မေး■ စင်ကာပူဟာ လမ်းကြောင်းမှန်ပေါ် ရောက်ပြီလို့ ထင်ပါသလား။ ခင်ဗျား သိပ်ကို စောပြီး လုပ်နိုင်ခဲ့တယ် ဆိုတဲ့အချက်ကို လူတော်တော်များများက ကြည့်ကြတယ်။ ခင်ဗျားက အချိန်တိုအတွင်း စမ်းသပ်စစ်ဆေးမှုကို ဖွံ့ဖြိုးစေခဲ့တယ်။ ရလဒ်တွေ ချက်ချင်းထုတ်ပြန်တယ်။ ခင်ဗျား နျူကလိယက်အက်ဆစ်စစ်ဆေးမှုကို ဖွံ့ဖြိုးစေခဲ့တယ်။ အဲဒီလို ဟုတ်သလား။ ခင်ဗျားအောင်မြင်မှုရဲ့ အဓိကအချက်က ဘာလဲ။

ဖြေ■ အရှိန်မြင့်လာနေတဲ့ တိုက်ပွဲရဲ့အလယ်တည့်တည့်မှာ ရောက်နေတာမို့ အောင်မြင်မှုအကြောင်း ပြောဖို့ ကျွန်တော် တွန့်ဆုတ်မိပါတယ်။ အစကတည်းကကို ကျွန်တော်တို့ ဟာ ဒါကို အလွန်လေးလေးနက်နက် လုပ်ဆောင်ဖို့ သိပ်ကို ပြင်းပြင်းထန်ထန် ကြိုးစားခဲ့ပါတယ်။ တရုတ်နိုင်ငံ ဝူဟန်မြို့မှာ ဖြစ်ပျက်သမျှကို ကျွန်တော်တို့ စောင့်ကြည့်ပါတယ်။ ကျွန်တော်တို့က ကျွန်တော်တို့ လူထုကို ပြင်ဆင်ခိုင်းထားပါတယ်။ တကယ်က ဒါကို ကျွန်တော်တို့ လွန်ခဲ့တဲ့ ၁၇ နှစ်မှာ SARS ဖြစ်ကတည်းက ပြင်ဆင်ထားခဲ့တာပါ။

Case တွေ စဖြစ်လာတော့ အဲဒါတွေကို ကျွန်တော်တို့ ဖော်ထုတ်နိုင်ပါတယ်။ COVID-19 အတွက် ကုသမှုနဲ့ စမ်းသပ်စစ်ဆေးမှုကို အခမဲ့လို့ ကျွန်တော်တို့ ပြောခဲ့တာကြောင့်ပါ။ လူထုအတွင်း ကူးစက်ပျံ့နှ့ံမှုကို လျှော့ချနိုင်ဖို့ ထိတွေ့ခဲ့သူတွေကို ခြေရာခံခြင်း၊ ပိုးတွေ့သူတွေနဲ့ ထိတွေ့ခဲ့သူတွေကို ရှာဖွေခြင်းနဲ့ ထိတွေ့ခဲ့သူတွေကို သီးခြားခွဲထားခြင်းတွေကိုလည်း ကျွန်တော်တို့ လုပ်နိုင်ခဲ့ပါတယ်။ ဘေးကင်းတဲ့ အနေအထားရောက်အောင် တစ်ဦးနဲ့တစ်ဦး ခပ်ခွာခွာနေဖို့၊ တစ်ကိုယ်ရေသန့်ရှင်းရေးကို ဂရုစိုက်ဖို့၊ ဖျားနေရင် အိမ်မှာနေပြီး အလုပ်မသွားဖို့နဲ့ လူမှုရေးကိစ္စတွေ မလုပ်ဖို့ စတာတွေလိုမျိုးတွေမှာ ကျွန်တော်တို့ အားထုတ်မှုတွေ အောင်မြင်ရေးအတွက် ကျွန်တော်တို့ ရင်ဆိုင်နေရတဲ့ အရာတွေ၊ ကျွန်တော်တို့ လုပ်ဖို့ လိုအပ်တဲ့အရာတွေနဲ့ သူတို့အနေနဲ့ ကျွန်တော်တို့နဲ့ ပူးပေါင်းဆောင်ရွက်ဖို့ လိုအပ်တဲ့အဆင့်တွေကို လူထုကို ရှင်းပြဖို့လည်း သိပ်ကို ပြင်းပြင်းထန်ထန် ကြိုးပမ်းခဲ့ပါတယ်။

