ပြန်ကြားရေးဝန်ကြီးဌာနမှ တရားလိုပြုလုပ်၍ သတင်းမီဒီယာဥပဒေပုဒ်မ ၂၅(ခ)ဖြင့် တရားစွဲခံထားရသည့် မြန်မာသံတော်ဆင့်ဂျာနယ် ထုတ်ဝေသူမှ ဖြန့်ချိရေးအထိ ၁၁ ဦးအနက် နှစ်ဦးအား နေပြည်တော်၊ ပုဗ္ဗသီရိမြို့နယ် တရားသူကြီးဦးခင်ဝင်းက ဇူလိုင် ၂၁ ရက်တွင် အမြင့်ဆုံးပြစ်ဒဏ်ဖြစ်သည့် ငွေဒဏ်ကျပ် ၁၀ သိန်းစီပေးဆောင်ရန် အမိန့်ချမှတ်ခဲ့ကြောင်း သိရသည်။သတင်းမီဒီယာဥပဒေပုဒ်မ ၂၅ (ခ)ဖြင့် တရားစွဲခံထားရသည့် မြန်မာသံတော်ဆင့်ဂျာနယ်၏ ထုတ်ဝေသူမှ ဖြန့်ချိရေးအထိ ၁၁ ဦးအနက် အယ်ဒီတာချုပ် ကိုကျော်စွာဝင်းနှင့် ဒုတိယအယ်ဒီတာချုပ် ကိုအံ့ခေါင်မင်းတို့နှစ်ဦးအား ပုဗ္ဗသီရိမြို့နယ် တရားသူကြီးဦးခင်ဝင်းက အမြင့်ဆုံးငွေဒဏ် ၁၀ သိန်းအားချမှတ်ခဲ့ပြီး အဆိုပါငွေဒဏ်ပေးဆောင်နိုင်ခြင်းမရှိပါက အလုပ်မဲ့ထောင်ဒဏ်ခြောက်လအထိ ကျခံစေရန် အမိန့်ချမှတ်ခဲ့ကြောင်း သိရသည်။သမ္မတ၏ဂုဏ်သိက္ခာထိခိုက်စေသည်ဟုဆိုကာ မြန်မာသံတော်ဆင့်ဂျာနယ် ထုတ်ဝေသူမှ ဖြန့်ချိရေးအထိ ၁၁ ဦးအား ၂၀၁၄ ခုနှစ် နိုဝင်ဘာ ၁၄ ရက် ပုဗ္ဗသီရိမြို့နယ်တရားရုံးတွင် ပထမဆုံးအကြိမ်အဖြစ် စတင်စစ်ဆေးခဲ့ပြီး ၂၀၁၅ ခုနှစ် ဇူလိုင် ၇ ရက်တွင် နောက်ဆုံးတရားခံပြသက်သေအဖြစ် ဒေါ်ညိုညိုသင်းအား စစ်ဆေးခဲ့ပြီး ဇူလိုင် ၂၁ ရက် (၁၉) ကြိမ်မြောက်ရုံးချိန်းတွင် အမြင့်ဆုံးပြစ်ဒဏ်အဖြစ် ငွေဒဏ် ၁၀ သိန်း အမိန့်ချမှတ်ခဲ့ခြင်းဖြစ်သည်။၂၀၁၄ ခုနှစ်၊ သြဂုတ် ၉ ရက် မြန်မာသံတော်ဆင့်ဂျာနယ် အတွဲ(၃) အမှတ် ၁၂၊ စာမျက်နှာ ၃၁ တွင် မြန်မာသံတော်ဆင့်ဂျာနယ်မှ ဦးမျိုးရန်နောင်သိန်းနှင့် အင်တာဗျူးတွင် နိုင်ငံတော်သမ္မတအား ဝေဖန်ရေးသားခဲ့သည့်အတွက် အမှုအမှတ် ၇၈၅/ ၂၀၁၄ ဖြင့် ပြန်ကြားရေးဝန်ကြီးဌာန ဒုတိယညွှန်ကြားရေးမှူး (ရုံးအဖွဲ့မှူး) ဦးမြင့်ထွေးက တရားလိုပြုလုပ်၍ တရားစွဲဆိုခဲ့ခြင်းဖြစ်သည်။တရားလွှတ်တော်ရှေ့နေဦး ဇော်လင်းက "ငါတို့ကတော့ မပေးသင့်ဘူးလို့မြင်တာပဲ။သို့ပေမဲ့ တရားသူကြီးရဲ့သဘောထား၊ သူ့အမြင်ပဲ။ ငါတို့မကျေနပ်တာကို နင်ပဲကစပြောလို့မရဘူး။ တရားသူကြီးကို အပေါ်ရုံးကိုလည်း ဆက်တက်ရမယ်။ ဆက်တက်ဖို့လည်းဆုံးဖြတ်ထားတယ်။ အဓိကချတာကတော့ အင်တာဗျူးအသုံးအနှုန်းတွေ။ ပြောတဲ့သူက ပြောသည့်တိုင်အောင် ဆင်ခြင်သင့်တယ်ပေါ့။ တည်းဖြတ်ပြီးမှထည့်သင့်တာပေါ့။ ပြောတဲ့အတိုင်းထည့်လိုက်တာက စကားလုံးတွေကကြမ်းတမ်းတယ်။ ချိုးချိုးဖဲ့ဖဲ့တမင်ပြောတယ်။ ရင့်သီးတယ်လို့ တရားသူကြီးသုံးသပ်တာပေါ့။ တစ်ခုပဲ နည်းနည်းထူးခြားတာက မျိုးရန်နောင်သိန်းက အဲဒီလိုပြောတာက သူတစ်ချိန်တုန်းက ပြစ်ဒဏ်ပေးခံလိုက်ရလို့။ တပ်မတော်နဲ့အဆင်မပြေလို့ပေါ့။ အခုလူတွေကလည်း စစ်တပ်ကလာတဲ့ပုဂ္ဂိုလ်တွေဆိုတော့ အဲဒါကိုမကျေနပ်လို့ပြောတယ်ဆိုတဲ့သဘောမျိုး။ အဲဒါကတော့ သူ့အမြင်ပဲ။ တို့ကတော့ သိပ်သဘောမတူဘူး။ ဟိုအငြိုးရှိလို့ ဒီလိုပြောတယ်ဆိုတာကတော့ ဆွဲပြီးရုံးကသုံးသပ်သလိုဖြစ်နေတာပေါ့။ တရားသူကြီးရဲ့အမြင်အပေါ် မှာတော့ ပြင်းပြင်းထန်ထန်ကြီးပြောဖို့တော့ခက်တယ်။ ရှေ့နေအလုပ်ကတော့ မကျေနပ်ရင် အထက်ဆက်တက်ဖို့ပဲရှိတာပေါ့။ တရားသူကြီးကတော့ သူ့သဘောထားနဲ့သူ၊ သူ့အမြင်နဲ့သူချလိုက်တာပဲ။ တကယ်လွှတ်သင့်တဲ့သူ ကိုးယောက်လွှတ်ပေးလိုက်တာတော့ ဝမ်းသာပါတယ်။ လွှတ်သင့်တဲ့နှစ်ယောက်မလွှတ်တာတော့ သိပ်မကြိုက်ဘူးပေါ့။ ၁၁ ယောက်လုံးလွှတ်သင့်တာပေါ့။ ဒါကတော့ အမှုလိုက်ခဲ့တဲ့ ရှေ့နေတစ်ယောက်ရဲ့အမြင်ပေါ့" ဟုပြောကြားသည်။ပြစ်ဒဏ်ချမှတ်ခံခဲ့ရသည့် ဒုတိယအယ်ဒီတာချုပ် ကိုအံ့ခေါင်မင်းက "စကားအသုံးအနှုန်းတွေက သတင်းမီဒီယာနဲ့မညီညွတ်ဘူးဆိုတဲ့အချက်ပေါ့။ ဒါကတော့ တရားသူကြီးရဲ့ သုံးသပ်ချက်ပေါ့။ သတင်းမီဒီယာဥပဒေကိုသေချာကြည့်မယ်ဆိုရင် ကျင့်ဝတ်နဲ့ ညီ မညီဆိုတာ သတင်းမီဒီယာတိုင်းသိမှာပါ။ သတင်းမီဒီယာဥပဒေမှာ အများပြည်သူအကျိုးစီးပွားနဲ့စပ်လျဉ်းပြီးတော့ ဖော်ပြပိုင်ခွင့်ရှိတယ်ဆိုတာတွေ ပါဝင်ပါတယ်။ ဦးမျိုးရန်နောင်သိန်းပြောတဲ့ စကားအသုံးအနှုန်းတွေ ကြမ်းတမ်းတာမှန်တယ်။ ကျွန်တော်တို့ဖော်ပြလိုက်တဲ့ဟာ ကြမ်းတမ်းတာမှန်တယ်။ သို့သော်လည်း သူတို့က ဒီစကားလုံးကိုပဲကောက်နုတ်ပြီး ချိန်ထိုးကြည့်တာပေါ့။ ဒီစကားလုံးတွေရဲ့အပေါ်မှာရော၊ နောက်မှာရော ဒီစကားလုံးနဲ့ဆက်စပ်တဲ့အကြောင်းတရားတွေ အများကြီးပါတယ်။ သတင်းမီဒီယာကျင့်ဝတ်မှာပါတဲ့ အများပြည်သူကို ထင်သာမြင်သာဖြစ်စေဖို့ ပံ့ပိုးနိုင်တယ်ဆိုရင်သုံးနှုန်းခွင့်ရှိတယ်။ နိုင်ငံရဲ့အထွတ်အထိပ်ဖြစ်တဲ့ သမ္မတက မပြောသင့်မပြောထိုက်တဲ့၊ မလုပ်သင့်မလုပ်ထိုက်တဲ့အလုပ်တွေလုပ်တာမျိုးကို ပေါ်လွင်ထင်ရှားအောင်ဖြစ်ဖို့အတွက် ကျွန်တော်တို့သုံးနှုန်းခဲ့တာဖြစ်တယ်။ သမ္မတကိုဝေဖန်တာပဲဖြစ်ဖြစ်၊ နိုင်ငံတော်အစိုးရကိုဝေဖန်တာပဲဖြစ်ဖြစ်၊ အစိုးရပေါ်လစီကိုဝေဖန်ခြင်းကဖြစ်ဖြစ် အများပြည်သူအကျိုးစီးပွားနဲ့သက်ဆိုင်တဲ့ကိစ္စကို ဒါကိုအများပြည်သူအကျိုးစီးပွားနဲ့မသက်ဆိုင်ဘူးလို့ ဆုံးဖြတ်ခြင်းသည် ဘယ်လိုမှလက်ခံနိုင်စရာအကြောင်းမရှိဘူးဆိုတာ အားလုံးပဲသိမှာပါ" ဟုဆိုသည်။အယ်ဒီတာချုပ် ကိုကျော်စွာဝင်းက "ကျွန်တော်တို့နှစ်ယောက်ကို အမိန့်ချတာက ၁၀ သိန်းစီ။ မဆောင်ရင် အလုပ်မဲ့ထောင်ဒဏ်ခြောက်လပေါ့။ ကျွန်တော်တို့သဘောအရဆိုရင် ကျွန်တော်တို့ရတဲ့လခနဲ့၊ စာမူခနဲ့ဆိုရင် မဆောင်နိုင်ပါဘူး။ ကျွန်တော်တို့ ဒီကိုမလာခင်မှာ ဆရာတော်ကြီးတွေ၊ စာဖတ်ပရိသတ်တွေပါတယ်။ သူတို့တွေက ဒဏ်ငွေအများကြီးချခဲ့ရင် ဆောင်နိုင်အောင် ဝိုင်းဝန်းပံ့ပိုးလိုက်တဲ့ငွေတချို့ရှိပါတယ်။ ဒီအမှုနဲ့ပတ်သက်လို့ သမ္မတဦးသိန်းစိန်အစိုးရကတော့ သူတို့အလုပ်သူတို့လုပ်သွားတာပဲ။ မြန်မာသံတော်ဆင့်ကလည်း ကျွန်တော်တို့လုပ်သင့်တဲ့အလုပ်လုပ်ခဲ့တာပဲ" ဟုပြောကြားသည်။
ငွေဒဏ်မဆောင်ရင် ထောင်ဒဏ်ခြောက်လဆိုတာ အားလုံးဝိုင်းဝန်းရေးဆွဲအတည်ပြုခဲ့တဲ့ သတင်းမီဒီယာဥပဒေမှာမပါဝင်ပါဘူး။ တကယ်လို့ ဥပဒေအတိုင်း တရားသူကြီးက ဆောင်ရွက်မယ်ဆိုရင်လည်း ငွေဒဏ်မပေးဆောင်ဘူးဆိုမှ တစ်ဆင့်ပြီးတစ်ဆင့် ဥပဒေအတိုင်း ဆက်သွားသင့်တာဖြစ်ပါတယ် . . .
"လုပ်ထုံးလုပ်နည်းအရဆိုရင်တော့ ငွေဒဏ်ပဲချမှတ်နိုင်တဲ့အမှုတွေမှာ ငွေဒဏ်မဆောင်နိုင်ရင် ထောင်ဒဏ်ကျခံစေရမယ်လို့ ချမှတ်နိုင်တဲ့အခွင့်အာဏာမျိုး ဥပဒေကတော့ပြဋ္ဌာန်းထားတာရှိပါတယ် ။ ဒါပေမဲ့ ရွေးကောက်ပွဲနီးလာတဲ့အချိန်မှာ သတင်းမီဒီယာတွေကို ဖမ်းဆီးအရေးယူမှု ခပ်စိပ်စိပ်တွေ့လာရတယ်။ ရွေးကောက်ပွဲကို တရားမျှတပြီး လွတ်လပ်တဲ့အခြေအနေဖြစ်ဖို့ဆိုရင် သတင်းမီဒီယာတွေရဲ့ လွတ်လပ်ခွင့်ဟာ အပြည့်အဝရထိုက်ပါတယ်။ သတင်းမီဒီယာတွေကို ဖမ်းဆီးတရားစွဲဆိုမှုတွေကနေ ကင်းလွတ်ခွင့်ရထိုက်တဲ့အခြေအနေမျိုး ဖြစ်သင့်တယ်လို့ ကျွန်တော်ထင်ပါတယ်" ဟု Purple Equity Law Firm မှ အတိုင်ပင်ခံ ဥပဒေပညာရှင် ကိုဖိုးဖြူကသုံးသပ်သည်။"ဥပဒေရေးဆွဲစဉ်ကတည်းက မီဒီယာသမားတွေကို ထောင်ဒဏ်တွေနဲ့ မဖိနှိပ်စေချင်တဲ့အတွက် ငွေဒဏ်ကိုပဲ ထည့်သွင်းဖို့ဆွေးနွေးခဲ့ကြတယ်။ ဒါကြောင့် သတင်းမီဒီယာဥပဒေနဲ့ အရေးယူခံရသူတွေဟာ ငွေဒဏ်ပဲပေးဆောင်ဖို့ ရေးဆွဲထားတာဖြစ်ပါတယ်။ အခု တရားသူကြီးအမိန့်ချတဲ့အခါမှာ ထည့်သွင်းခဲ့တဲ့ ငွေဒဏ်မဆောင်ရင် ထောင်ဒဏ်ခြောက်လဆိုတာ အားလုံးဝိုင်းဝန်းရေးဆွဲအတည်ပြုခဲ့တဲ့ သတင်းမီဒီယာဥပဒေမှာမပါဝင်ပါဘူး။ တကယ်လို့ ဥပဒေအတိုင်း တရားသူကြီးက ဆောင်ရွက်မယ်ဆိုရင်လည်း ငွေဒဏ်မပေးဆောင်ဘူးဆိုမှ တစ်ဆင့်ပြီးတစ်ဆင့် ဥပဒေအတိုင်း ဆက်သွားသင့်တာဖြစ်ပါတယ်" ဟု သတင်းမီဒီယာဥပဒေရေးဆွဲရာတွင် ပါဝင်ခဲ့သော မြန်မာနိုင်ငံစာနယ်ဇင်းကောင်စီ (ယာယီ) ၏ အဖွဲ့ဝင် ဒေါက်တာသိန်းမြင့် (Managing Director, Eleven Media Group) ကဆိုသည်။နေပြည်တော် ပုဗ္ဗသီရိမြို့နယ်တရားသူကြီး ဦးခင်ဝင်းသည် ပုဗ္ဗသီရိမြို့နယ်တွင် တာဝန်မထမ်းဆောင်မီ ကျောက်တံခါးမြို့နယ်တွင် နှစ်နှစ်ကျော်ခန့် တာဝန်ထမ်းဆောင်ခဲ့သည့်အပြင် ခရမ်းမြို့နယ်၌ ဆက်လက်တာဝန်ထမ်းaဆာင်ခဲ့ပြီး ယင်းမှတစ်ဆင့် နေပြည်တော်ပုဗ္ဗသီရိမြို့နယ်သို့ ပြောင်းရွှေ့လာခြင်းဖြစ်aကြာင်း သိရသည်။သတင်းမီဒီယာဥပဒေ ပြစ်မှုပြစ်ဒဏ်များအခန်း၌ ပြဋ္ဌာန်းထားသည့် ပုဒ်မ ၂၅(က)တွင် "မည်သည့်သတင်းမီဒီယာသမားမဆို ပုဒ်မ ၉၊ ပုဒ်မခွဲ(ခ) ပါ တာဝန်နှင့် ကျင့်ဝတ်ကို ကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ငွေဒဏ်အနည်းဆုံး ကျပ်တစ်သိန်းမှ အများဆုံးကျပ်သုံးသိန်းအထိ ချမှတ်ရမည်ဟူ၍ ပြဋ္ဌာန်းထားသည်ကို တွေ့ရသည်။ထို့ပြင် ပုဒ်မ ၂၅ (ခ)၌ "မည်သည့်သတင်းမီဒီယာသမားမဆို ပုဒ်မ ၉၊ ပုဒ်မခွဲ(ဃ) ပုဒ်မခွဲ(စ)နှင့် ပုဒ်မခွဲ(ဆ)တို့ပါ တာဝန်နှင့် ကျင့်ဝတ်တစ်ရပ်ရပ်ဖြင့် ပြစ်မှုကျူးလွန်ကြောင်း ပြစ်မှုထင်ရှားစီရင်ခြင်းခံရလျှင် ထိုသူကို ငွေဒဏ်အနည်းဆုံး ကျပ်သုံးသိန်းမှ အများဆုံး ကျပ် ၁၀ သိန်းအထိ ချမှတ်ရမည်ဟူ၍ ပြဋ္ဌာန်းထားသည်ကို တွေ့ရသည်။
