ပြီးခဲ့သည့်နှစ်က ယူကရိန်းကို ရုရှားကကျူးကျော်ခဲ့ချိန်တွင် ကော်ရင်းသည် ယူကရိန်းအရှေ့ပိုင်း ဒီနီပရိုမြို့တွင် ဒုတိယနှစ် ဆေးကျောင်းသူအဖြစ် ပညာသင်ကြားနေချိန်ဖြစ်သည်။

အင်္ဂလန်အလယ်ပိုင်း လက်စတာမြို့မှ အသက် ၂၇ နှစ်အရွယ် ကော်ရင်းသည် ဇင်ဘာဘွေ ကျောင်းသူအုပ်စုနှင့်အတူ ယူက ရိန်းနိုင်ငံထဲမှ ထွက်ပြေးတိမ်းရှောင်ခဲ့သူဖြစ်သည်။

“စစ်ပွဲလဲ တကယ်ဖြစ်ရော ကိုယ့်အသက် ကိုယ်ကိုယ်ပဲကယ်ရမယ်ဆိုတာ ကျွန်မသဘောပေါက်သွားခဲ့ပါတယ်”ဟု ကော်ရင်းက အေအက်ဖ်ပီသတင်းဌာနကို ပြောကြားခဲ့သည်။

စစ်ပွဲမဖြစ်ပွားမီက ကော်ရင်းသည် ယူကရိန်းတွင် လာရောက်ပညာသင်ကြားနေသည့် သောင်းနှင့်ချီသည့် ပြည်ပကျောင်းသားများထဲတွင် တစ်ဦးအပါအဝင်ဖြစ်ပြီး ကျောင်း သားအများစုသည် ဆေးပညာနှင့် သွားဘက်ဆိုင်ရာ ဆေးပညာများကဲ့သို့ ပညာရပ်များကို ကျောင်းလခအနည်းငယ်ဖြင့် သင်ယူနေကြသူများဖြစ်သည်။

ယူကရိန်းနိုင်ငံအတွင်းမှ ထွက်ပြေးတိမ်းရှောင်ခဲ့ပြီးနောက် သူတို့သည် ယူကရိန်းပြည်ပြေးများကဲ့သို့ အလားတူ အကျိုးအမြတ်များနှင့် အခွင့်အရေးများ မရနိုင်သည်ကို သိရှိခဲ့ကြသည်။

လက်စတာသို့ ပြန်လည်ရောက်ရှိခဲ့ပြီးနောက် ကော်ရင်းသည် သူ့ဆေးပညာဘာသာရပ်ကို ဆက်လက်သင်ယူနိုင်ခြင်း မရှိတော့ပေ။

ဇင်ဘာဘွေတွင် မွေးဖွားခဲ့ပြီး ဗြိတိန်နိုင်ငံသားခံယူထားသည့်သူသည်  ကော်ရင်းဆိုသည့်အမည်ဖြင့် အွန်လိုင်းအသုံးပြုခဲ့ပြီး သူ့အခက်အခဲနှင့်ပတ်သက်ပြီး ဆွေးနွေးချိန်တွင် လူမျိုးရေးခွဲခြားဆက်ဆံခံခဲ့ရပြီးနောက် သူ့အမည်အရင်းကို ဖော်ပြခြင်းမပြုရန် တောင်းဆိုခဲ့သည်။

ထိုအချိန်အတောအတွင်း ယူကရိန်းရှိပြည်ပကျောင်းသားများထဲမှ သူ့အတန်းဖော်များသည်လည်း ဒီနီပရိုမြို့တွင် ဖြစ်ပွားနေ သည့် ကြောက်မက်ဖွယ်အခြေအနေများကြောင့် ယူကရိန်းမှ ထွက်ခွာခဲ့ကြသည်ဟု ကော်ရင်းက “သူတို့အများစုက အိမ်ရာမဲ့တွေပါ။ သူတို့ဟာ တစ်နေရာပြီးတစ်နေရာကို သွားလာနေထိုင်ခဲ့ကြပါတယ်”ဟု ကော်ရင်းက ဆိုသည်။

