COVID-19 တတိယလှိုင်းကာလအတွင်း နယ်စပ်ဖြတ်ကျော်သွားလာမှု မရှိစေရေး ထိုင်းလုံခြုံရေးအဖွဲ့က စောင့်ကြပ်လျက်ရှိသော်လည်း သြဂုတ်၁၄ ရက်နှင့် ၁၅ ရက်က တရားမဝင် ဝင်ရောက်သော မြန်မာနိုင်ငံသား ၆၀ အား ထိုင်းလုံခြုံရေးတပ်ဖွဲ့က ဖမ်းဆီးခဲ့ကြောင်း သိရသည်။
တာ့ခရိုင် မဲဆောက်မြောက်ဘက်တွင် သြဂုတ် ၁၅ ရက်က ထိုင်းနိုင်ငံသား ဝန်ဆောင်မှုပေးသူက မြန်မာနိုင်ငံသား ၄၅ ဦးအား ခေါ်ဆောင်လာစဉ် ဖမ်းဆီးခံရခြင်းဖြစ်ပြီး သြဂုတ် ၁၄ ရက်ကလည်း ဘုရားသုံးဆူနယ်စပ် ကာချနပူရီတွင် လူပွဲစားနှစ်ဦးနှင့်အတူ မြန်မာနိုင်ငံသား ၁၅ ဦး ဖမ်းဆီးခံခဲ့ရကြောင်း သိရသည်။
အဆိုပါ ဖမ်းဆီးခံမြန်မာနိုင်ငံသားများသည် ဝန်ဆောင်ခ တစ်ဦးလျှင် မဲဆောက်အထိ ဆိုပါက ဘတ် ၃၀၀၀၊ ဘန်ကောက်အထိ ဘတ် ၁၅၀၀၀/ ၂၀၀၀၀ အထိပေးပြီး လာခဲ့သူများဖြစ်ကြောင်း သိရသည်။
ကိုဗစ်တတိယလှိုင်းကာလအတွင်း ဖမ်းဆီးခံရမှုအများဆုံးဖြစ်ပြီး ထိုင်းနိုင်ငံ ကိုဗစ်ကာလ ၁၇ လအတွင်း မြန်မာနိုင်ငံသား ၄၀၀၀၀ ခန့် ဖမ်းဆီးရမိခဲ့ပြီဖြစ်ကြောင်း ထိုင်းနိုင်ငံ ကိုဗစ်ကာလ အရေးပေါ်ထိန်းချုပ် ကာကွယ်ရေးကော်မတီ၏ ထုတ်ပြန်ချက်အရ သိရသည်။
မြန်မာပြည်သားများအရေး ပူးတွဲလှုပ်ရှားမှုကော်မတီ (JACBA) ဥက္ကဋ္ဌ ဦးမိုးကြိုးက “၂၀၂၁ ခုနှစ် ဇူလိုင်လကုန်အထိ ထိုင်းနိုင်ငံထဲကို မြန်မာနိုင်ငံဘက်က တရားမဝင်ဝင်တာ ၄၀၀၀၀ လောက်ရှိတယ်။ ၃၀၀၀၀ လောက်က နယ်စပ်မှာ ဖမ်းခံထိတယ်။ တစ်သောင်းကိုတော့ ထိုင်းနိုင်ငံရဲ့အတွင်းပိုင်းမှာ ဖမ်းမိတယ်လို့ ထိုင်းကိုဗစ်ကာလ အရေးပေါ်ထိန်းချုပ် ကာကွယ်ရေးကော်မတီက ထုတ်ပြန်ထားပါတယ်” ဟု ဆိုသည်။
ထိုင်းနိုင်ငံဘက်သို့ တရားမဝင် ဝင်ရောက်မှုမှာ ဘုရားသုံးဆူ ကာချနပူရီလမ်းကြောင်းမှ အများဆုံးဖြစ်ကာ မြဝတီ မဲဆောက်လမ်းကြောင်းမှ ဒုတိယအများဆုံးဖြစ်ကြောင်း သိရသည်။
“မြန်မာနိုင်ငံမှာရော ထိုင်းနိုင်ငံမှာပါ ကိုဗစ်တတိယလှိုင်းဒဏ်ကို အလူးအလဲခံနေရပြီး နေ့စဉ်၂၀၀ ဝန်းကျင် သေဆုံးနေချိန်မှာ ဒီလိုစွန့်စားပြီးသွားလာနေတာကိုတော့ မချီးကျူးနိုင်ပါဘူး။ အာဆီယံထဲမှာဆိုရင် မြန်မာရော ထိုင်းပါ သေဆုံးမှုအများဆုံး စာရင်းထဲမှာ ပါတယ်။ အဲဒီတော့ မိမိလုပ်ဆောင်ချက် တစ်ခုဟာ သိပ်အတ္တကြီးမားနေရင် သတိပေးရတဲ့သူလည်း မကောင်းဘူး။ အဲဒီတော့ သိပ်အတ္တမကြီးကြပါနဲ့လို့ ပြောချင်ပါတယ်” ဟု ဦးမိုးကြိုးက ပြောကြားသည်။
ဖမ်းဆီးခံရသူ မြန်မာနိုင်ငံသားများကို ကျန်းမာရေးဌာနက ကျန်းမာရေးစစ်ဆေးပြီး ထိုင်းနိုင်ငံ တရားဥပဒေအတိုင်း အရေးယူသွားမည်ဖြစ်ကြောင်း သိရသည်။
