ဘိုင်ယန်မြူးနစ်အသင်းသည် မန်စီးတီးအသင်းမှ အငှားဖြင့်ခေါ်ယူထားသည့် ပေါ်တူဂီနောက်ခံလူ ကန်ဆယ်လိုအား အပြီးသတ်စာချုပ်ချုပ်ဆိုနိုင်ရန် စီစဉ်နေကြောင်း ဘိုင်ယန်မြူးနစ်အားကစားဒါရိုက်တာဖြစ်သူ ဆာလီဟာမစ်ဇစ်က အတည်ပြုပြောကြားခဲ့သည်။
"အငှားအပြောင်းအရွှေ့ စာချုပ်ပြီးတဲ့နောက်မှာ ကျွန်တော်တို့ ဂျော်အို(ကန်ဆယ်လို)ကို သက်တမ်းဘယ်လောက်ကြာကြာ စာချုပ်နိုင်မလဲကို အမှန်တကယ် တွေးခဲ့ပါတယ်။ ကျွန်တော်တို့ (၄)နှစ်ကျော်လောက် သူ့ကို ပစ်မှတ်ထားခဲ့တာပါ။ ကျွန်တော်တို့အသင်းမှာ နေရာပြည့်နေတာ၊ ဒါမှမဟုတ် အပြောင်းအရွှေ့အတွက် ငွေကြေးမလုံလောက်လို့ ဖြစ်ပါတယ်"ဟု ဆာလီဟာမစ်ဇစ်က ဂျာမန်မီဒီယာ BamS သို့ ပြောကြားခဲ့သည်။
ကန်ဆယ်လိုအား အငှားဖြင့်ခေါ်ယူချိန်တွင် ပြောင်းရွှေ့ကြေး ယူရိုသန်း(၇၀)ဖြင့် အပြီးသတ်ခေါ်ယူခွင့်ရှိသည့် အချက်ပါဝင်သည်ဟု သတင်းများက ဖော်ပြခဲ့သည်။ ကန်ဆယ်လိုသည် အသင်းသစ်နှင့် ပွဲဦးထွက်(၂)ပွဲတွင် ဂိုးဖန်တီးမှု(၂)ကြိမ် ပြုလုပ်ထားသည်။
