လီဗာပူးလ်အသင်း၏ နည်းပြဖြစ်သူ ယာဂန်ကလော့ပ်သည် ပြီးခဲ့သည့် နွေရာသီက သူ၏ မျက်လုံးကို ခွဲစိတ်ကုသမှု ခံယူခဲ့သဖြင့် နောက်ပိုင်းတွင် သူ၏ အမှတ်အသားပုံရိပ်တစ်ခုဖြစ်သည့် မျက်မှန်နှင့်အတူ တွဲဖက်မြင်ရတော့မည်မဟုတ်ကြောင်း သိရှိရသည်။
လီဗာပူးလ်အသင်း၏ အတွင်းပိုင်းသတင်းရင်းမြစ်တစ်ဦးက Daily Mail နှင့် တွေ့ဆုံရာတွင် ''ကလော့ပ်က သူ့ရဲ့မျက်လုံးကို ခွဲစိတ်ကုသမှုခံယူခဲ့ပြီး အခုတော့ အရမ်းကောင်းသွားပါပြီ။ ဒါကြောင့် သူ ဘယ်တော့မှ မျက်မှန်တပ်စရာမလိုတော့ပါဘူး။ ဒါပေမဲ့ တစ်ခါတစ်ရံမှာတော့ မျက်မှန်ကို သူ တပ်ဆင်ထားလေ့ရှိပါသေးတယ်''ဟု ပြောကြားခဲ့သည်။
ပရီးမီးယားလိဂ်ပရိသတ်တစ်ဦးကမူ Twitter တွင် ''မျက်မှန်မပါတဲ့ ကလော့ပ်ကို ကြည့်ရတာ၊ ဂွါဒီယိုလာကို ဆံပင်တွေနဲ့အတူ မြင်နေရသလိုပဲ။ ကြောင်တောင်တောင် ဖြစ်နေတယ်''ဟု ရေးသားထားသည်ကို တွေ့ရသည်။