အကြီးအကျယ် အားထုတ်မှုနဲ့အတူ ရောဂါကူးစက်ခံရသူအရေတွက်ကို ဆက်ပြီး လျှော့ချဖို့ အထောက်အကူပြုခဲ့တယ် ထင်ပါတယ်။ ဒါပေမဲ့ ကျွန်တော်တို့ အောင်မြင်သွားပြီလို့ ထင်ယောင်ထင်မှား ဖြစ်နေမှုအောက်တော့ ကျွန်တော် ရောက်မနေပါဘူး။

မေး■ ထိတွေ့ခဲ့သူတွေကို ခြေရာခံခြင်းနဲ့ ပတ်သက် ပြီး မေးခွင့်ပြုပါ။ ဒါက ခင်ဗျားတို့အနေနဲ့ အထူးသဖြင့် ကောင်းကောင်းကြီး လုပ်နိုင်ခဲ့ပုံရတာတွေထဲက တစ်ခုဖြစ်နေလို့ပါ။ တစ်စုံတစ်ယောက်မှာ ပိုးတွေ့ပြီဆိုတာနဲ့ ခင်ဗျားတို့က လူတွေရဲ့ ဖုန်းနံပါတ်တွေကို အသုံးပြုတယ်။ သူတို့ ဘယ်မှာရှိနေလဲဆိုတာ အတိအကျ တွက်ဆနိုင်ဖို့ ကြိုးပမ်းတယ်။ စစ်ဆေးမှုမှာ ပေါ့စတစ်ဖြစ်နိုင်တဲ့ တစ်ယောက်ယောက်နဲ့ အနီးကပ်ရှိခဲ့မယ်ဆိုရင် သူတို့ကိုပြောဖို့ လူတွေရနိုင်တဲ့ App တစ်ခုတောင် အခုခင်ဗျားတို့ဆီမှာ ရှိထားပြီလေ။ ဒါတွေအားလုံး ရအောင်လုပ်တာ ဘယ်လောက်ခက်ခဲခဲ့သလဲ။

ဖြေ■ ကျွန်တော်တို့က ဖုန်းထဲက အချက်အလက်တွေကို အသုံးမပြုပါဘူး။ သူတို့ကို အင်တာဗျူးပဲ လုပ်တာပါ။ သူတို့ကို မေးပြီး သူတို့နဲ့ ထိတွေ့ခဲ့သူတွေကို ခြေရာခံတယ်။ အဲ့ဒီထိတွေ့ခဲ့သူတွေကို ထပ်အင်တာဗျူးပြီး အပိုင်းအစတွေ စုစည်း၊ ဇာတ်ရည်လည်အောင် ကြိုးစားတယ်။ ဒါက စုံထောက် လုပ်ထုံးလုပ်နည်းနဲ့ စိတ်ရှည်ရတဲ့ အလုပ်ပဲ။ နှစ်နာရီလောက်အတွင်း မြန်မြန်ဆန်ဆန် အဖြေရဖို့ ကျွန်တော်တို့ မျှော်လင့်တယ်။ ဒါပေမဲ့ တကယ့်တကယ်မှာ ဘယ်သူက ဘယ်သူ့ကို စကားပြောခဲ့ပြီး ဘယ်သူက ဘယ်သူ့ကို ဗိုင်းရပ်စ်ပေးခဲ့နိုင်သလဲ ကြိုးစားဖော်ထုတ်ဖို့ Case တွေနောက်ကို လိုက်ရတာ ရက်တွေချီပြီး ကြာပါတယ်။ ဘယ်သူဟာ သူ့မှာလည်း App ရှိတဲ့ တခြားဘယ်သူနဲ့ ထိတွေ့လာခဲ့သလဲဆိုတာနဲ့ ဘယ်သူဟာ နေထိုင်မကောင်းဖြစ်နိုင်လဲဆိုတာ ခြေရာခံနိုင်လိမ့်မယ်လို့ မျှော်လင့်ရတဲ့ App တစ်ခု ကျွန်တော်တို့မှာ ရှိထားပါပြီ။ ဒါပေမဲ့ ဒါက တကယ်တော့ လုပ်ဆောင်ဆဲ အလုပ်တစ်ခုသာ ဖြစ်ပြီး ကောင်းကောင်း အလုပ်ဖြစ်မယ် မဖြစ်ဘူး ခုထိ မသိသေးပါဘူး။

မေး■ ဒီလိုထိန်းချုပ်မှုတွေရှိလို့၊ Paternalistic (လိုအပ်ချက်များ ဖြည့်ဆည်းပေးသော်လည်း တာဝန်၌ ရွေးချယ်ပိုင်ခွင့် မပေးသည့်) စနစ်မို့လို့၊ တခြားနေရာက အစိုးရတွေထက်ပိုပြီး စင်ကာပူအစိုးရက အာဏာတွေပိုရှိလို့ စင်ကာပူဟာ ဒါတွေကို လုပ်နိုင်တာလို့ ပြောကြတဲ့ လူတွေကို ဘယ်လိုတုံ့ပြန်မလဲ။

