■ စစ်ပွဲ နှင့် တုံ့ပြန်ချက်များ

အိန္ဒိယဝန်ကြီးချုပ် နာရင်ဒရာမိုဒီက ဖေဖော်ဝါရီ ၂၄ ရက်တွင် ရုရှားသမ္မတ ဗလာဒီမာပူတင်ထံ ဖုန်းဖြင့် ဆက်သွယ်ကာ ရုရှားနှင့် NATO အကြား ကွဲပြားခြားနားမှုများကို ရိုးသားစစ်မှန်သော ဆွေးနွေးမှုများဖြင့် အဖြေ ရှာသွားရန်၊ သက်ဆိုင်ရာအဖွဲ့အစည်းများ အားလုံး သံတမန်ရေး ဆွေးနွေးမှုလမ်းကြောင်းပေါ် ပြန်တက်ရန်၊ အကြမ်းဖက်မှုများ ချက်ချင်းရပ်တန့်ရန် မေတ္တာရပ်ခံခဲ့သည်။

ပထမရက်ကပင် စစ်ရေးအားသာချက်များ ရယူထားနိုင်သော ရုရှားက စစ်ပွဲဒုတိယနေ့တွင် ကိယက်ဗ်မြို့တော်သို့ ဒုံးကျည်များနှင့် ဆက်လက်ပစ်ခတ်ကာ မြို့တော်အစွန်အဖျား၌ ပြင်းထန်သော တိုက်ပွဲများ ဖြစ်ပွားလာသည်။ ပထမနေ့တွင် အနည်းဆုံး လူ ၁၃၇ ဦး သူရဲကောင်းများ ဖြစ်သွားကြကြောင်း သမ္မတဇယ်လန်းစကီးက ပြောကြားခဲ့ပြီး နိုင်ငံကို ကာကွယ်လိုသူများအတွက် သေနတ်များ ထုတ်ပေးခဲ့သည်။ ဒဏ်ရာရသူ ၃၀၀ ကျော်ရှိပြီး ပဋိပက္ခများရပ်တန့်ရေးအတွက် ဆွေးနွေးမှုများ လုပ်ဆောင်ရန် ယူကရိန်းသမ္မတက ထပ်မံတောင်းဆိုသည်။ နေရပ်စွန့်ခွာ ထွက်ပြေးသူ ဒုက္ခသည်တစ်သိန်းခန့်ရှိပြီး အိမ်နီး ချင်းနိုင်ငံများ၏ နယ်စပ်ဝင်ပေါက်ကို ဖွင့်ပေးထားကြရန် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံးက ထုတ်ပြန် ဖော်ပြထားသည်။

“ဇ”အမှတ်အသားပါ စစ်ယာဉ်များဖြင့် ရုရှားတပ်များသည် ကိယက်ဗ်မြို့လယ်သို့ အလျင်အမြန် ဦးတည်ရွေ့လျားနေပြီး ရုရှားစစ်တပ်က ယူကရိန်းစစ်ယာဉ်နှစ်စီးကို သိမ်းဆည်းကာ ယူကရိန်းစစ်ဝတ်စုံများ ပြောင်း လဲဝတ်ဆင်လျက် အသွင်ယူ လှုပ်ရှားနေကြောင်း ယူကရိန်းအစိုးရသတင်းဌာနက ကြေညာခဲ့သည်။ စစ်ပွဲစတင်ပြီး ၃၆ နာရီအတွင်း ရုရှားတို့၏တိုက်ခိုက်မှုကြောင့် ယူကရိန်းနိုင်ငံရှိ လေယာဉ်ကွင်း ၁၁ ကွင်း၊ စစ်ဆင်ရေးကွပ်ကဲဌာန ၁၃ ခု၊ ရေဒါစခန်း ၃၆ ခုနှင့် လေကြောင်းရန်ကာကွယ်ရေးစနစ် ၁၄ ခုတို့ ပျက်စီးခဲ့သည်။

