နိုင်ငံ​ကျော် မြန်မာသံစဉ်အဆိုတော်ကြီး တေးသံရှင် တွံတေးစိုးအောင်သည် မတ်လ ၉ ရက် နံနက် ၂  နာရီက ကွယ်လွန်သွားကြောင်း သားဖြစ်သူက လူမှုကွန်ရက်မှတစ်ဆင့် အသိ​ပေးထားသည်။

တေးသံရှင် တွံတေးစိုးအောင်သည် ဦးနှောက်သွေးကြောပြတ်ကာ ရုတ်တရက် ကွယ်လွန်သွားခြင်းဖြစ်ပြီး ကွယ်လွန်ချိန်၌ အသက် ၆၁ နှစ်ရှိပြီဖြစ်​ကြောင်း သိရသည်။

တေးသံရှင် တွံတေးစိုးအောင်၏သား ဖြစ်သူ တွံတေးဟိန်းကျော်က “ကျွန်တော့်ရဲ့ အဖေ နိုင်ငံကျော်တေးသံရှင်ကြီး တွံတေးစိုးအောင် ယနေ့နံနက် ၂ နာရီက ကွယ်လွန်သွားပါတယ်”ဟု Facebook မှတစ်ဆင့် ပရိသတ်များကို အသိ​ပေး​ပြောဆိုထားသည်။

တွံ​တေးစိုး​အောင်သည် ရုတ်တရက် မူးလာခြင်း​ကြောင့် ​ဆေးရုံတင်ကာ ကုသမှု​များခံယူခဲ့​သော်လည်း  သတိပြန်မရလာဘဲ ကွယ်လွန်သွားခဲ့ခြင်းဖြစ်​ကြောင်း မိသားစုနဲ့ နီးစပ်သူတစ်ဦးက ဆိုသည်။

တွံတေးစိုးအောင်သည် ပထမဆုံး တစ်ကိုယ်တော်စီးရီးက “ကိုကိုလို့ခေါ်ပါ”​ဖြင့် အနုပညာ​လောကထဲစတင်​ရောက်ရှိခဲ့ပြီး ပရိသတ်အား​ပေးမှု​များ ရရှိခဲ့သူဖြစ်သည်။  တေးစီးရီးခွေများစွာ ဆက်တိုက် ထွက်ရှိခဲ့ပြီး စုစု​ပေါင်း တေးစီးရီးပေါင်း ၁၀၀ ဝန်းကျင် အထိ ထွက်ရှိခဲ့​ကြောင်း သိရသည်။

လက်ရှိအချိန်တွင်လည်း ဂီတအနုပညာ အလုပ်​များကို ပြန်လည်လုပ်ကိုင်လုပ်ရင်း သားဖြစ်သူကိုလည်း အနုပညာအ​မွေ​ပေး​ထား​ကြောင်း သိရသည်။

တွံတေးစိုးအောင်၏ စျာပနကို မတ်လ ၁၁ ရက် စနေနေ့တွင် လှိုင်သာယာမြို့နယ်ရှိ ထိန်ပင်သုဿန်၌ သင်္ဂြိုဟ်မည်ဖြစ်​ကြောင်း သိရသည်။