ဗြိတိန်သရုပ်ဆောင် ဂျိုးအယ်လ်ဝင်နှင့် လမ်းခွဲလိုက်ပြီးနောက် ၎င်းအဆင်ပြေလျက်ရှိသည်ကို ပြသည့်အနေဖြင့် တေလာဆွစ်က လတ်တလောရှိုးပွဲတစ်ခုတွင် ပရိသတ်အား လက်မထောင်ပြခဲ့သည်။
ဧပြီ ၁၅ ရက်က ဖလော်ရီဒါပြည်နယ်တွင် ကျင်းပသည့် ဖျော်ဖြေပွဲတွင် ပေါ့ပ်စတားတေလာဆွစ်က “You Ok” ဆိုသည့်စာတန်း ကိုင်ဆောင်ထားသည့် ပရိသတ်တစ်ဦးကိုတွေ့ပြီး လက်မပြန်ထောင်ပြခဲ့ခြင်းဖြစ်သည်။ ထိုအချိန် တေလာဆွစ်က Delicate ဆိုသည့်သီချင်းကို သီဆိုနေခဲ့သည်။
ချစ်သူဂျိုးအယ်လ်ဝင်နှင့် ပြတ်ပြီးကတည်းက ဖလော်ရီဒါရှိုးပွဲသည် ဆွစ်အတွက် ပထမဆုံးဖျော်ဖြေပွဲလည်း ဖြစ်သည်။ ၎င်းသည် Eras Tour နယ်လှည့်ဖျော်ဖြေမှုများ ပြုလုပ်လျက်ရှိသည်။
ရှိုးပွဲတွင် ဆွစ်ကကိုးခုမြောက်စတူဒီယို အယ်လ်ဘမ် Evermore အတွက် အယ်လ်ဝင်နှင့် တွဲရေးခဲ့သည့် Champagne Problems သီချင်းကိုလည်း ဖျော်ဖြေသွားခဲ့သည်။
Page Six ဖော်ပြချက်အရ ဆွစ်တို့နှစ်ဦး ယခုနွေဦးတွင် ပြတ်သွားခဲ့ပြီး ချစ်သူသက်တမ်း ခြောက်နှစ်ကြာခဲ့သည်။ ၂၀၁၆ ခုနှစ်က Met Gala ပွဲတွင် စတွေ့ခဲ့ကြပြီး လပိုင်းအကြာတွင် ဒိတ်ဖြစ်သွားကာ ၂၀၁၇ ခုနှစ် မရောက်မီအထိ ၎င်းတို့ဆက်ဆံရေးကို ပရိသတ်အသိမခံခဲ့ပေ။
အချစ်သီချင်းကောင်းများစွာ ရေးစပ်သီဆိုခဲ့သူ တေလာဆွစ်သည် ဂျိုးဂျိုးနက်စ် ၊ ဂျွန် မေယာ၊ ဟယ်ရီစတိုင် ၊ ကယ်လ်ဗင်ဟားရစ်၊ တွမ်ဟစ်ဒယ်စတင်တို့နှင့်လည်း ဇာတ်လမ်းရှိခဲ့ပြီး ယခုတစ်ဖန်အသည်းကွဲထားသော် လည်း အဆင်ပြေနေပုံ မြင်ရသည့်အတွက် ၎င်း၏ပရိသတ် Swifties များက စိတ်သက်သာရာ ရနေကြသည်။