သူ့အတန်းဖော်များ၏ အခက်အခဲကို ကော်ရင်းက ဖြေရှင်းရန်ကြိုးပမ်းခဲ့ပြီး ဗြိတိန်တက္ကသိုလ်များကို ဆက်သွယ်ကာ ကုလသ မဂ္ဂနှင့်ချိတ်ဆက်ခြင်း၊ ယူကရိန်းပညာရေးဝန်ကြီးနှင့် တွေ့ဆုံခြင်းတို့ ပြုလုပ်ခဲ့သည်။

“တံခါးတွေအများကြီးကို လိုက်ခေါက်ခဲ့ပါတယ်။ ဒါပေမယ့် တံခါးတွေဟာ ခပ်ပြင်းပြင်း ဆောင့်ပိတ်သွားခဲ့ပါတယ်။ ကျွန်မတို့ လည်း ယူကရိန်းဒုက္ခသည်တွေလိုမျိုး ခံစားခဲ့ရတာပဲ။ ကျွန်မတို့ဟာ တစ်နိုင်ငံတည်းမှာပဲ နေခဲ့ကြတာလေ။ ဘာဖြစ်လို့များ မစာနာကြတာပါလိမ့်”ဟု ကော်ရင်းက ပြောကြားခဲ့သည်။

လူမျိုးရေး ခွဲခြားမှု

စစ်ပွဲမဖြစ်ပွားမီအချိန်က ယူကရိန်းနိုင်ငံတွင် ပြည်ပနိုင်ငံများမှ လာရောက်ပညာသင်ကြားသည့် ကျောင်းသားပေါင်း ၇၆၀၀၀ ခန့်ရှိခဲ့ပြီး အာဖရိကနိုင်ငံများမှ ကျောင်းသားများလည်းပါဝင်နေသည်။ ယင်းသည် ဆိုဗီယက်ခေတ်က အခြေအနေမျိုးဖြစ်သည်ဟု ဗြိတိန်ဒုက္ခသည်ဆိုင်ရာ ပညာရေးပရဟိတအဖွဲ့၏ အမှုဆောင်ချုပ် ကက်သရင်း ဂလက်ဝဲလ်က ပြောကြားခဲ့သည်။

ယင်းကျောင်းသားများထဲတွင် ဂါနာ၊ ဇင်ဘာဘွေ၊ အိန္ဒိယနိုင်ငံများအပြင် နိုက်ဂျီးရီးယားနှင့် မော်ရိုကိုကျောင်းသားအများအပြား ပါဝင်သည်ဟု ဂလက်ဝဲလ်က ဆိုသည်။

စစ်ပွဲဖြစ်ပွားခဲ့ပြီးနောက် ယူကရိန်းကျောင်းသားများသည် ဗြိတိန်နိုင်ငံသားများကဲ့သို့ ဗြိတိန်တက္ကသိုလ်များတွင် အပြည့်အဝ ပညာသင်ကြားခွင့်ရခဲ့သည်။ သို့သော်  ယူကရိန်းသို့ သွားရောက်ပညာသင်ကြားခဲ့သည့် ပြည်ပကျောင်းသားများမှာမူ ဗြိတိန်သို့ဝင်ရောက်မှုသည်ပင် ကြီးမားသည့်စိန်ခေါ်မှုတစ်ခုဖြစ်ခဲ့သည်ဟု ဂလက်ဝဲလ်က ပြောကြားခဲ့သည်။

“သူတို့ (ယူကရိန်းမှ ထွက်ပြေးလာသည့် ပြည်ပကျောင်းသားများ)ဟာ ဘေးကင်းလုံခြုံမှုနဲ့ တရားဝင်မှုရှိတဲ့လမ်းကြောင်းပေါ်မှာ မဟုတ်ပါဘူး”ဟု ဂလက်ဝဲလ်က ပြောကြားခဲ့သည်။

ယင်းကျောင်းသားများအနေဖြင့် တနည်းနည်းဖြင့် ပညာသင်ကြားခွင့်ရမည်ဆိုသည့်တိုင် ပြည်ပကျောင်းသားများထက် ကျောင်းလခနည်းပါးပြီး အထူးချေးငွေများ ရရှိခွင့်ရှိသည့် ဗြိတိန်နှင့် ယူကရိန်းကျောင်းသားများကဲ့သို့ အခွင့်အရေးများကို ခံစားခွင့်မရနိုင်ကြောင်း ဂလက်ဝဲလ်က ဆိုသည်။