စစ်ပွဲဒုတိယနေ့တွင် ချာနိုဘိုင်းနျူက လီးယားဓာတ်ပေါင်းဖိုအား ရုရှားတို့ သိမ်းပိုက်နိုင်ခဲ့သည်။ အဆိုပါဓာတ်ပေါင်းဖိုကို ထိန်းချုပ်လိုက်သော ရုရှားတပ်ဖွဲ့များသည် ယူကရိန်းတပ်ဖွဲ့ဝင်များနှင့် သဘောတူညီချက်ယူ၍ ဓာတ်ပေါင်းဖိုလည်ပတ်မှု ဆက်လက်ဆောင်ရွက် နိုင်ခဲ့သည်။ ယူကရိန်းရှိ စစ်ဘက်ဆိုင်ရာ အခြေခံအဆောက်အအုံ ၁၁၈ ခုကို ရုရှားတို့ ထိန်းသိမ်းနိုင်ခဲ့ပြီး ယူကရိန်းတပ်ဖွဲ့ဝင် ၁၅၀ မှာ မိမိတို့ထံ လက်နက်ချခဲ့ကြောင်း ရုရှားကာကွယ်ရေးဝန်ကြီးဌာနက ထုတ်ပြန်သည်။

NATO မဟာမိတ်အဖွဲ့သည် ယူကရိန်းနိုင်ငံသို့ ဝင်ရောက်တပ်စွဲခြင်း၊ တပ်ဖွဲ့စေလွှတ်ခြင်းများ ခွင့်ပြုမည် မဟုတ်ကြောင်း NATO အတွင်းရေးမှူးချုပ် ယန်စတောက်တန်ဘတ် က ပြောကြားသည်။ သို့သော် NATO အဖွဲ့ဝင် ရိုမေးနီးယား၌ အမြန်ဆုံး အင်အားဖြည့်တင်းရန် ပြင်သစ်က လုပ်ဆောင်ခဲ့သည်။

ယူကရိန်းကို စစ်ဆင်ရေးစတင်ကြောင်း သမ္မတပူတင် ကြေညာပြီးနောက် သုံးနာရီအကြာ အမေရိကန်ပြည်ထောင်စု၊ ၀ါရှင်တန်မြို့တော် ရုရှားသံရုံးရှေ့တွင် စစ်ဆန့်ကျင်ရေး ဆန္ဒပြပွဲ ပထမဆုံး ထွက်ပေါ်ခဲ့သည်။ အလားတူ ဗြိတိန်ဒေါင်းနင်းလမ်း၌ ယူကရိန်းကို ကူညီရန် ဆန္ဒပြခြင်း၊ လက်ဘနွန်နိုင်ငံ ဘေရွတ်၊ ချက်နိုင်ငံပရပ်၊ အစ္စရေးနိုင်ငံ တဲလ်အဗစ်တို့တွင် စစ်ဆန့်ကျင်ရေး ဆန္ဒပြပွဲများ ထွက်ပေါ် လာခဲ့သည်။ ရုရှားနိုင်ငံအတွင်း မော်စကို၊ စိန့်ပီတာစဘတ်အပါအဝင် မြို့ကြီးအချို့၌ စစ်ဆန့်ကျင်ရေး ဆန္ဒပြပွဲများ ပြုလုပ်ခဲ့ရာ ဖေဖော်ဝါရီ ၂၄ ရက်တွင် မြို့ကြီး ၅၃ မြို့၌ စစ်ပွဲရပ်တန့်ရန် ဆန္ဒပြသူ ၁,၆၆၇ ဦးကို ဖမ်းဆီးခဲ့ပြီး မော်စကိုတစ်မြို့တည်း၌ပင် ဆန္ဒပြသူ ၆၀၀ အဖမ်းခံခဲ့ရသည်။

