အာဆီယံဘောလုံးအဖွဲ့ချုပ် (AFF) သည် ကိုရိုနာဗိုင်းရပ်စ်ကြောင့် ရွှေ့ဆိုင်းလိုက်ရသည့် ၂၀၂၀ အာဆီယံဆူဇူကီးဖလားပြိုင်ပွဲကို ရောဂါ အခြေအနေနှင့် နိုင်ငံတကာပြိုင်ပွဲများအပေါ်မူတည်၍ ကျင်းပမည့်ကာလ သတ်မှတ်မည်ဖြစ်ကြောင်း သိရသည်။

AFF သည် ယခုနှစ်အတွင်း ကျင်းပမည့် ပြိုင်ပွဲအားလုံးကို ဖျက်သိမ်းခဲ့ခြင်းဖြစ်ပြီး နှစ်နှစ်တစ်ကြိမ် ကျင်းပသည့် အာဆီယံဆူဇူကီးဖလား ပြိုင်ပွဲကို လာမည့်နှစ်တွင် ပြန်လည် ကျင်းပရန် ဆုံးဖြတ်ထားသည်။ AFF သည် အရှေ့တောင်အာရှနိုင်ငံများ တွင် ကိုရိုနာဗိုင်းရပ်စ်ထိန်းချုပ်နိုင် ပြီး ပုံမှန်အနေအထားဖြစ်သည့်အချိန် နှင့် လက်ရွေးစင်အသင်းများ၏ နိုင်ငံတကာပြိုင်ပွဲမရှိသည့်ကာလတွင် ပြန်လည်ကျင်းပရန် စီစဉ်နေခြင်းဖြစ်သည်။

 အရှေ့တောင်အာရှ ဒေသတွင်း လက်ရွေးစင်အသင်းများအနေဖြင့် လာမည့်နှစ်တွင် ၂၀၂၂ ကမ္ဘာ့ဖလား တတိယအဆင့်ခြေစစ် ပွဲနှင့် ၂၀၂၃ အာရှဖလား တတိယ အဆင့် ခြေစစ်ပွဲများသာ ယှဉ်ပြိုင်ရန်ရှိသော်လည်း နှစ်လယ်ပိုင်းတွင် ဂျပန်နိုင်ငံ၌ ကျင်းပမည့် တိုကျိုအိုလံပစ်ပြိုင်ပွဲနှင့် နှစ်ကုန်ပိုင်းတွင် ဗီယက်နမ်နိုင်ငံ၌ ကျင်းပမည့် ၃၁ ကြိမ်မြောက် ဆီးဂိမ်းစ်ပြိုင်ပွဲကာလများနှင့် မတိုက်ဆိုင်ဘဲ ကျင်းပရမည် ဖြစ်သည်။ 

AFF က ကျင်းပလျက် ရှိသည့် အာဆီယံအမျိုးသမီးချန်ပီယံရှစ်ပြိုင်ပွဲအပါအဝင် အခြားသက် တမ်းအလိုက်ပြိုင်ပွဲများမှာမူ နှစ်စဉ် ပုံမှန်ကျင်းပနေသည့် ပြိုင်ပွဲများဖြစ် သောကြောင့် ယခုနှစ်တွင် ကျင်းပနိုင်ခြင်းမရှိသော်လည်း လာမည့်နှစ် တွင်မူ ပုံမှန်အတိုင်း ကျင်းပသွားမည် ဖြစ်သည်။

AFF သည် လာမည့်နှစ်တွင် ကျင်းပမည့်ပြိုင်ပွဲများနှင့် ကျင်းပမည့်ကာလကို အဖွဲ့ဝင်နိုင်ငံများနှင့် ပြန်လည်ညှိနှိုင်း၍ အတည်ပြုဆုံး ဖြတ်မည်ဖြစ်သည်။ သို့သော် အရှေ့ တောင်အာရှနိုင်ငံများတွင် ကိုရိုနာ ဗိုင်းရပ်စ် ထိန်းချုပ်နိုင်ခြင်းမရှိသေး သောကြောင့် ရောဂါအခြေအနေ အပေါ်မူတည်၍ ဆုံးဖြတ်သွားဖွယ် ရှိနေသည်။ AFF သည် လာမည့်နှစ် တွင် အစားထိုးကျင်းပမည့် အာဆီယံ ဆူဇူကီးဖလားပြိုင်ပွဲအပြင် အမျိုးသားပြိုင်ပွဲများအဖြစ် ယူ-၂၂ ပြိုင်ပွဲ၊ ယူ-၁၉ ပြိုင်ပွဲ၊ ယူ-၁၆ ပြိုင်ပွဲ၊ အမျိုး သမီးပြိုင်ပွဲများအဖြစ် အာဆီယံ အမျိုးသမီးချန်ပီယံရှစ်ပြိုင်ပွဲ၊ ယူ-၁၉ ပြိုင်ပွဲနှင့် ယူ-၁၆ ပြိုင်ပွဲအပြင် ဖူဆယ်ပြိုင်ပွဲနှင့် သဲသောင်ပြင် ဘောလုံးပြိုင်ပွဲများ ကျင်းပမည်ဖြစ်သည်။