၂၀၀၈ ဖွဲ့စည်းပုံအခြေခံဥပဒေ၏ သတ်မှတ်ချက်အောက်တွင် ပြုလုပ်သော ၂၀၂၀ ရွေးကောက်ပွဲတွင် ကရင် အမျိုးသားများနှင့် ကရင်နိုင်ငံရေးပါတီများကို တစ်ခဲနက်မဲပေး၍ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်အား တစ်ဆင့်ချင်း ရယူကြရန် ကရင်အမျိုးသားများကို ကရင်အမျိုးသားအစည်းအရုံး (KNU) က တိုက်တွန်းသည်။

၂၀၂၀ ပြည့်နှစ် အောက်တိုဘာ ၁၅ ရက်တွင် ကျရောက်သော တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးခြင်း (၅) နှစ်မြောက် အထိမ်းအမှတ်အဖြစ် ထုတ်ပြန်သော KNU ၏ သဘောထား ထုတ်ပြန်ချက်တွင် ထိုသို့ ထည့်သွင်းဖော်ပြခဲ့ခြင်း ဖြစ်သည်။

ကရင်အမျိုးသားပြည်သူလူထုအနေဖြင့် ၂၀၀၈ ဖွဲ့စည်းပုံအခြေခံဥပဒေ၏ သတ်မှတ်ချက်အောက်တွင် ပြုလုပ် ကျင်းပသည့် ရွေးကောက်ပွဲတွင် ကရင်အမျိုးသားများနှင့် ကရင်ပါတီများကို တစ်ခဲနက် မဲပေးခြင်းဖြင့် အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်အား ကိုယ်တိုင် ပါဝင်ကာ တစ်ဆင့်ပြီးတစ်ဆင့် ရယူကြရန် KNU က တိုက်တွန်းခြင်း ဖြစ်သည်။

KNU အနေဖြင့် ကော်ခို စောဘဦးကြီး၏ လမ်းညွှန်မူဝါဒ လေးရပ်ကို အခြေခံပြီး အမျိုးသားတန်းတူရေးနှင့် ကိုယ့်ကြမ္မာ ကိုယ်ဖန်တီးခွင့် ရရှိရေးအတွက် နိုင်ငံရေးညှိနှိုင်းဆွေးနွေးမှု ပေါ်ပေါက်လာရန် ၂၀၁၅ ခုနှစ် အောက်တိုဘာ ၁၅ ရက်တွင် NCA ကို လက်မှတ်ထိုးခဲ့ရာ ယခုအခါ (၅) နှစ်မြောက်ခဲ့ပြီ ဖြစ်ကြောင်း KNU ၏ ထုတ်ပြန်ချက်တွင် ဖော်ပြခဲ့သည်။

နိုင်ငံရေးဆွေးနွေးညှိနှိုင်းမှု လုပ်ငန်းစဉ်တိုးတက်မှုမှာ အလွန်နှေးကွေးပြီး စိန်ခေါ်မှုများစွာဖြင့် ကြုံတွေ့ရသော်လည်း KNU အနေဖြင့် မဆုတ်မနစ် အားသွန်ခွန်စိုက် တစိုက်မတ်မတ် ကြိုးပမ်း လုပ်ဆောင်ခဲ့သည့်အတွက် ဒီမိုကရေစီ ဖက်ဒရယ်ပြည်ထောင်စု ထူထောင်ရေးဆိုင်ရာ နိုင်ငံရေးဆွေးနွေးမှု အဆင့် သုံးဆင့်နှင့် အကောင်အထည်ဖော်မှု လုပ်ငန်းစဉ်သုံးရပ်အား ချမှတ်သဘောတူနိုင်ခဲ့ပြီဖြစ်ကြောင်း KNU ၏ ထုတ်ပြန်ချက်တွင် ပါဝင်သည်။

အဆိုပါ အဆင့်၊ လုပ်ငန်းစဉ်များနှင့် ကိုက်ညီပြီး ရေရှည်တည်တံ့ခိုင်မြဲသော ငြိမ်းချမ်းရေးကို ဖော်ဆောင်နိုင်မည့် နိုင်ငံရေးဆွေးနွေးမှုဆိုင်ရာ မူဘောင်ပြုပြင်ရေးဆွဲရေးတွင် တက်ကြွစွာ ပါဝင်ကြိုးပမ်းသွားမည်ဟု KNU က ထုတ်ပြန်ခဲ့သည်။

ထို့ပြင် နိုင်ငံရေးဆွေးနွေးမှု လုပ်ငန်းစဉ်တွင် ကော်ခိုစောဘဦးကြီး၏ လမ်းညွှန်မှုနှင့် KNU ၏ (၁၆) ကြိမ်မြောက် ကွန်ဂရက်၏ လမ်းညွှန်ချက်များအတိုင်း ရပ်တည်ချက် ခိုင်မာစွာဖြင့် စုစည်းညီညွတ်ကြလျက် နိုင်ငံရေး ဆွေးနွေးမှုများတွင် ပါဝင်ကြရန်လည်း KNU က တိုက်တွန်းသည်။

KNU အနေဖြင့် အပစ်အခတ်ရပ်စဲရေး ခိုင်မာခြင်းနှင့် နိုင်ငံရေး ဆွေးနွေးညှိနှိုင်းမှုများတွင် မည်သူကိုမျှ ချန်လှပ်မထားဘဲ အားလုံးပါဝင်နိုင်သည့် လုပ်ငန်းစဉ် ဖြစ်ပေါ်ခြင်းဖြင့် ရေရှည်တည်တံ့ခိုင်မြဲသော ငြိမ်းချမ်းရေးအတွက် ကြိုးစားလုပ်ကိုင်ကြရန် NCA လက်မှတ်ရေးထိုးခြင်း (၅) နှစ်မြောက် နှစ်ပတ်လည်နေ့တွင် သက်ဆိုင်ရာ Stakeholders များအားလုံးကို တိုက်တွန်းကြောင်း KNU က ထုတ်ပြန်ခဲ့သည်။