ချယ်လ်ဆီးအသင်းနည်းပြ ဂရေဟမ်ပေါ်တာက လန်ဒန်ဒါဘီပြိုင်ဘက် ဖူလ်ဟမ်အသင်းနှင့် ဂိုးမရှိသရေကျသော်လည်း ချန်ပီယံလိဂ်ဝင်ခွင့်ရရန် ယုံကြည်မှုရှိကြောင်း ထုတ်ဖော်ပြောကြားခဲ့သည်။
ချယ်လ်ဆီးအသင်းသည် အသင်းပိုင်ရှင်သစ် တော့ဒ်ဘိုလီလက်ထက် နွေရာသီနှင့် ဇန်နဝါရီအပြောင်းအရွှေ့ကာလတွင် ကစားသမားသစ် ၁၇ ဦးကို ပေါင်သန်း ၅၅၀ ကျော် အသုံးပြု၍ ခေါ်ယူထားသည်။ သောကြာနေ့က ဖူလ်ဟမ်အသင်းနှင့်ကစားသည့် အိမ်ကွင်းပွဲစဉ်တွင် ဗြိတိန်စံချိန်တင်ပြောင်းရွှေ့ကြေး ဖြင့် ခေါ်ယူထားသည့် အန်ဇိုဖာနန်ဒက်ဇ်၊ မူဒရစ်၊ ဘာဒီယာရှီလာတို့ ပွဲထွက်ကစားခဲ့ပြီး မာဒူအက်ကီ၊ ဖိုဖာနာ စသည့် ကစားသမား သစ်များ လူစားလဲဝင်ရောက်ကစားခဲ့သော်လည်း ဂိုးမရှိသရေကျခဲ့သည်။
ချယ်လ်ဆီး အသင်းသည် ပရီးမီးယားလိဂ် နောက်ဆုံးခြောက်ပွဲတွင် တစ်ပွဲသာ အနိုင်ရထားပြီး ၂၁ ပွဲကစား၊ ရမှတ် ၃၀ ဖြင့် ချန်ပီယံလိဂ်ဝင်ခွင့် အဆင့် ၄ နေရာမှ နယူးကာဆယ်အသင်းနှင့် ၁၀ မှတ်အထိ ကွာဟသွားပြီဖြစ်သည်။
သို့သော် ချန်ပီယံလိဂ်ဝင်ခွင့်နှင့်ပတ်သက်၍ ဂရေဟမ်ပေါ်တာက "ကျွန်တော်တို့ မှာရှိတဲ့ အလားအလာတွေကို ယုံကြည်မှုရှိပါတယ်။ ဒီအစုအဖွဲ့မှာရှိတဲ့ စွမ်းရည်ကို ကျွန်တော် ယုံကြည်မှုရှိပါတယ်။ အခု ကျွန်တော်တို့လုပ်ရမှာက အသင်းကို ရုပ်လုံးပေါ်လာစေ ဖို့ပါ။ ဒါက စိန်ခေါ်မှုပါပဲ။ အဲဒါကို ကျွန်တော်တို့ လုပ်ရပါမယ်။ ကစားရမယ့်ပွဲတွေ အများကြီး ရှိပါသေးတယ်။ ဒါပေမဲ့ တစ်ချိန်တည်းမှာပဲ နောက်ထပ်လေး၊ ငါးလအတွင်း ဘာတွေ လုပ်ရမလဲဆိုတာကို ကျွန်တော် စိတ်မပူချင်ပါဘူး။ လာမယ့်နေ့အတွက် အာရုံစိုက်ထား ဖို့၊ နောက်ထပ်လေ့ကျင့်ရေးအစီအစဉ်နဲ့ လာမယ့်ပွဲစဉ်အတွက် အာရုံစိုက်ထားဖို့ လိုပါတယ်" ဟု ပြောကြားခဲ့သည်။
ချယ်လ်ဆီးအသင်းသည် ယခုရာသီ ချန်ပီယံလိဂ်ရှုံးထွက်အဆင့် ပွဲစဉ်များအတွက် ကစားသမားမှတ်ပုံတင်ရာတွင် ၀ါရင့်တိုက်စစ်မှူး အူဘာမီယန်းနှင့်အတူ ဇန်နဝါရီတွင် ခေါ်ယူထားသည့် နောက်ခံလူ ဘာဒီယာရှီလာ၊ တောင်ပံကစားသမား မာဒူအက်ကီ၊ ကွင်းလယ်လူ အန်ဒရေဆန်းတို့စ်နှင့် တိုက် စစ်မှူး ဖိုဖာနာတို့ကို ချန်လှပ်ခဲ့ကြောင်း သိရသည်။ ကစားသမားသစ်သုံးဦးသာ မှတ်ပုံတင်ခွင့်ရသောကြောင့် အသစ်ခေါ်ယူထားသူများအနက် အန်ဇိုဖာနန်ဒက်ဇ်၊ မူဒရစ်နှင့် ဂျော်အိုဖေးလစ်တို့ကိုသာ ထည့်သွင်းခဲ့ခြင်းဖြစ်သည်။
