အာဆင်နယ်နည်းပြအာတီတာသည် လက်စတာအား အနိုင်ရခဲ့သည့် လိဂ်ဖလားပွဲစဉ်တွင် နာမည်ကျော်ကွင်းလယ်လူ အိုဇေးလ်အား ချန်လှပ်ရခြင်းအကြောင်းကို ရှင်းလင်းခဲ့ပြီး လက်ရှိအသင်းသည် အောင်မြင်စွာ ဆင့်ကဲတိုးတက်နေသည်ဟု ပြောကြားခဲ့သည်။

အာဆင်နယ်အသင်းသည် လိဂ်ဖလားတတိယအဆင့်ပွဲစဉ်အဖြစ် လက်စတာအသင်းနှင့် အဝေးကွင်းပွဲစဉ်ကစားခဲ့ရပြီး (၂-ဝ)ဂိုးဖြင့် အနိုင်ရရှိခဲ့သည်။ 

အာတီတာသည် ထိုပွဲတွင် ပုံမှန်ပွဲထွက်ခွင့်မရရှိသည့် ကစားသမားများကို ဦးစားပေးအသုံးပြုခဲ့သော်လည်း အသင်းမှ မကြာခဏ ချန်လှပ်ခံနေရသည့် နာမည်ကျော်ကွင်းလယ်ဖန်တီးရှင် အိုဇေးလ်ကိုမူ အရန်စာရင်း၌ပင် ထည့်သွင်းခဲ့ခြင်း မရှိပေ။

ယင်းဆုံးဖြတ်ချက်အား အာတီတာက Condition ပိုကောင်းသည့် ကစားသမားကို ဦးစားပေးအသုံးပြုခဲ့ခြင်းဖြစ်ပြီး လက်ရှိအသင်းမှာ အောင်မြင်စွာဆင့်ကဲတိုးတက်နေသည်ဟု ပြောကြားခဲ့သည်။

အာတီတာက "အသင်းက ဆင့်ကဲတိုးတက်နေပါတယ်။ ဘာတွေအောင်မြင်နေသလဲဆိုတာကိုလည်း မြင်နိုင်ပါတယ်။ ဒါ ကျွန်တော်တို့ ရောက်နေတဲ့အဆင့်ပါ။ ဒီထက် ပိုတိုးတက်ချင်သေးတယ်။ ပိုကောင်းအောင် ကစားချင်ပါသေးတယ်။ လက်ရှိမှာတော့ ဒါကို ထိန်းသိမ်းရမယ်။ ကျွန်တော့်ကစားသမားတွေက လူစာရင်း ရွေးချယ်ရခက်အောင် စွမ်းဆောင်နေပါတယ်။ ကစားသမား ရွေးချယ်တဲ့အခါ တစ်ပွဲချင်းစီအလိုက် ခြေစွမ်းပြနိုင်မယ်လို့ ယုံကြည်တဲ့ကစားသမားကို ရွေးတာပါ။ ကျွန်တော်တို့ သုံးနေတဲ့ ကစားသမားတွေ အပြောင်းအလဲဖြစ်နေတာကို ခင်ဗျားတို့လည်း မြင်နိုင်တာပဲ။ အိုဇေးလ်အတွက်မှ မဟုတ်ပါဘူး။ လူစာရင်းမှာ ပါဝင်ရဖို့ လူတိုင်းအတွက် ခက်ခဲနေပါတယ်။ အိုဇေးလ် ဘာလို့ မပါတာလဲဆိုတဲ့ ခင်ဗျားတို့ရဲ့ မေးခွန်းကို ကျွန်တော် နားလည်ပါတယ်။ ဒါပေမဲ့ ကျွန်တော်ကလည်း ကျွန်တော့်အလုပ်ကို အကောင်းဆုံးဖြစ်အောင် လုပ်နေရတာပါ။ ပိုကောင်းတဲ့ အခြေအနေ Condition မှာ ရှိတဲ့ ကစားသမားကိုပဲ ကျွန်တော်က ရွေးချယ်ပါတယ်"ဟု မီဒီယာများ၏ မေးမြန်းမှုကို ဖြေကြားခဲ့သည်။