ဖေဖော်ဝါရီ ၂၅ ရက်၌ တရုတ်သမ္မတ ရှီကျင့်ဖျင်သည် ရုရှားသမ္မတ ဗလာဒီမာပူတင် နှင့် ဖုန်းဆက်ခဲ့ပြီး ခေါင်းဆောင်နှစ်ဦးလုံးက အရှေ့ပိုင်းတွင် တပ်ဖွဲ့ဝင်များ ဆက်လက်ဖြန့်ကြက်ချထားခြင်းမှာ ရုရှား၏ အနီရောင် မျဉ်းကို စိန်ခေါ်ခြင်းဖြစ်ကြောင်း၊ ရှီက အဖွဲ့အစည်းအားလုံး စစ်အေးခေတ်သဘောထားများ စွန့်လွှတ်ပြီး ရေရှည်တည်တ့ံခိုင်မြဲသည့် ဥရောပလုံခြုံရေး လုပ်ထုံးလုပ်နည်းများ တည်ဆောက်သွားကြရန် တိုက်တွန်းပြောကြားခဲ့သည်။ တရုတ်အနေနှင့် အများနှင့်သက်ဆိုင်ပြီး ကျယ်ပြန့်သော ပူးပေါင်းဆောင်ရွက်မှု၊ ရေရှည်တည်တ့ံမည့် လုံခြုံရေးအမြင်၊ ကုလသမဂ္ဂနှင့် နိုင်ငံတကာစနစ်တို့ကို သက်ဆိုင်သူအားလုံးနှင့် ပူးပေါင်းဆောင်ရွက်ရန် ဆန္ဒရှိကြောင်း ရှီက ပြောကြားခဲ့သည်။

■ မြို့သိမ်းတိုက်ပွဲများ၊ ကူညီထောက်ပ့ံမှုများ

ကုလသမဂ္ဂလုံခြုံရေးကောင်စီ၏ “ ယူကရိန်းအား ရုရှား၏ကျူးကျော်မှုကို အပြင်းထန်ဆုံး ကန့်ကွက်ရှုတ်ချပြီး ရုရှားတပ်များကို ချက်ချင်းရုပ်သိမ်းရန် ” တောင်းဆိုချက်မူကြမ်းအား ရုရှားနိုင်ငံက ဗီတိုအာဏာသုံး၍ ပယ်ချ ခဲ့သည်။ အမေရိကန် နှင့် အယ်ဘေးနီးယားတို့ ဦးဆောင်ရေးဆွဲထားသော ဤအဆိုပြုချက်ကို လုံခြုံရေးကောင်စီအဖွဲ့ဝင် ၁၅ နိုင်ငံအနက် ၁၁ နိုင်ငံက ထောက်ခံချက်ပေးခဲ့ပြီး တရုတ်၊ အိန္ဒိယ၊ ယူအေအီးတို့က မဲမပေးခဲ့ကြဘဲ ရုရှားက ဗီတိုသုံးကာကန့်ကွက်ခဲ့၏။

ယူကရိန်းအရှေ့တောင်ပိုင်းရှိ မယ်လစ်တိုပိုမြို့ကို ရုရှားက ဖေဖော်ဝါရီ ၂၆ ရက်၌ သိမ်းယူခဲ့သည်။ ပင်လယ်နက်ကို အခြေပြု ထားသော ရုရှားရေတပ်က မာရီအူပို၊ အရှေ့မြောက်ပိုင်းရှိ ဆူမီနှင့် အရှေ့ပိုင်းရှိ ပိုတာဗာမြို့များကို ဒုံးကျည်များဖြင့် ပစ်ခတ်ခဲ့သည်။ စစ်ပွဲ တတိယနေ့ထိ မြို့တော်ကိယက်ဗ်တွင် ရုရှား၏ ထိုးစစ်ကို ယူကရိန်းစစ်သည်များက တွန်းလှန်နေဆဲဖြစ်သည်။ မြို့ခံပြည်သူများအနေနှင့် မိမိနေအိမ်တွင်း ပုန်းခိုကြရန်၊ လက်နက်ခဲယမ်းအစအနများ ထိမှန်မှုမှ အကာအကွယ်ပြုထားကြရန်၊ လေကြောင်းရန် အ ချက်ပေးဥသြဆွဲလျှင် အနီးဆုံးဗုံးခိုကျင်းသို့ ဝင်ရောက်ကြရန် ယူကရိန်းပြည်ထဲရေးဝန် ကြီးဌာနက အကြံပြုညွှန်ကြားထားသည်။ တစ်ဖန် ကာကွယ်ရေးဝန်ကြီးဌာန၏ ဝက်ဘ်ဆိုက်တွင် လက်လုပ်မီးလောင်ဗုံးများ (Molotov cocktail)ပြုလုပ်၍ ရုရှားကျူးကျော် သူများကိုရင်ဆိုင်ရန် တိုက်တွန်းထားပြီး ယူကရိန်း အမျိုးသား ကိုယ်ရံတော်တပ်ဖွဲ့က မိုလိုတော့ဗ် မီးလောင်ဗုံးပြုလုပ်နည်းကို တွစ်တာပေါ် တင်ထားခဲ့သည်။

