီးယား စွမ်းအင်ကို ဖျက်သိမ်းရန် မာကယ်က ဆုံးဖြတ်ခဲ့သည်။ ထို့အပြင် ရွှေ့ပြောင်း အခြေချ ခိုလှုံသူများ အကျပ်အတည်းတွင်လည်း မာကယ်က စစ်ပွဲနှင့် ဖိနှိပ်မှုများမှ ထွက်ပြေးလာသူများအတွက် ဂျာမနီ၏ တံခါးများကို ဖွင့်ပေးခဲ့သည်။လူထုက ဆန့်ကျင်မှု တိုးပွားလာနေသော်လည်း မာကယ်သည် ဆန့်ကျင် ရပ်တည်နေဆဲဖြစ်ပြီး ရွှေ့ပြောင်း အခြေချများသည် လုံခြုံရေးခြိမ်းခြောက်မှုဟု ဝေဖန်မှုများအား ပယ်ချခဲ့သည်။“ကျွန်မတို့က အကြမ်းဖက်မှုထက် ပိုပြီး အားကောင်းပါတယ်” ဟု မာကယ်က တူရကီ၌ ကျင်းပခဲ့သည့် ဂျီ၂၀ ထိပ်သီးတွင် ပြောကြားခဲ့ပြီး အကြမ်းဖက်မှုအား နှိမ်နင်းရန် ဂျာမနီက အပြည့်အ၀ ထောက်ခံမည်ဟု ကတိပြုခဲ့သည်။ဂျာမနီ စီးပွားရေး တောင့်တင်းမှု၊ ကမ္ဘာ့ အကျပ်အတည်း စီမံခန့်ခွဲမှု၌ အဓိက အခန်းကဏ္ဍမှ ပါဝင်မှုတို့ကြောင့် မာကယ်သည် ယခုလအတွင်း ထုတ်ပြန်ခဲ့သော Forbes မဂ္ဂဇင်း၏ ကမ္ဘာ့အင်အားအကြီးဆုံး ပုဂ္ဂိုလ်များစာရင်းတွင် အမေရိကန် သမ္မတ ဘာရက်အိုဘားမားအား ကျော်တက်ပြီး ရုရှားသမ္မတ ဗလာဒီမာပူတင်၏ နောက်တွင် ရပ်တည်၍ ဒုတိယနေရာ၌ ရပ်တည်ခဲ့သည်။ မာကယ်သည် ဥရောပသမဂ္ဂတွင် သက်တမ်းအရှည်ဆုံး ခေါင်းဆောင်လည်း ဖြစ်သည်။သို့သော်လည်း နယ်စပ်ကို ဖွင့်ပေးရန် မာကယ်က စက်တင်ဘာလတွင် ဆုံးဖြတ်ခဲ့မှုကြောင့် ယခုတစ်နှစ်တည်းမှာပင် ဂျာမနီသို့ ပြောင်းရွှေ့ခိုလှုံသူ တစ်သန်း ရောက်ရှိလာနိုင်မှုက ပြည်တွင်းတွင် မာကယ်အား ထောက်ခံမှု လျော့ပါးလာစေခဲ့သည်။မာကယ်ကို ၁၉၅၄ ခုနှစ်တွင် ဟမ်းဘတ်မြို့၌ မွေးဖွားခဲ့သည်။ မာကယ်ကို မွေးဖွားပြီးနောက် ရက်သတ္တပတ် အနည်းငယ်အတွင်း ဖခင်ဖြစ်သူ သင်းအုပ်ဆရာသည် ကွန်မြူနစ် အရှေ့ဂျာမနီရှိ မြို့တစ်မြို့သို့ ပြောင်းရွှေ့ အခြေချခဲ့သည်။ တင်းကျပ်သည့် အုပ်ချုပ်မှုအောက်တွင် နေထိုင်ခဲ့ရသော ဘဝက မာကယ်၏ အစစ်အမှန် အတွေးအခေါ်များနှင့် ရည်ရွယ်ချက်များကို ဖုံးကွယ်တတ်ရန် သင်ကြားပေးခဲ့ကြောင်း အတ္ထုပ္ပတ္တိ ရေးသားသူများက ပြောကြားခဲ့သည်။စာတော်သော ကျောင်းသူတစ်ဦးဖြစ်သည့် မာကယ်သည် ရုရှားဘာသာကို ကျွမ်းကျင်သူဖြစ်ပြီး ယူကရိန်း အကျပ်အတည်းတွင် သမ္မတ ဗလာဒီမာပူတင်နှင့် ဆွေးနွေးရာ၌ ယင်းကျွမ်းကျင်မှုကို အသုံးချနိုင်ခဲ့သည်။ မာကယ်သည် ကွမ်တမ် ဓာတုဗေဒတွင် ဒေါက်တာဘွဲ့ ရထားသူဖြစ်ပြီး ဘာလင်တံတိုင်း