သင်္ဃန်းကျွန်းမြို့နယ်၊လှိုင်သာယာမြို့နယ်နှင့် ဟံသာဝတီအဝိုင်းရှိ ယာဉ်ထိန်းရဲရုံးအနီးတွင် ပေါက်ကွဲမှုများ အသီးသီး ဖြစ်ပွားခဲ့ကြောင်း သိရသည်။
သင်္ဃန်းကျွန်းမြို့နယ်တွင် ဇွန် ၁၉ ရက် နံနက် ၈ နာရီခန့်က ဆ/က ရပ်ကွက်ရှိ အမက(၉)ကျောင်းအပြင်ဖက် အုတ်တံတိုင်းကပ်လျက်ရှိ ကြက်သားရောင်းသည့် ဈေးတွန်းလှည်းတွင် ပေါက်ကွဲမှုဖြစ်ပွားခဲ့ကြောင်း သိရသည်။
အဆိုပါ ဈေးတွန်းလှည်းအနီးတွင် လက်လုပ်ဗုံးကို တွေ့ရှိသဖြင့် အနီးရှိလူများမှ လုံခြုံရေးတပ်ဖွဲ့သို့ အကြောင်းကြားခဲ့ကြောင်း၊ တပ်ဖွဲ့များရောက်ရှိလာပြီးနောက် ဖောက်ခွဲ ဖျက်စီးခဲ့ကြောင်း သိရသည်။
သင်္ဃန်းကျွန်းမြို့နယ်နေသူတစ်ဦးက " မီးလင်းနေတဲ့အထုပ်ကို တွေ့လို့ ဘေးကလူတွေက ရဲတွေကို အကြောင်းကြားလိုက်တယ်။ သူတို့ရောက်လာပြီး ဘေးနားကလူတွေကို ရှင်းပြီး ပေါက်ကွဲအောင် ဖျက်ဆီးလိုက်တယ် " ဟု ပြောကြားခဲ့သည်။
ယင်းပေါက်ကွဲမှုကြောင့် ထိခိုက်ဒဏ်ရာရသူ မရှိခဲ့ကြောင်းနှင့် ဖြစ်ပွားသည့်နေရာမှာ ဈေးရောင်း၊ဈေးဝယ်များနှင့် လူစည်ကားရာ နေရာတစ်ခုဖြစ်ကြောင်း သိရသည်။
ထို့ပြင် ဇွန် ၁၈ ရက် ညနေ ၆ နာရီခန့်ကလည်း သင်္ဃန်းကျွန်းမြို့နယ်၊ ငမိုးရိပ်ရပ်ကွက် ငမိုးရိပ် (၅)လမ်းရှိ ရပ်ကွက်အုပ်ချုပ်ရေးမှူးရုံးတွင် ပေါက်ကွဲမှုဖြစ်ပွားခဲ့ပြီး ယင်းရုံးရှိ သုံးဦးခန့် ထိခိုက်ဒဏ်ရာရရှိခဲ့ကြောင်း သိရသည်။
" အခု အဲ့လမ်းက အုပ်ကြီးရုံးရှိတဲ့ လမ်းရှေ့ကို လုံးဝပိတ်ထားတယ်။ ကားသွားလို့မရဘူး။ လူပဲဖြတ်လို့ရတယ်။ စစ်သားတွေလည်း အချိန်ပြည့်ကင်းစောင့်နေကြတယ် " ဟု အနီးပတ်ဝန်းကျင်တွင်း နေထိုင်သူတစ်ဦးက ပြောကြားသည်။
ဆက်လက်၍ ဟံသာဝတီအဝိုင်းအနီး ပြည်လမ်းဘေးရှိ ယာဉ်ထိန်းရဲရုံးပတ်ဝန်းကျင်တွင်လည်း ဇွန် ၁၉ ရက်၊ နေ့လည်ပိုင်းက ပေါက်ကွဲမှုဖြစ်ပွားခဲ့ကြောင်း သိရသည်။
" ရုံးရှေ့နားမှာ အသံဗုံးပေါက်တာ။ အကျယ်ကြီးကြားလိုက်ရတယ်။ ထိခိုက်တာတော့မရှိဘူး " ဟု ယင်းပေါက်ကွဲမှုဖြစ်ပွားသည့် နေရာအနီးနေထိုင်သူတစ်ဦးက ပြောကြားခဲ့သည်။
လှိုင်သာယာမြို့နယ်တွင် ဇွန် ၁၈ ရက် ရက် မွန်းလွဲပိုင်းမှ စတင်၍ ရုံးရှေ့မှတ်တိုင်အနီး၊ City Mart အနီး၊ ၁၀၃ မှတ်တိုင်အနီးတို့တွင် ပေါက်ကွဲမှုများ ဆက်တိုက်နီးပါး ဖြစ်ပွားခဲ့ပြီး
၇ ကြိမ်ခန့်ပေါက်ကွဲခဲ့ကြောင်း သိရသည်။
ယင်းသို့ပေါက်ကွဲမှုများ ဆက်တိုက်ဖြစ်ပွားမှုကြောင့် စစ်ဆေးရှာဖွေမှုများ ပြုလုပ်ခဲ့ပြီး လုံခြုံရေးတင်းကြပ်ခဲ့ကြောင်း သိရသည်။