ဖြေ■ ကျွန်တော်တို့မှာ ပိုပြီးထူးခြားတဲ့ အာဏာတွေ ယူထားတာမရှိပါဘူး။ လူထုက ကျွန်တော်တို့ ရင်ဆိုင်နေရတာတွေကို နားလည်ရမှာနဲ့ ကျွန်တော်တို့ လုပ်နေတဲ့အရာတွေကို ထောက်ပံ့ရမှာ၊ ကျွန်တော်တို့နဲ့ ပူးပေါင်းဆောင်ရွက်ရမှာ၊ အစိုးရအပေါ် ယုံကြည်ရမှာတွေကပဲ အဓိကကျလိမ့်မယ်လို့ ထင်ပါတယ်။ သူတို့ကို စကားပြောတဲ့အခါ ဖြစ်ပျက်နေတာတွေကို ရှင်းပြဖို့ ကျွန်တော်တို့ အများကြီး အားထုတ်ပါတယ်။ ကျွန်တော်တို့ ရောက်နေတဲ့ အဆင့်ကို လူထုသိဖို့ အကြိမ်အနည်းငယ် ရုပ်သံမှာ တိုက်ရိုက်ပြောပြပါတယ်။ ကျွန်တော်တို့ ဒါကို တည့်တည့်ပဲ ပြောပါတယ်။

ကျွန်တော်တို့က ပွင့်လင်းမြင်သာမှု ရှိပါတယ်။ သတင်းဆိုးတွေ ရှိရင်လည်း ကျွန်တော်တို့ ပြောပါတယ်။ လုပ်ဖို့ လိုအပ်တာတွေ ရှိရင်လည်း ကျွန်တော်တို့ ပြောပါတယ်။  ဒီယုံကြည်မှုကို ခင်ဗျား ထိန်းသိမ်းထားရမယ်လို့ ထင်ပါတယ်။ ဘာဖြစ်လို့လဲဆိုတော့ လူထုက ခင်ဗျားကို မယုံကြည်ဘူးဆိုရင် ခင်ဗျားမှာ မှန်ကန်တဲ့နည်းလမ်းတွေ ရှိရင်တောင် အကောင်အထည်ဖော်ဖို့ သိပ်ကို ခက်ခဲသွားနိုင်ပါတယ်။

မေး■ ခင်ဗျားက စီးပွားရေးအနေအထားနဲ့ ပတ်သက်ပြီး ခင်ဗျားလူထုကို ပြောပြီး ဘတ်ဂျက် သက်သာချောင်ချိရေး နည်းလမ်းတစ်ရပ်အတွက် ဖေဖော်ဝါရီမှာ ခင်ဗျား အစီအစဉ်ချထားပြီးတာတောင် ဒုတိယမြောက်ဘတ်ဂျက်တစ်ရပ်ကို ခင်ဗျား ထုတ်ပြလိုက်ပြီ။ ခင်ဗျားက ငါးဆလောက် ပိုကျယ်ပြန့်တယ်လို့ ယူဆရတဲ့ ဘတ်ဂျက်အသစ် ထုတ်ပြလိုက်တယ်။ ခင်ဗျားက ခင်ဗျားမိန့်ခွန်းထဲမှာ ရှင်းပြတယ်။ ခင်ဗျားက V ပုံသဏ္ဌာန် နာလန်ထရေးကို သွားမှာမဟုတ်ဘူး၊ V ပုံသဏ္ဌာန် နာလန်ထရေးကို သွားမှာမဟုတ်ဘူးလို့ ပြောတယ်။ အခုအချိန်မှာ ကျဆင်းနေပြီလို့ပဲ ကျွန်တော် ခံစားရတယ်။ ဒီမှာ စီးပွားရေးအကျိုးဆက်တွေက ဘာတွေဖြစ်မယ်ထင်လဲ ရှင်းပြပါလား။