၂၀၂၁ ခုနှစ်က အာဖဂန်တွင် တာလီဘန်တို့ အာဏာရရှိခဲ့ချိန်က နိုင်ငံအတွင်းမှ ထွက်ပြေးရန်ကြိုးပမ်းခဲ့ပြီး ယူကရိန်းသို့ လွှဲပြောင်းပို့ဆောင်ခံခဲ့ရပြီးနောက် ပြီးခဲ့သည့်နှစ်တွင် ယူကရိန်းမှ ထွက်ပြေးတိမ်းရှောင်ခဲ့သည့် အာဖဂန်ကျောင်းသားတစ်ဦး၏ဖြစ်စဉ်ကို ဂလက်ဝဲလ်က ဥပမာပေးပြီး ပြောကြားခဲ့သည်။

ယူကရိန်းအတန်းဖော်များသည် ဗြိတိန်သို့ လွှဲပြောင်းပို့ဆောင်ခံရချိန်တွင် ယင်းအာဖဂန်ကျောင်းသားသည် အာဖဂန်တွင်သာ မက ယူကရိန်းတွင်ပါ နေစရာမရှိဘဲ  ဖြစ်ခဲ့ရသည့်တိုင် ယူကရိန်းကျောင်းသားများကဲ့သို့ အခွင့်အရေးမရခဲ့ဟု ဂလက်ဝဲလ်က ဆိုသည်။

“ဒီလို သတိမမူမိတဲ့ ဖြစ်စဉ်တွေအများကြီးကို ကျွန်မတို့ တွေ့ခဲ့ရပါတယ်”ဟု ဂလက်ဝဲလ်က ပြောကြားခဲ့ပြီး ကော်ရင်းကမူ ယင်းသည် လူမျိုးရေးကိစ္စကြောင့် ဖြစ်သည်ဟု ဆိုသည်။

“အသားရောင် အမည်းနဲ့အညိုရောင်တွေရဲ့ ပြဿနာဆိုရင် ဦးစားပေးမခံရဘဲ အမြဲတမ်း နောက်ဆုံးရောက်နေပါတယ်။ လူ့ အဖွဲ့အစည်းတစ်ရပ်အနေနဲ့ လူမျိုးရေးခွဲခြားမှု ကြီးစိုးနေတဲ့အောက်မှာ ကျွန်မတို့ရှိနေလိမ့်မယ်လို့ မတွေးမိပါဘူး”ဟု ကော်ရင်းက ပြောကြားခဲ့သည်။

ပြစရာ နတ္ထိ

ယူကရိန်းတွင် အိုးမဲ့အိမ်မဲ့ဖြစ်ခဲ့ရသည့် ပြည်ပကျောင်းသားများသည် စစ်ပွဲမှထွက်ပြေးတိမ်းရှောင်လာသည့် ယူကရိန်းနိုင်ငံသား ကျောင်းသားများနှင့်နှိုင်းယှဉ်ပါက ဗြိတိန်တွင် စကောလားရှစ်ရရှိမှုအပိုင်း၌ ကြီးမားစွာ ဖယ်ကျဉ်ခံခဲ့ရသည်။

အင်္ဂလန်မြောက်ပိုင်းရှိ မန်ချက်စတာ တက္ကသိုလ်ကမူ ရှားရှားပါးပါးခြွင်းချက်ပေးထားသည်ဟု ဆိုနိုင်သည်။ မည်သည့်ကျောင်းသား၊ မည်သည့်နေရာမဆို၊ မည်သည့်ပဋိပက္ခဖြစ်ပွားနေသည့် နေရာတိုင်းက ကျောင်းသားတိုင်းကို စကောလားရှစ်ပေးနိုင်သည်ဟု ယင်းတက္ကသိုလ်မှ  လူမှုရေးရာ တာဝန်ယူရေးလက်ထောက်ဥက္ကဋ္ဌ နာလင်းသက်ကာက ပြောကြားခဲ့သည်။