ရုရှားအစိုးရက ယူကရိန်းနိုင်ငံအတွင်းသို့ ဘက်ပေါင်းစုံမှ ချီတက်တိုက်ခိုက်ရန် ကြည်းတပ်စစ်သည်များအား အမိန့်ပေးခဲ့သည်။ အမေရိကန်၏အဆိုအရ လပေါင်းများစွာ နယ်စပ်၌ ဖြန့်ကြက်နေရာယူထားခဲ့သော ရုရှားတပ်ဖွဲ့အင်အား ၁၅၀,၀၀၀ ၏ ထက်ဝက်ခန့်မှာ ယူကရိန်းနိုင်ငံအတွင်းသို့ ဝင်ရောက်သွားပြီးဖြစ်သည်ဟု ခန့်မှန်းထားသည်။ ဖေဖော်ဝါရီ ၂၇ ရက်၌ ယူကရိန်း၏ ဒုတိယအကြီးဆုံးမြို့တော် ခါကိဗ်သို့ ရုရှားတပ်များ ဝင်ရောက်သွားခဲ့သည်။

ယူကရိန်းပြည်သူ ထောင်ပေါင်းများစွာမှာ အနောက်ဘက်နယ်စပ် တိုင်းပြည်များသို့ ထွက်ပြေးလျက်ရှိပြီး ကလေးငယ်၊ အမျိုးသမီးနှင့် သက်ကြီးရွယ်အိုများ ဖြစ်ကြသည်။ ယူကရိန်းသမ္မတ ဇယ်လန်းစကီးက အရွယ် ရောက်အမျိုးသားများအား နိုင်ငံမှထွက်ခွာခွင့် ပိတ်ပင်ထားသည်။ ပိုလန်၊ ဟန်ဂေရီ၊ ဆလိုဗက်ကီးယား၊ ရိုမေးနီးယား နှင့် မော်တိုဗာနိုင်ငံများသို့ ထွက်ပြေးနေကြခြင်းဖြစ်ပြီး လက်ရှိဒုက္ခသည် တစ်သိန်းကျော်အရေအ တွက်မှာ ဆက်လက်တိုးမြင့်နေဆဲဖြစ်သည်။

အမေရိကန်သမ္မတ ဂျိုးဘိုင်ဒင်က ယူကရိန်းနိုင်ငံအား စစ်ရေးဆိုင်ရာအထောက်အပ့ံအဖြစ် အမေရိကန်ဒေါ်လာ သန်း ၃၅၀ ကူညီရန်  နိုင်ငံခြားရေးဝန်ကြီး အန်တိုနီဘလင်ကန်ကို ညွှန်ကြားခဲ့သည်။ ဖေဖော်ဝါရီ ၂၅ ရက်၌ သမ္မတဇယ်လန်းစကီးထံ ဖုန်းဖြင့်ဆက်သွယ်ပြီး အမေရိကန်နိုင်ငံအနေနှင့် စီးပွားရေးနှင့် လုံခြုံရေးဆိုင်ရာအကူအညီများ ဆက်လက်ပေးအပ်မည်ဖြစ်ကြောင်း ပြောကြားခဲ့သည်။

