“မြန်မာ့စီးပွားရေး ပြိုလဲသွားနိုင်သလား” ဆောင်းပါး ရေးသားခဲ့သော Eleven Media Group ၏ အမှုဆောင်အယ်ဒီတာ ကိုနေထွန်းနိုင်ထံသို့ ဧပြီ ၁၁ ရက်စွဲဖြင့် နိုင်ငံတော် သမ္မတ၏ စီးပွားရေးအကြံပေးအဖွဲ့ခေါင်းဆောင် ဒေါက်တာဦးမြင့် ထပ်မံပေးပို့လာသော အကြောင်းပြန်စာအား မြန်မာဘာသာပြန်၍ ဖော်ပြအပ်ပါသည်။
 
ကိုနေထွန်းနိုင် ခင်ဗျာ
 
(၁) ဒါဟာ ကျွန်တော့်ကို ရည်ညွှန်းတဲ့ ခင်ဗျားရဲ့ ဧပြီ ၈ နဲ့ ၉ စာတွေကို ပြန်ကြားခြင်း ဖြစ်ပါတယ်။
 
(၂) ခင်ဗျားဟာ ဂျာနယ်လစ်ဇင် အတွေ့အကြုံ ၁၀ နှစ်ရှိပြီး အသက် ၂၉ နှစ် လူလတ်ပိုင်း အရွယ် ဆိုတာ ကျွန်တော် သတိပြုမိလိုက်ပါတယ်။ ပြီးတော့ ခင်ဗျားက Eleven Media Group မှာ အမှုဆောင်အယ်ဒီတာတစ်ဦး ဖြစ်နေတယ်လို့ သိရပါတယ်။
 
(၃) ခင်ဗျားရဲ့ ဧပြီ ၈ ရက် စာထဲမှာ ခင်ဗျားရဲ့ နိမ့်ကျတဲ့ ဘ၀ အစတွေနဲ့ ခင်ဗျားနဲ့ တခြားလူငယ်တွေ အာဏာရှင် အစိုးရ တစ်ရပ်အောက်မှာ ခံစားခဲ့ရတဲ့ အခက်အခဲတွေကို ဖွင့်ပြောထားပါတယ်။ အဲဒီ ခံစားမှု အားလုံးကို ကျွန်တော် ဘာမှ မသိခဲ့ ဘူးလို့ ပြောရမှာပါ။ ခင်ဗျားမမွေးခင် ကျွန်တော် ဒီနိုင်ငံကနေ ထွက်သွားတယ်။ ကျွန်တော် ကုလသမဂ္ဂမှာ အကြီးတန်း စီးပွားရေး ပညာရှင် တစ်ဦးအဖြစ် ပြည်ပမှာ နှစ်နှစ်ဆယ်နီးပါး နေခဲ့တယ်။ ကျွန်တော် အငြိမ်းစားယူပြီးတဲ့အခါ မြန်မာနိုင်ငံ ကို ပြန်လာတယ်။
 
(၄) ခင်ဗျားက အာဏာရှင် အစိုးရက ဖျက်ဆီးလိုက်တဲ့ ပညာရေးစနစ်တစ်ရပ်ရဲ့ ထုတ်ကုန်ဖြစ်တယ်လို့ ခင်ဗျားကိုယ် ခင်ဗျား စာထဲမှာလည်း ဖော်ပြထားပါတယ်။ အခြားတစ်ဖက်မှာတော့ ကျွန်တော်ဟာ ပိုပြီး ကောင်းတဲ့ ကျောင်းတွေနဲ့ တက္ကသိုလ်တွေ တက်ခွင့်ရခဲ့တယ်။ ဒါကြောင့် ပညာသင်ကြားခွင့် ရရှိခဲ့မှု မတူညီတာကြောင့် ကျွန်တော်နဲ့ Debate လုပ်ဖို့  ခင်ဗျားက ပြိုင်ဘက် မဟုတ်ဘူးပေါ့။ အကျိုးဆက်အနေနဲ့ ခင်ဗျား ကျွန်တော် အနိုင်ကျင့်တာ ခံရမယ်။ ကျွန်တော်က ခင်ဗျားကို အနိုင်ကျင့်တာကြောင့် ကျွန်တော်ဟာ လူငယ်မျိုးဆက်တွေရဲ့ ဘဝနေထိုင်မှု ပုံစံတွေကို နားမလည်ဘူး၊ ကျွန် တော်က မြန်မာနိုင်ငံထဲက လူငယ်ဆယ်သန်းကို အထင်သေးရုံ သက်သက်ပဲပေါ့။
