ချန်ပီယံလိဂ်ရှုံးထွက် ၁၆ သင်းအဆင့် မဲခွဲမှုတွင် အမှားအယွင်းများဖြစ်ပေါ်ခဲ့ပြီးနောက် မဲပြန်ခွဲမှုအတွက် စပိန်နာမည်ကြီး အားကစားသတင်းစာများက ပြင်းပြင်းထန်ထန် ရေးသားခဲ့ကြသည်။
ဗီလာရီးယဲလ်နှင့် ဆုံတွေ့ရမည့်အသင်းကို မဲနှိုက်ရွေးချယ်ရာတွင် အုပ်စုတူအသင်း ဖြစ်သည့် မန်ယူကို နှိုက်မိကာ ပြဿနာစပေါ် ခဲ့ပြီးနောက် အက်သလက်တီကိုနှင့် ဆုံတွေ့ရမည့်အသင်းစာရင်းတွင်လည်း မန်ယူအသင်း ပါဝင်ခြင်းမရှိဘဲ အုပ်စုတူ လီဗာပူးလ်အသင်း ပါဝင်နေခဲ့သောကြောင့် ဥရောပဘောလုံးအ ဖွဲ့ချုပ် (UEFA) က မဲခွဲပွဲကို ပြန်လည်ပြုလုပ်ခဲ့ခြင်းဖြစ်သည်။
ယင်းသို့မဲခွဲပွဲပြန်လည်ပြုလုပ်ရာ၌ အက်သလက်တီကိုအသင်းမှာ ဘိုင်ယန်မြူးနစ်အစား မန်ယူ၊ ရီးယဲလ်မက်ဒရစ်အသင်းမှာ ဘင်ဖီကာအစား PSG အသင်း နှင့် တွေ့ဆုံခဲ့ရသည်။ ထို့ကြောင့် UEFA ၏ မှားယွင်းမှုသည် ရီးယဲလ်အသင်းအတွက် အ ထိနာစရာဖြစ်ခဲ့သည်။
မက်ဒရစ်အခြေစိုက် Marca သတင်းစာက ဒီဇင်ဘာ ၁၄ ရက်ထုတ် မျက်နှာဖုံးတွင် မဲခွဲသည့်ပုံနှင့်အတူ စပိန်ဘာသာဖြင့် VERGUEFA (Shame) ဟု ရေးသားကာ UEFA အပေါ် ပြင်းထန်စွာ ဝေဖန်ခဲ့သည်။ အခြားစပိန်အားကစားသတင်းစာ များဖြစ်သည့် AS နှင့် Sport တို့ကလည်း အငြင်းပွားစရာဖြစ်ခဲ့သည့် ချန်ပီယံလိဂ်မဲခွဲ ပွဲကို အံ့အားသင့်စရာကောင်းသည့်ဖြစ်ရပ်ဟု နေ့စဉ်ထုတ်သတင်းစာများတွင် ဝေဖန်ခဲ့ကြသည်။