ထိုနေ့တွင်ပင် ပြင်သစ်သမ္မတ အီမန်နျူယယ် မက်ခရွန်က ယူကရိန်းနိုင်ငံအား ယူရိုသန်း ၃၀၀ အကူအညီပေးမည်ဟု ထုတ်ပြန်ကြေညာခဲ့သည်။ ယူကရိန်း၌ လိုအပ်လျက် ရှိသော ကာကွယ်ရေးပစ္စည်းအပါအဝင် အထောက်အပ့ံများပေးမည်ဖြစ်ပြီး ယူကရိန်းသို့ ကူညီခြင်းသည် ဥရောပတိုက်သားများနှင့် ဥရောပကုမ္ပဏီများကို  အကာအကွယ်ပေးရာ ရောက်ကြောင်း ရေးသားဖော်ပြခဲ့သည်။ ပြင်သစ်သည် NATO ၏ မူဘောင်နှင့်အညီ ရိုမေးနီးယား၌ ပြင်သစ်တပ်ဖွဲ့ဝင် ၅၀၀ ကို အင်အားဖြန့်ကြက်ထားသည်။

■ ပထမအကြိမ် ရုရှား-ယူကရိန်း ဆွေးနွေးပွဲ

စစ်ပွဲလေးရက်မြောက်လာသော ဖေဖော်ဝါရီ ၂၇ ရက်၌ သမ္မတပူတင်သည် ရုရှား၏ နျူကလီးယားတပ်ဖွဲ့များအား အသင့်အနေအထားရှိစေရန် အမိန့်ပေးခဲ့သည်။ နျူကလီးယား အင်အားနှင့်ပတ်သက်၍ ရုရှားသည် ကမ္ဘာတွင် နျူထိပ်ဖူးအများဆုံး ပိုင်ဆိုင်ထားသည်။ အမေရိကန်သမ္မတ ဂျိုးဘိုင်ဒင်က ပူတင် ယင်းကဲ့သို့အမိန့်ပေးသည်မှာ လုံးဝလက်သင့်ခံနိုင်ဖွယ် မရှိကြောင်းနှင့် မဟာမိတ်များ၊ မိတ်ဖက်နိုင်ငံများနှင့် ဆွေးနွေးညှိနှိုင်းသွားမည်ဖြစ်ကြောင်း တုံ့ပြန်ခဲ့သည်။

ကုလသမဂ္ဂအထွေထွေအတွင်းရေးမှူးချုပ် ဂူတာရက်စ်နှင့် ယူကရိန်းသမ္မတ ဇယ်လန်းစကီးတို့ ဖုန်းဖြင့် ဆက်သွယ်ဆွေးနွေးရာတွင် လုံခြုံရေးကောင်စီ၌ ရုရှားနိုင်ငံ၏ မဲပေးပိုင်ခွင့်ကို ပိတ်ထားရန် အစဉ်အလာမရှိဖူး သည့် တောင်းဆိုချက်ကို ဇယ်လန်းစကီးက ပြောခဲ့သည်။

စစ်ပွဲစတင်ချိန်မှ ရုရှား-ယူကရိန်း နိုင်ငံဆွေးနွေးပွဲကို ဘီလာရုစ်၌ ကျင်းပခဲ့သည်။ ကနဦးတွင် ရုရှား၏ ကမ်းလှမ်းချက်ဖြစ်သော ဆွေးနွေးရန်နိုင်ငံအား သမ္မတ ဇယ်လန်းစကီးက ငြင်းပယ်ခဲ့ပြီး ဘူဒါပက် သို့မဟုတ် ၀ါဆောတွင် ပြုလုပ်ရန် တောင်းဆိုခဲ့သည်။ သို့သော် အပြန်အလှန်ညှိနှိုင်းအပြီး ယူကရိန်းနယ်စပ်အနီး ဘီလာရုစ် အရှေ့တောင်ပိုင်း၌ ကျင်းပနိုင်ခဲ့သည်။