(၅) တစ်ရက်အကြာ ဧပြီ ၉ ရက် ခင်ဗျားစာမှာတော့ ခင်ဗျား သဘောထားက ပြောင်းသွားတယ်။ ခင်ဗျားက ကျွန်တော့်ကို  Live Debate လုပ်ဖို့ စိန်ခေါ်တယ်။ အဲဒီကနေ အကဲဖြတ်ကြည့်ရရင် ကျွန်တော် ခင်ဗျားကို ယုံပါတယ်။ ပြီးတော့ အနည်းဆုံး တော့ ခင်ဗျားနဲ့ ကျွန်တော် တူညီမှု တစ်ခု ရှိတယ်။ သမ္မတရဲ့ စီးပွားရေး အကြံပေးအဖြစ် ကျွန်တော့်ကို အသုံး ချချင်တဲ့ လူတွေ ကျွန်တော့်နားမှာ ဝိုင်းနေတယ်။ အမှုဆောင် အယ်ဒီတာအဖြစ် ခင်ဗျားကို အသုံးချဖို့နဲ့ လူရယ်စရာ ဖြစ် အောင် လုပ်ခိုင်းဖို့ လူတွေ ခင်ဗျားနားမှာ ဝိုင်းနေတယ်။
(၆) ကျွန်တော် ခင်ဗျားကို သတိပေးလိုတာက ကျွန်တော်တို့ရဲ့ ယဉ်ကျေးမှုမှာ ခင်ဗျားလို လူတစ်ယောက်က ခင်ဗျား အဘိုးအရွယ် ဖြစ်နိုင်တယ်လို့ ပြောတဲ့၊ ခင်ဗျားက “ဆရာကြီး” တပ်ခေါ်တဲ့ လူတစ်ယောက်ကို Live Debate လုပ်ဖို့ စိန် မခေါ်ရပါဘူး။ ဒီကိစ္စနဲ့ ပတ်သက်ရင် ခင်ဗျားကို ကျွန်တော်နဲ့ အမျိုးသားစီမံကိန်းနဲ့ စီးပွားရေးဖွံ့ဖြိုး တိုးတက်မှု ပြည်ထောင်စု ဝန်ကြီး ဒေါက်တာ ကံဇော်တို့ အကြား ၂၀၁၅ ခုနှစ် မတ် ၁၁ ရက် ပူးတွဲ အီးမေးလ်ပေးစာနဲ့ အဲတာရဲ့ တွဲ ဖက်စာတွေကို ရည်ညွှန်းလိုက်ပါတယ်။ ကျွန်တော်က ဒေါက်တာကံဇော်ကို သူ့ရဲ့ ဝက်ဘ်ဆိုက်မှာ MNPED နဲ့ပတ်သက်ပြီး ရေးထားတဲ့ စာတစ်ကြောင်း  “On 1st November 1993, apartment from the above departments …” က အဓိပ္ပာယ် မရှိဘူး။ ပြန်ပြင်ရေးသင့်တယ်လို့ ထောက်ပြတယ်။ ဒေါက်တာကံဇော်ဟာ အဲဒါကို ရေးတာ မဟုတ်ဘူးဆိုတာ ကျွန်တော် သိတယ်။ ဒါက အရင်အစိုးရ လက်ထက်က အမွေတစ်ရပ်ပဲ။ ဒါကို ဘယ်သူရေးသလဲဆိုတာနဲ့ မပတ်သက်ဘဲ  ဒေါက်တာ ကံဇော်ဟာ MNPED