ဖြေ■ ပထမဆုံးက တချို့သော ကဏ္ဍတွေအပေါ် တိုက်ရိုက် ရိုက်ခတ်ချက် ရှိတာပါ။ ဥပမာအနေနဲ့ လေကြောင်းလုပ်ငန်း သေပြီ၊ ကမ္ဘာလှည့်ခရီးသွားလုပ်ငန်း သေပြီ၊ ဒါတွေနဲ့ဆက်စပ်နေတဲ့ ခရီးသွားလုပ်ငန်းအားလုံး သေပြီ။ ဟိုတယ်တွေလည်း အထိုက်အလျောက်အကျပ် တွေ့နေပြီ။ အလျင်အမြန် ထွက်ခွာသွားမှာ မဟုတ်တဲ့ ရိုက်ခတ်ချက်မျိုးပါပဲ။

ဒုတိိယအနေနဲ့ တခြားနိုင်ငံတွေက အပြည့်အဝ အလုပ်မလုပ်နိုင်ဘဲ စီးပွားရေး Lockdown ချခံထားရတာမို့ ထောက်ပံ့ရေး လမ်းကြောင်းတွေ မဝင်တာကြောင့် ထောက်ပံ့ရေးလမ်းကြောင်းကွန်ရက် ပြတ်တောက်လာပါလိမ့်မယ်။ ကျွန်တော်တို့ရဲ့ ထုတ်လုပ်မှုနဲ့ တင်ပို့မှုတွေလည်း ထိခိုက်ပါတယ်။ ကျန်တဲ့ စီးပွားရေးမှာလည်း ကျယ်ပြန့်တဲ့ အခြေခံသက်ရောက်မှု ဖြစ်ပေါ်တာပါပဲ။

အဲ့ဒီနောက် ခင်ဗျား ကိုယ့်ကိုယ်ကိုယ် ပြန်အလုပ်ခန့်ထားတဲ့၊ ရေတို ဒါမှမဟုတ် ယာယီ ကန်ထရိုက်နဲ့သာ အလုပ်ခန့်နိုင်တဲ့ စီးပွားရေးကို ရလိုက်ပါပြီ။ ဖျော်ဖြေရေးအပေါ် အမှီပြုတဲ့လူတွေ၊ ပုံမှန်လူမှုကိစ္စတွေအပေါ် အမှီပြုတဲ့လူတွေ၊ နေ့စားလုပ်ကိုင်ရသူတွေ - အဲဒီအလုပ်တွေအားလုံး အငွေ့ပြန်ပျောက်ကွယ်သွားပါပြီ။  လူတွေအနေနဲ့ သူတို့ဗိုင်းရပ်စ်ကို ထိန်းချုပ်နိုင်ပြီလို့၊ ပုံမှန်လူမှုကိစ္စတွေ၊ ပုံမှန်ခရီးသွားလာမှုတွေ၊ ပုံမှန် လူသားဆက်ဆံရေးတွေ ပြန်လည်ထိန်းသိမ်းနိုင်ပြီလို့ ယုံကြည်မှု ရရှိသွားတဲ့အချိန်မျိုးအထိ ပြန်လည်ထောင်မတ်လာဖို့ ကျွန်တော် မမြင်ပါဘူး။ အချိန်အတိုင်းအတာတစ်ခုထိတော့ ဒီအတိုင်းသွားနေဦးမယ်လို့ ထင်ပါတယ်။

မေး■ လူဦးရေရဲ့ ရာခိုင်နှုန်း ၄၀ ရောဂါကူးစက်ခံမှ ရမယ်ဆိုတဲ့ လူထုကိုယ်ခံအား ဖွံ့ဖြိုးလာရမယ်ဆိုတဲ့ သီအိုရီတွေရှိတာကြောင့် ဝန်ကြီးချုပ်အနေနဲ့ ဗိုင်းရပ်စ်ကို ထိန်းချုပ်နိုင်ပြီဆိုတဲ့ အချိန်ဆိုတာ ဘယ်လို အဓိပ္ပာယ်မျိုးပါလဲ။ ဒါမှမဟုတ် တကယ်က ကာကွယ်ဆေး ဒါမှမဟုတ် ပြီးပြည့်စုံတဲ့ ကုထုံးကို စောင့်ရမယ် ဆိုတာမျိုးလား။