ရုရှားကိုယ်စားလှယ်အဖွဲ့တွင် နိုင်ငံခြားရေး၊ ကာကွယ်ရေးဝန်ကြီးဌာန နှင့် အခြား အစိုးရအဆင့်မြင့်အရာရှိများပါဝင်ပြီး၊ ယူကရိန်းကိုယ်စားလှယ်အဖွဲ့တွင် ပြည်သူ့ဝန်ထမ်း ပါတီခေါင်းဆောင် ဒေးဗစ်အာရာခါမီယာ၊ ကာကွယ်ရေးဝန်ကြီး အိုလက်ဆီးရက်နီကော့ နှင့် သမ္မတရုံးအကြံပေး မစ်ခေးလိုပိုဒိုလစ်တို့ ပါဝင်သည်။

ယူကရိန်းဘက်က အပစ်အခတ်ချက် ချင်းရပ်စဲရန်နှင့် ရုရှားတပ်ဖွဲ့များ ဆုတ်ခွာရန် တောင်းဆိုပြီး ရုရှားဘက်က ယူကရိန်းအနေနှင့်  NATO အဖွဲ့သို့  ဝင်မည်မဟုတ်ကြောင်း တရားဝင်အာမခံချက်ကို အလိုရှိခဲ့သည်။ ဆွေးနွေးပွဲ၌ တိကျသောအဖြေတစ်ရပ် မရရှိခဲ့သော်လည်း နောက်ထပ်ဆွေးနွေးပွဲ ဆက်လက်လုပ်ဆောင်ရန် နှစ်ဖက်အဖွဲ့များက သဘောတူခဲ့ကြသည်။ သမ္မတ ဇယ်လန်းစကီးက ဆွေးနွေးမှုများမှာ ခက်ခဲကြောင်း၊ သို့သော် ယူကရိန်းကိုယ်စားလှယ်အဖွဲ့သည် ရုရှားထံမှ တိကျသည့် အပြုသဘောဆောင်မှုများ ရရှိခဲ့ကြောင်း ပြောကြားသည်။

■ စစ်ချီ စစ်သွေး စစ်တေး တဝေဝေ

မတ်လ ၁ ရက်၌ မိုင် ၄၀ အရှည်ရှိ ရုရှားစစ်ယာဉ်တန်း ယူကရိန်းနိုင်ငံ ကိယက်ဗ်မြို့စွန်သို့ ရောက်ရှိနေသည်။ မက်ဆာအလန်ရှိ အမေရိကန်ဂြိုဟ်တုကုမ္ပဏီမှ ဓာတ်ပုံများအရ သံချပ်ကာယာဉ်များ၊ တင့်ကားများနှင့် အ ခြားစစ်သုံးယာဉ်များ ပါဝင်သည်။ တစ်ဖန် ဒုတိယမြို့တော် ခါကိဗ်သို့ ရုရှားက အမြောက်များဖြင့် ဆက်လက်ပစ်ခတ်နေဆဲဖြစ်သည်။ ကိယက်ဗ်နှင့်ခါကိဗ်အကြားရှိ အော်တိုင်ကာမြို့၊ ယူကရိန်းစစ်စခန်းကို အမြောက်များဖြင့် ပစ်ခတ်တိုက်ခိုက်ခဲ့သည့်အတွက် ယူကရိန်းတပ်ဖွဲ့ဝင် ၇၀ သေဆုံးခဲ့သည်။

ယူကရိန်းနိုင်ငံအား ဥရောပသမဂ္ဂအဖွဲ့ဝင်နိုင်ငံဖြစ်ရေး တရားဝင်လျှောက်ထားမှုကို သမ္မတ ဇယ်လန်းစကီးက တရားဝင်လက် မှတ်ရေးထိုးခဲ့သည်။

ဥရောပသမဂ္ဂအဖွဲ့ဝင်နိုင်ငံများ၏ လေကြောင်းပိုင်နက်မျာအတွင်း  ရုရှားလေယာဉ်များ ပျံသန်းခွင့်ကို ပိတ်ပင်သွားမည်ဖြစ်ကြောင်းနှင့် ရုရှားအား အကူအညီပေးခဲ့သူ ဘီလာရုစ်သမ္မတ လူကာရှင်ကို,ကိုလည်းအ ရေးယူပိတ်ဆို့မှုများ ပြုလုပ်သွားမည်ဟု ဥရောပသမဂ္ဂက ကြေညာလိုက်သည်။ ရုရှားကလည်း အဆိုပါပိတ်ပင်မှုကို တုံ့ပြန်သည့်အနေနှင့် နိုင်ငံ ၃၆ နိုင်ငံမျှ လေကြောင်းလိုင်း ပြေးဆွဲမှုများအပေါ် ကန့်သတ်သည့် လုပ်ဆောင်ချက်များ စတင်ခဲ့သည်။

ထိုအတောအတွင်း ဘူဂေးရီးယား၊ ပိုလန်နှင့် ဆလိုဗက်ကီးယား သုံးနိုင်ငံက ယူကရိန်းနိုင်ငံသို့ တိုက်ပွဲဝင်လေယာဉ်အစင်း ၇၀ လွှဲပြောင်းပေးမည်ဖြစ်ကြောင်း ယူကရိန်း သတင်းထုတ်ပြန်ရေးအဖွဲ့က  ထုတ်ပြန်လိုက်သည်။ လိုအပ်လျှင် ယူကရိန်းလေယာဉ်မှူးများအနေနှင့် ပိုလန်နိုင်ငံအတွင်း လေယာဉ် ကွင်းများ၌ အခြေစိုက်ရပ်နားခွင့်ရရှိထားကြောင်း ဆိုပါသည်။ MIG-29 တိုက်လေယာဉ် ၁၆ စင်းနှင့် SU-25 ၁၄ စင်းကို ဘူဂေးရီးယားနိုင်ငံကလည်းကောင်း၊ MIG-29  တိုက်လေယာဉ် ၂၈ စင်းကို ပိုလန်နိုင်ငံကလည်း ကောင်း၊ MIG-29  တိုက်လေယာဉ် ၁၂ စင်းကို ဆလိုဗက်ကီးယားနိုင်ငံက လည်းကောင်း ယူကရိန်းသို့ လွှဲပြောင်းပေးသွားမည်ဟု သတင်းထုတ်ပြန်ပါသည်။

ရုရှားနိုင်ငံက နျူကလီးယားတပ်ဖွဲ့များကို အသင့်အနေအထားအဖြစ် တပ်လှန့်ထားသော်ငြား နျူကလီးယားစစ်ပွဲနှင့်ပတ်သက်၍ စိုးရိမ်စရာ လိုမည်မဟုတ်ကြောင်း အမေရိကန်သမ္မတ ဂျိုးဘိုင်ဒင်က သတင်းထောက်များအား ဖြေကြားခဲ့သည်။ တစ်ချိန်တည်းမှာပင် အမေရိကန်သည် နယူးယောက်မြို့၊ ကု လသမဂ္ဂဆိုင်ရာအဖွဲ့အစည်းများမှ ရုရှားသံတမန် ၁၂ ဦးကို မတ်လ ၇ ရက်မတိုင်မီ အမေရိကန်မှ ထွက်ခွာရန် နှင်ထုတ်ခဲ့သည်။ 

“Kings are the Slaves of history. Leo Tolstoy” 

“ရာဇာတို့မည်သည် ရာဇဝင်၏ ကျေးကျွန်များသာ ဖြစ်ချေသည်” ဟူသော ရုရှားဂန္ထဝင်ဝတ္ထုကြီး “စစ်နှင့် ငြိမ်းချမ်းရေး” ကို ပြန်လည်သတိရဖွယ် ဖြစ်ပါ၏။