ရဲ့ ဝန်ကြီး ဖြစ်လာတဲ့အခါ ဒီအမှားကို ပြင်ဖို့ သူ တာဝန်ရှိတယ်။ သူ ပြင်ခဲ့ပါတယ်။ ခင်ဗျား အင်တာနက်ကို သွား၊ “Myanmar, Ministry of National Planning and Economic Development, About Us” လို့ ရိုက်ထည့်လိုက်။ ကျွန်တော် ပြောတာတွေ အကုန် သူပြင်ထားတာကို ခင်ဗျား တွေ့ရလိမ့်မယ်။ သူက အမှားအတွက် တာဝန်ယူပြီး သူ့ကို အမှား ထောက်ပြတဲ့အတွက် ကျွန်တော့်ကို ကျေးဇူးတင်ထားတယ်။
(၇) ကိုနေထွန်းနိုင်၊ ခင်ဗျားအနေနဲ့ကတော့ “the possibility of economic failure and social gap are making the Myanmar people suffocate” စာကြောင်းနဲ့ ပတ်သက်တဲ့ မက်ဆေ့ချ်တစ်ခု ကျွန်တော် ခင်ဗျားကို ပို့လိုက်တယ်။ တစ်ခြား ပုဒ်စုနဲ့ စာကြောင်းတွေ အများကြီးဟာ ညံ့ဖျင်းတဲ့ ရေးသားမှု ဖြစ်တယ်။ အဓိပ္ပာယ်မရှိဘူး။ ပြန်ပြင်ရေးသင့်တယ် လို့ ထောက်ပြတယ်။ အဲဒါတွေက အစိုးရနဲ့ စီးပွားရေး အကြံပေးတွေကို ဝေဖန်ထားတဲ့ Eleven Myanmar မှာ ဖော်ပြခဲ့ တဲ့ ခင်ဗျားရဲ့ ဆောင်းပါးမှာ တွေ့ရတာပါ။ ကျွန်တော့်ရဲ့ မက်ဆေ့ချ်ကို တုံ့ပြန်တဲ့ အနေနဲ့ ခင်ဗျားက ကျွန်တော်ဟာ နိုင်ငံ တွင်းက လူငယ်တွေနဲ့ ပတ်သက်ပြီး ဘာမှ မသိဘူး၊ ကျွန်တော်ဟာ သူတို့ကို လေးစားမှု မရှိဘူး၊ ကျွန်တော်က ဦးသိန်း စိန်နဲ့ သူ့ အစိုးရအဖွဲ့ကို ကာကွယ်နေတယ်၊ တိုင်းပြည်တွင်းမှာ ဖြစ်ပျက်နေတာတွေနဲ့ ပတ်သက်ပြီး ကျွန်တော် ဘာမှ မသိ ဘူး၊ အစိုးရအဖွဲ့ကို ပေးတဲ့ ကျွန်တော့် အကြံဉာဏ်ဟာ အသုံးမဝင်ဘူး၊ အာဏာပိုင်တွေက လျစ်လျူရှုခဲ့တယ်၊ ပြီးတော့  ခင်ဗျားက Live Debate လုပ်ဖို့ ကျွန်တော့်ကို စိန်ခေါ်လိုတယ်။ ပွင့်ပွင့်လင်းလင်း ပြောရရင် ဒါတွေ မလိုအပ်ပါဘူး။ ကျွန် တော် ခင်ဗျားဆီကနေ လိုလားသမျှကတော့ ခင်ဗျားဆောင်းပါးမှာ ခင်ဗျား မှားနေတာ အချို့ ရှိနေတယ်လို့ ကျွန်တော် ထင် တာကို ကြည့်ဖို့ပါပဲ။ ပြီးတော့ ခင်ဗျား ဆန္ဒရှိမယ်ဆိုရင် ပြန်ပြင်ဖို့ပါပဲ။