သို့သော်လည်း ၎င်းတို့သည် အခြားနေရာများမှ ကျောင်းသားများနှင့်နှိုင်းယှဉ်ပါက ယူကရိန်းတွင် ပညာသင်ယူခဲ့ဖူးသည့် ကျောင်းသားများထဲမှ ပညာသင်ခွင့်လျှောက်ထားလွှာရရှိမှုသည်  ၁၀၀၀ လျှင် တစ်ယောက်သာရှိခဲ့သည်ဟု ၎င်းက ဆိုသည်။

အဘယ်ကြောင့်ဆိုသော် ယူကရိန်းတွင် ပညာသင်ယူခဲ့သည့် ပြည်ပကျောင်းသားများသည် ဆေးပညာနှင့် သွားဘက်ဆိုင်ရာ ဆေးပညာကိုသာ သင်ယူလေ့လာခဲ့ကြခြင်းဖြစ်ပြီးယင်းပညာရပ်များသည် စကောလားရှစ်တွင် အကျုံးဝင်ခြင်းမရှိခြင်းကြောင့် ဖြစ်နိုင်သည်။

ကော်ရင်းကမူ သူသည် ဆရာဝန်တစ်ယောက်ဖြစ်လိုသည့် သူ့မျှော်မှန်းချက်များ အဆုံးသတ်သွားမည့်အခြေအနေကို လက်ခံ နိုင်ရန် ကြိုးစားနေသည်ဟု ဆိုသည်။

သူသည် လက်စတာတွင် သူနာပြုသင်တန်းတက်နေချိန်က ဘူဂေးရီးယားတွင် ဆေးပညာသင်ကြားခဲ့သည့် ဆရာဝန်တစ်ဦးနှင့် တွေ့ဆုံခဲ့ပြီးနောက် ဥရောပအရှေ့ပိုင်းသို့  သွားရောက်ရန် စဉ်းစားခဲ့သည်ဟု ဆိုသည်။

သူ့မိသားစုသည် ဗြိတိန်သို့ ခိုလှုံခွင့်နှင့် ရောက်ရှိခဲ့ပြီးနောက်ပိုင်း ငွေရေးကြေးရေးအရ ဆေးပညာသင်ကြားရန်အတွက် ကျောင်းလခနည်းသည့်အခြေအနေအပေါ် စိတ်ဝင်စားခဲ့မိသည်ဟု ဆိုသည်။

စစ်ပွဲဖြစ်ပွားပြီးနောက် ယူကရိန်းမှပြန်လည်ထွက်ခွာခဲ့ပြီးနောက် ဗြိတိန်၏ အထွေထွေ ဆေးဘက်ဆိုင်ရာကောင်စီ (GMC) သည် ဒီနီပရိုကျောင်းမှ ဆေးဘက်ဆိုင်ရာ အရည်အချင်းကန့်သတ်ချက်များကို လက်ခံမှုရပ်နားခဲ့သည်ကို သိရှိခဲ့ရသည်ဟု ကော်ရင်းက ဆိုသည်။

HGMC ကမူ အချို့ကျောင်းသားများသည် လေ့လာသင်ယူမှု ပုံစံတစ်မျိုးအပြီးတွင် ဘွဲ့တစ်ခုရရှိခဲ့သဖြင့် ယင်းကျောင်းသားများသည် ဆေးဘက်ဆိုင်ရာဘွဲ့ကို အပြည့်အဝမပြီးမြောက်ခဲ့သည့် အဓိပ္ပာယ်သက်ရောက်သည်ဟု အေအက်ဖ်ပီသတင်းဌာနကို ပြောကြားခဲ့သည်။ ထို့ကြောင့် ၎င်း၏တားမြစ်ပိတ်ပင်ချက်သည် စစ်ပွဲနှင့် လုံးဝမသက်ဆိုင် ကြောင်း GMC က အလေးထား ပြောဆိုခဲ့သည်။ သို့သော်လည်း ယင်းဆုံးဖြတ်ချက်သည် ကော်ရင်းကို စိတ်ပျက်စေခဲ့သည်။

“ကျွန်မ ကြိုးစားခဲ့သမျှအားလုံး သဲထဲရေသွန်သလိုပါပဲ။ ဘာကိုမှ ပြစရာမရှိတော့ပါဘူး”ဟု ကော်ရင်းက ပြောကြားခဲ့သည်။

Ref: AFP