ပြိုကျချိန်က ဓာတ်ခွဲခန်း တစ်ခုတွင် အလုပ်လုပ်ကိုင် နေခဲ့သည်။ သို့သော်လည်း မာကယ်သည် ဒီမိုကရက်တစ် အဖွဲ့သစ် Democratic Awakeing သို့ ပူးပေါင်းပါဝင်ခဲ့ပြီး နောက်ပိုင်းတွင် ယင်းအဖွဲ့သည် ဂျာမနီ ဝန်ကြီးချုပ် ဟဲမုခိုး ဦးဆောင်သော Christian Democrats နှင့် ပူးပေါင်းခဲ့သည်။ဟဲမုခိုးက မာကယ်ကို “မိန်းကလေး” ဟု အမည်ပေးခဲ့ပြီး အထက်စီးမှ ဆက်ဆံခဲ့သည်။ ၁၉၉၉ ခုနှစ်တွင် ရွေးကောက်ပွဲ ဘဏ္ဍာရေး အရှုပ်တော်ပုံကြောင့် ဟဲမုခိုး အကျပ်အတည်း ကြုံချိန်တွင် မာကယ်က “သက်ကြီးရွယ်အို စစ်မြင်း” ဖြစ်နေသည့် ဟဲမုခိုးကို ထောက်ခံမှု ရုပ်သိမ်းရန် သူ၏ပါတီကို တိုက်တွန်းခဲ့သည်။ သူ၏ ရဲတင်းသော ဆောင်ရွက်ချက်ကြောင့် မာကယ်သည် တစ်ရှိန်တိုး မြင့်တက်သွားခဲ့ပြီး ဂျာမနီ၏ အသက်အငယ်ဆုံးသော ဝန်ကြီးချုပ်ထိ ဖြစ်သွားခဲ့သည်။ ၂၀၀၅ ခုနှစ် နိုဝင်ဘာတွင် မာကယ်သည် ဂျာမနီ၏ ပထမဆုံး အမျိုးသမီးဝန်ကြီးချုပ် ဖြစ်လာခဲ့သည်။သက်ကြီးရွယ်အို များပြားလာသော်လည်း ချမ်းသာကြွယ်ဝဆဲ ဂျာမနီတွင် မာကယ်ကို တည်ငြိမ်မှု ကျောက်ဆောင်အဖြစ် ရှုမြင်ကြသည်။ မဲဆန္ဒရှင်များက မာကယ်ကို ရွေးကောက်ပွဲ သုံးကြိမ် အောင်နိုင်စေခဲ့ပြီး ဂျာမနီ၏ လူကြိုက် အများဆုံး နိုင်ငံရေးသမားအဖြစ် နှစ်ပေါင်းများစွာ ရပ်တည်နိုင် စေခဲ့သည်။ ရွှေ့ပြောင်း အခြေချများကို တံခါးဖွင့်ပေးခဲ့ပြီးနောက် အဝေဖန် ခံလာရသော မာကယ်အတွက် အာဏာသက်တမ်း ၁၀ နှစ် ပြည့်ချိန်တွင် အကြီးမားဆုံး စိန်ခေါ်မှုကို ကြုံတွေ့နေပြီ ဖြစ်သည်။သြဇာကြီးမားသော Die Zeit သတင်းစာက ရွှေ့ပြောင်းအခြေချ အကျပ်အတည်းသည် မာကယ်ခေတ် နိဂုံး၏ နိဒါန်းဖြစ်ကြောင်း ရေးသားခဲ့ပြီး Die Spiegel မဂ္ဂဇင်းက မာကယ်သည် ပို၍ အထီးကျန်လာနေကြောင်း ဖော်ပြခဲ့သည်။၂၀၀၅ ခုနှစ်တွင် မာကယ်ကို ရှုံးနိမ့်ခဲ့သော ဂါဟတ်ရှရိုးဒါးက မာကယ်သည် နှလုံးသားရှိသော်လည်း အစီအစဉ် မရှိဟု သုံးသပ်ခဲ့သည်။လူထုစစ်တမ်းများတွင် မာကယ်၏ CDU-CSU မဟာမိတ်တို့သည် အရေးနိမ့်လာနေကြောင်း ဖော်ပြနေပြီး ၂၀၁၃ ခုနှစ် ရွေးကောက်ပွဲတွင် ထောက်ခံမှု ၄၁ ဒသမ ၅ ရာခိုင်နှုန်း ရှိခဲ့ရာမှ ယခုအခါ ၃၄ ရာခိုင်နှုန်းသာ ရှိကြောင်း ဖော်ပြထားကြသည်။အစိုးရ အဖွဲ့တွင်းမှ သြဇာကြီး ရာထူးများ ဖြစ်ကြသည့် ပြည်ထဲရေးဝန်ကြီး သောမတ်ဒီမတ်ဇီရီးယားနှင့် ဘဏ္ဍာရေးဝန်ကြီး