(၈) ခင်ဗျား ဆောင်းပါးအတွက် ကျွန်တော် ထောက်ပြလိုတာက ဦးသိန်းစိန်ဟာ ပျက်စီးယိုယွင်းနေတဲ့ စီးပွားရေးကို အရင် အစိုးရဆီကနေ ဆက်ခံခဲ့ရတယ် ဆိုတာပါပဲ၊ အဲဒီ စီးပွားရေးဟာ ခရိုနီတွေက မောင်းနှင်တယ်၊ ခြစားတယ်၊ သဘာ၀ ရင်း မြစ်တွေအပေါ် မှီခိုနေတယ်၊ တရားမျှတမှု မရှိဘူး၊ သဘာ၀ ပတ်ဝန်းကျင် ထိန်းသိမ်းရေးနဲ့ မဆီလျော်ဘူး၊ အားလုံးကို လွှမ်းခြုံနိုင်ပြီး စဉ်ဆက်မပြတ် စီးပွားရေး ဖွံ့ဖြိုးမှုအတွက် လုပ်ငန်း အစီအစဉ်တွေ၊ မဟာဗျူဟာနဲ့ မူဝါဒ မူဘောင် ချို့တဲ့ နေတယ်ပေါ့။ ပြီးခဲ့တဲ့ နှစ်တွေမှာ ကျွန်တော်နဲ့ အစိုးရအဖွဲ့မှာ အခုတာဝန်ရှိသူတွေ ဖြစ်လာတဲ့ လုပ်ငန်းရှင်၊ ပညာရှင် အသိုင်းအဝိုင်းတွေက လုပ်ဖော်ကိုင်ဖက်တွေဟာ ဒီအမွေ ဆက်ခံခဲ့ရတဲ့ အရှုပ်ထုပ်ကို ကိုင်တွယ်ဖို့ ပြင်းပြင်းထန်ထန် အလုပ်လုပ်ခဲ့တယ်။ ဒါဟာ အင်မတန် ကြီးမားတဲ့ လုပ်ငန်းတာဝန် တစ်ရပ်ဖြစ်ပြီး တိုးတက်မှုက နှေးကွေးခဲ့ပါတယ်။
(၉) အဲဒီနောက် ခင်ဗျားက သမ္မတရဲ့ အစိုးရအဖွဲ့နဲ့ သူ့ အကြံပေးတွေကို ရာစုနှစ်ထက်ဝက်ကြာ မှားယွင်းတဲ့ အုပ်ချုပ်မှု၊  မှားယွင်းတဲ့ စီမံခန့်ခွဲမှု၊ မကျွမ်းကျင်မှုနဲ့ နိုင်ငံရဲ့ အင်စတီကျူးရှင်းတွေရဲ့ စနစ်ပိုင်းဆိုင်ရာ ပျက်စီးမှုတွေကို ဆက်ခံခဲ့ရတဲ့ အရှုပ်ထုပ်ကို ဖန်တီးတယ်လို့ စွဲချက်တင်တယ်။ အစိုးရအဖွဲ့ထဲမှာ ခြစားမှုနဲ့ ခရိုနီဝါဒ ရှိတာ ကျွန်တော် မငြင်းပါဘူး။ ဒါပေမဲ့  လူကောင်းတွေလည်း အများကြီး ရှိပါတယ်။ လူကြီးရော၊ လူငယ်ရော ထောင်နဲ့ချီပြီး ရှိတယ်။ သူတို့ဟာ အဆင့်မြင့်မြင့် လေ့ကျင့်ပေးထားတဲ့ ပရော်ဖက်ရှင်နယ်တွေကနေ အသစ် စုဆောင်းလိုက်တဲ့ လူငယ်တွေအထိ ပါတယ်။ သူတို့ဟာ ရိုးရိုး သားသား အသက်မွေးပြီး ဒီနိုင်ငံကို ပိုကောင်းတဲ့ နေရာဖြစ်အောင် လုပ်တဲ့နေရာမှာ တစ်စိတ်တစ်ပိုင်း ပါဝင်နေတယ်။ စီးပွားရေး အရှုပ်ထုပ်အတွက် အစိုးရအဖွဲ့ တာဝန်ရှိတယ်လို့ စွပ်စွဲလိုက်တဲ့ ခင်ဗျားရဲ့ ဆောင်းပါးဟာ အဲဒီ ပြည်သူ့ အရာ ထမ်းတွေနဲ့ ကျွန်တော်နဲ့ မပတ်သက်တဲ့ လူငယ်တွေကို စော်ကားလိုက်တာပါပဲ။
