Netflix တွင် မကြာသေးမီကမှ ပြသထားသည့် ‘Kill Boksoon’ ဇာတ်ကားသည် ပြည်တွင်း၌သာမက ပြည်ပမှာပါ ပရိသတ်အကြိုက်တွေ့လျက်ရှိသည်။
ဧပြီ ၅ ရက်တွင် Netflix ထုတ်ပြန်ချက်အရ ‘Kill Boksoon’ တောင်ကိုရီးယားဇာတ်ကားသည် ထုတ်လွှင့်ပြီးသုံးရက်အတွင်း ပရိသတ်ကြည့်ရှုမှုနာရီပေါင်း ၁၉ ဒသမ ၆၁ သန်း ရှိခဲ့ပြီး (အင်္ဂလိပ်စကားပြောမဟုတ်သည့်) ကမ္ဘာ့လူကြိုက်အများဆုံးဇာတ်ကား ၁၀ ကားတွင် နံပါတ်တစ်ဖြစ်လာသည်။
လျှို့ဝှက်သည်းဖိုဇာတ်လမ်းအမျိုးအ စားဖြစ်ပြီး မင်းသမီးဂျန်ဒိုယန်းက အဓိကပါဝင် သရုပ်ဆောင်ထားကာ မတ် ၃၁ ရက်ကစတင် ပြသခဲ့သည်။
ဒါရိုက်တာ၏ညွှန်ကြားကောင်းမှုအပြင် ဂျန်ဒိုယန်း၏သရုပ်ဆောင်ကောင်းမှုကြောင့် ဇာတ်လမ်းကပိုမိုစိတ်ဝင်စားစရာကောင်းခဲ့ပြီး single mother ဘဝနှင့် အငှားလူသတ်သမားဘဝကို ယှဉ်တွဲဖြတ်သန်းနေရသည့် မင်းသမီးဇာတ်ဖြစ်သည်။
လက်ရှိလည်း Netflix က ယင်းဇာတ်ကားကို ပြသနေဆဲဖြစ်သည်။
နံပါတ်နှစ်လူကြိုက်အများဆုံးဇာတ်ကားက စိန်များခိုးပြီး အကြွေးဆပ်ရန် လေယာဉ်မယ်နှင့် ၎င်း၏ချစ်သူတို့ ကြံစည်ထားစဉ် လေယာဉ်ပြန်ပေးဆွဲခံလိုက်ရသည်ကိုရိုက်ကူးထားသည့် အိန္ဒိယဇာတ်ကား Chor Nikal Ke Bhaga ဖြစ်ပြီး၊ လေကြောင်းမတော်တဆမှုဖြစ်ရပ်မှန်ကို အခြေခံရိုက်ထားသည့် ကိုရီးယားဇာတ်ကား Emergancy Declaration က နံပါတ်သုံးလူကြိုက်အများဆုံးဖြစ်သည်။ ဇာတ်ကားထဲတွင် လီဗြောင်ဟွန်းနှင့် ဂျန်ဒိုယန်းတို့ပါသည်။ ဂျာမန်စစ်ကား All Quiet on the Westren Front က စာရင်း၏နံပါတ် ခြောက်နေရာတွင် ရှိသည်။