ဝုဖ်ဂန်းရှားအူဘဲတို့က မာကယ်နှင့် အကြိမ်ကြိမ် သဘောထား ကွဲလွဲခဲ့ပြီး ခပ်ခွာခွာ ရပ်တည်ခဲ့ကြသည်။မာကယ်သည် မကြာသေးမီက ဒုက္ခသည်များဆိုင်ရာ မူဝါဒအား တင်းကျပ်ခဲ့ပြီး နယ်စပ်ကိုလည်း ထိန်းချုပ်ခဲ့သည်။ သို့သော်လည်း သဘောထား တင်းမာသူများက ပါရီ တိုက်ခိုက်မှုကြောင့် ထိတ်လန့်မှုအား အကြောင်းပြု၍ ပိုမိုတင်းကျပ်သော မူဝါဒများ ချမှတ်ရန် တောင်းဆိုခဲ့သည်။မာကယ်သည် အတိုက်အခံတို့၏ လူကြိုက်အများဆုံးသော အနေအထားများကို ရွေးချယ်လက်ခံ၍ အလွန်လက်တွေ့ကျခဲ့မှုအတွက် ဂုဏ်သတင်း ကြီးခဲ့သူဖြစ်သည်။ လူမှုရေး ပညာရှင် အူးရစ်ဘက်က ယင်းချဉ်းကပ်မှုအား “Merkiavellism” ဟု အမည်တပ်ခဲ့ပြီး ထိုလမ်းစဉ်က မာကယ်အား စံချိန်တင် လူကြိုက်များစေခဲ့သည်။“သူက တရားဝင်ဖြစ်ပြီး လက်ခံနိုင်တဲ့ ရွေးချယ်မှုက တစ်ခုတည်း ရှိတယ်လို့ ယုံကြည် လက်ခံထားတဲ့ ပုဂ္ဂိုလ်တစ်ယောက်ပါ။ သူ့မှာ ဘာလင်တံတိုင်းနဲ့ ပတ်သက်တဲ့ ပုဂ္ဂိုလ်ရေး ခံစားမှုတွေ ရှိကောင်း ရှိနိုင်ပါတယ်။ ပြီးတော့ ဒီအကျပ်အတည်းက သူရင်ဆိုင်ရမယ့် စိန်ခေါ်မှုပါ” ဟု ဝါရှင်တန် အခြေစိုက် ဘရွတ်ကင်း သိပ္ပံမှ ဂျာမန် ကျွန်းကျင်သူ ကွန်စတန်ဇီစတယ်ဇန်မူလာက ပြောကြားခဲ့သည်။မာကယ်သည် မကြာခင် နိုင်ငံရေးဘ၀ ပြိုကျမှုနှင့် ရင်ဆိုင်ရနိုင်သည်ဟူသော ခန့်မှန်းချက်များကို လေ့လာ သုံးသပ်သူများက ပယ်ချထားပြီး မာကယ်တွင် ကွန်ဆာဗေးတစ် ဆက်ခံသူ မရှိကြောင်း၊ သူ၏ အစိုးရအဖွဲ့အတွင်းမှ အငယ်တန်း မိတ်ဖက်များကလည်း မာကယ်၏ အားနည်းချက်ကို အသုံးချနိုင်ခြင်း မရှိကြောင်း ပြောကြားခဲ့ကြသည်။ ယူရိုဇုန် ကြေးွမြီအကျပ်အတည်းတွင် မာကယ်၏ မူဝါဒကို ပြင်းပြင်းထန်ထန် ဝေဖန်ခဲ့သော အတွေးအခေါ် ပညာရှင် ဂျူအာဂန်ဟာဘဲမားက ဒုက္ခသည်များအပေါ် မာကယ်၏ ရပ်တည်မှုနှင့် ပတ်သက်ပြီး ရှားရှားပါးပါး ချီးကျူးခဲ့သည်။ သမိုင်း ပညာရှင် ပေါနော်တီက မာကယ်ကို ထောက်ခံမှုများသည် ခိုင်ခိုင်မာမာ ရှိနေဆဲဖြစ်ပြီး မီဒီယာများတွင် ဖော်ပြသည်ထက် ကျယ်ပြန့်သော ထောက်ခံမှုကို ရရှိထားကြောင်း ပြောကြားခဲ့သည်။“သူ့မှာ အဖွဲ့တွင်း အတိုက်အခံ ရှိပေမယ့် ထောက်ခံမှုတွေကို ကျယ်ကျယ်ပြန့်ပြန့် ရရှိထားပါတယ်။ အထူးသဖြင့် လက်ဝဲ အရပ်ဘက် လူမှုအဖွဲ့အစည်းမှာ သူ့ကို ထောက်ခံကြပါတယ်” ဟု ပေါနော်တီက ပြောကြားခဲ့သည်။