(၁၀) ပြီးခဲ့တဲ့ သီတင်းပတ်က ကျွန်တော်နဲ့ သမ္မတ ဦးသိန်းစိန် တွေ့ခဲ့ကြတာကို ဘာမှ ဖုံးကွယ်စရာ မရှိပါဘူး။ ဧပြီ ၄ ရက် စနေ့နေ့မှာ ကျွန်တော် သူနဲ့ ပုဂ္ဂိုလ်ရေးအရ တစ်ယောက်တည်း တွေ့တယ်။ အဲဒီတွေ့ဆုံမှုဟာ မတ် ၂ ရက်က ကျွန်တော် သူ့ ကို ပေးပို့ခဲ့တဲ့ စာတစ်စောင်နဲ့ ပတ်သက်ပြီး နောက်ဆက်တွဲအဖြစ် တွေ့ခဲ့တာပါ။ အဲဒီစာကို ပူးတွဲပေးပို့ လိုက်ပါတယ်။ အဲဒီ တွေ့ဆုံမှုမှာ ခင်ဗျားရဲ့ ဆောင်းပါးကို ပြန်စာရေးလိုက်တဲ့ အကြောင်း သူ့ကို ကျွန်တော် ပြောခဲ့ပါသေးတယ်။ ဒါပေမဲ့ ကျွန်တော် ခင်ဗျားရဲ့ အီးမေးလ် လိပ်စာ ဒါမှမဟုတ် ခင်ဗျား ဝက်ဘ်ဆိုက်က Eleven Myanmar အီးမေးလ်လိပ်စာ ရှာ မတွေ့တာကြောင့် မပေးနိုင်ခဲ့ပါဘူး။ လုပ်ဖော်ကိုင်ဖက် တစ်ဦးက  editor@weeklyeleven.com ဒါမှ မဟုတ် localnews@dailyeleven.com ကို ပို့ကြည့်ဖို့ ကျွန်တော့်ကို ပြောပါတယ်။ ဒါပေမဲ့ အဲဒါ အလုပ်မဖြစ်ပါဘူး။ error မက်ဆေ့ချ်တစ်ခုပဲ ကျွန်တော် ပြန်ရတယ်။
 
(၁၁) ကျွန်တော် ပြောစရာ ရှိသမျှ ဒါ အကုန်ပါပဲ။ ဒါဟာ ခင်ဗျားဆီ ကျွန်တော် နောက်ဆုံး မက်ဆေ့ချ် ပေးပို့ခြင်းပါ။ နောက် ထပ် အပြန်အလှန်ရေးကြတာက ခင်ဗျားအတွက်ရော၊ ကျွန်တော့်အတွက်ပါ အသုံးဝင်မှာ မဟုတ်ပါဘူး။ ဒါက ဘာဖြစ်လို့ လဲ ဆိုတော့ ခင်ဗျားနဲ့ ကျွန်တော်နဲ့ ပြောကြတဲ့ ဘာသာစကားချင်း မတူလို့ပါ။
(၁၂) ပျော်ရွှင်ဖွယ် သင်္ကြန်ဖြစ်ပါစေ၊ တိုးတက်မှု ရှိတဲ့ နှစ်သစ်ဖြစ်ပါစေလို့ ခင်ဗျားကို ကျွန်တော် ဆုတောင်းပေးပါတယ်။
ခင်ဗျားရဲ့ မိဘတွေကို ဆက်ပြီး ကောင်းစွာ စောင့်ရှောက်ခြင်းအားဖြင့် နောက်ထပ် ကောင်းမှုပြုနိုင်ပါစေလို့လည်း ခင်ဗျား ကို ကျွန်တော် ဆုတောင်းပေးပါတယ်။
 
ဂွတ်ဘိုင်
ဦးမြင့်