ရုရှားငါးဖမ်းသင်္ဘောနစ်မြုပ်မှုတွင် အသက်ရှင်ကျန်ရစ်သည့် မြန်မာသင်္ဘောသား ၂၂ ဦးသည် ဧပြီ ၁၅ ရက်တွင် ကိုရီးယားလေကြောင်းလိုင်းဖြင့် ရန်ကုန်မြို့သို့ ပြန်လည်ရောက်ရှိမည်ဖြစ်ကြောင်း မော်စကိုမြို့ရှိ မြန်မာသံရုံး၏သတင်းထုတ်ပြန်ချက်အရ သိရသည်။ယင်းပြင် သင်္ဘောနစ်မြုပ်မှုကြောင့် အသက်သေဆုံးသည့် မြန်မာသင်္ဘောသား ၁၆ ဦး၏ ရုပ်အလောင်းများကိုလည်း ယင်းနေ့တွင်ပင် စင်းလုံးငှားလေယာဉ်ဖြင့် တိုက်ရိုက်ပို့ဆောင်ပေးမည်ဖြစ်ကာ၊ ပျောက်ဆုံးသင်္ဘောသားလေးဦးကိုလည်း ဆက်လက်ရှာဖွေနေကြောင်း သတင်းထုတ်ပြန်ခဲ့သည်။အသက်ရှင်ကျန်ရစ်သူ မြန်မာသင်္ဘောသား ၂၂ ဦးအား ဧပြီ ၇ ရက်က ရုရှားနိုင်ငံ တောင်ပိုင်း Sakhalin မြို့ရှိ Pacific Plaza သို့ပို့ဆောင်ပေးထားပြီး၊ ရုရှားနိုင်ငံရှိ မြန်မာသံရုံးမှ တာဝန်ရှိသူများက မြန်မာသင်္ဘောသား ၂၂ ဦး မြန်မာနိုင်ငံသို့ပြန်ရန် နိုင်ငံကူးလက်မှတ်များကို ပြုလုပ်ပေးခဲ့ပြီးဖြစ်သည်။    သို့ဖြစ်၍ ယင်းမြန်မာသင်္ဘောသား ၂၂ ဦးမှာ ဧပြီ ၁၅ ရက်(သင်္ကြန်အကြတ်နေ့) တွင် မြန်မာနိုင်ငံသို့ရောက်ရှိမည်ဖြစ်သည်။ဧပြီ ၁ ရက်က ရုရှားနိုင်ငံ၊ ကမ်ချက်တာတွင် ရုရှားငါးဖမ်းသင်္ဘောတိမ်းမှောက်ခဲ့ပြီး အဆိုပါသင်္ဘောပေါ်တွင် မြန်မာသင်္ဘောသား ၄၂ ဦးပါဝင်ခဲ့ပြီး၊ အဆိုပါသင်္ဘော ၄၂ ဦးမှာ မြန်မာနိုင်ငံရှိ SRPS ကုမ္ပဏီငါးခုမှ ထွက်ခွာခဲ့ခြင်းဖြစ်ကြောင်း သိရသည်။    မြန်မာနိုင်ငံ၊ ပို့ဆောင်ရေးဝန်ကြီးဌာန၊ ရေကြောင်းပို့ဆောင်ရေးညွှန်ကြားမှုဦးစီးဌာန၊ သင်္ဘောသားဌာနခွဲအနေဖြင့် ငါးဖမ်းသင်္ဘောနစ်မြုပ်မှုတွင်ပါဝင်သည့် မြန်မာသင်္ဘော ၄၂ ဦးအား ထွက်ခွာခွင့်တင်ပြသော SRPS ကုမ္ပဏီ ၅ ခုအား နိုင်ငံခြားသင်္ဘောများသို့ သင်္ဘောသားစေလွှတ်ခွင့်ကို ဧပြီ ၃ ရက်မှစတင်ကာ ရပ်ဆိုင်းထားကြောင်း သိရသည်။ ယင်း SRPS ကုမ္ပဏီငါးခုမှာ Sea Rider ၊ Top Chance ၊ Asia Wave ၊ Light Oasis နှင့် Star Global တို့ဖြစ်သည်။ရုရှားငါးဖမ်းသင်္ဘောနစ်မြုပ်မှုတွင်ပါဝင်သည့် မြန်မာသင်္ဘောသား ၄၂ ဦးအနက် အသက်ရှင်သူ ၂၂ ဦး၊ ကွယ်လွန်သူ ၁၆ ဦးရှိပြီး၊ သင်္ဘောသားလေးဦးမှာ ပျောက်ဆုံးနေဆဲဖြစ်ကြောင်း ပို့ဆောင်ရေးဝန်ကြီးဌာန၊ ရေကြောင်းပို့ဆောင်ရေးညွှန်ကြားမှုဦးစီးဌာန၊ သင်္ဘောသားဌာနခွဲမှ သတင်းရရှိသည်။