ဖြေ■ လူထုကိုယ်ခံအားဆိုတဲ့ဆီကို သွားမယ်ဆိုရင် လူဦးရေရဲ့ ကြီးမားတဲ့အစိတ်အပိုင်းဟာ ရောဂါကူးစက်ခံမှ ရပါလိမ့်မယ်။ စကားကို အလွန်သတိထားပြောတဲ့ အင်ဂျလာမာကယ်က ဂျာမနီလူဦးရေရဲ့ ရာခိုင်နှုန်း ၇၀ လောက်ကို ရောဂါကူးစက်ခံရနိုင်တဲ့အကြောင်း ပြောခဲ့ပါတယ်။ အီတလီမြောက်ပိုင်း ဒါမှမဟုတ် တရုတ်က မြို့ကြီးအချို့မှာ ဖြစ်ပျက်ခဲ့သလို ထိန်းချုပ်လို့မရတဲ့ ရောဂါကူးစက်ပျံ့နှံ့မှု ဖြစ်ပွားလာပြီး ကူးစက်မှုက အကြီးအကျယ် ထောင်တက်သွားတာကြောင့် အလွန့်အလွန်ကို နာကျင်ဖွယ်ဖြစ်တဲ့ဆီ သွားမယ်လို့ ကျွန်တော် ထင်တာကြောင့် ဒီလမ်းကြောင်းအတိုင်းပဲ သွားရပါလိမ့်မယ်။ ဒါမှမဟုတ် ခင်ဗျားအနေနဲ့ ရောဂါကူးစက်မှု ကျဆင်းအောင် လုပ်ရမှာဖြစ်ပြီး အရမ်းအရမ်းကို အချိန်ကြာပါလိမ့်မယ်။ ဒီလမ်းကြောင်းကို လျှော့ချဖို့ အရှိန်တားတုံးတစ်ခုကို မျှော်လင့်ရပါမယ်။ အရှိန်တားဖို့ရာ မြင်သာတဲ့ တစ်ခုတည်းသော နည်းလမ်းကတော့ ကုထုံးတစ်ရပ် ဒါမှမဟုတ် ထိရောက်တဲ့ ကာကွယ်ဆေးတစ်ရပ် ရှိလာဖို့ပါ ပဲ။ ဒါက အလှမ်းကွာဝေးနေပေမဲ့လည်း သိပ်တော်တဲ့ လူတွေအများကြီးက ဒါနဲ့ပတ်သက်ပြီး သိပ်ကို ပြင်းပြင်းထန်ထန် ကြိုးစားနေပါတယ်။ မကြာမီ သူတို့ တိုးတက်မှုတချို့ လုပ်နိုင်ပါစေလို့ပဲ ကျွန်တော် မျှော်လင့်နိုင်၊ ဆုတောင်းနိုင်ပါတော့တယ်။

မေး■ ကျွန်တော်တို့ရဲ့ နိိုင်ငံခြားရေးဝန်ကြီး အပါအဝင် လူတော်တော်များများက ဒီရောဂါ ကူးစက်ပျံ့နှံ့မှုအတွက် တရုတ်အစိုးရဟာ တစ်နည်းနည်းနဲ့တော့ အပြစ်ရှိတယ်လို့ ပြောကြပါတယ်။ ဘာဖြစ်လို့လဲဆိုတော့ ရောဂါဖြစ်ပွားနေတယ်ဆိုတဲ့ အချက်နဲ့ပတ်သက်ပြီး သူတို့ တိတ်တိတ်လေးနေခဲ့ပါတယ်၊ သူတို့ လျှို့ဝှက်ထားခဲ့ပါတယ်၊ သူတို့ ဖုံးကွယ်ထားခဲ့ပါတယ်၊ ဒီရောဂါနဲ့ပတ်သက်ပြီး ထုတ်ဖော်ပြောကြားဖို့ ကြိုးစားတဲ့ ဆရာဝန်ကို သူတို့ အပြစ်ပေးခဲ့ပါတယ်။ တရုတ်ကို အဲဒီလို ဝေဖန်တာ တရားမျှတတယ်လို့ ခင်ဗျား ထင်ပါသလား။

ဖြေ■ ဒီရောဂါကူးစက်ပျံ့နှံ့မှုနဲ့ ပတ်သက်ပြီး တရုတ်ရဲ့တုံ့ပြန်မှုအပေါ် အမြင်တွေအများကြီးရှိနေတာ သေချာပါတယ်။ သူတို့အနေနဲ့ ဒီထက်ပိုကောင်းအောင် လုပ်နိုင်ခဲ့သင့်တယ်လို့ ပြန်လည်သုံးသပ်ပြီး ယုံကြည်သူတွေ ရှိမှာပါ။ ဒါပေမဲ့ ခြုံကြည့်ရင် တရုတ်ကပဲ မှန်ကန်တဲ့အရာကို လုပ်ခဲ့ရင် ဒါမျိုးဖြစ်လာမှာ မဟုတ်ဘူးလို့ ပြောနိုင်လိမ့်မယ်လို့ မထင်ပါဘူး။ ဘာဖြစ်လို့လဲဆိုတော့ နိုင်ငံများစွာမှာ ရောဂါကူးစက်မှု ဆက်လက်ဖြစ်ပွား၊ ကြီးထွား၊ ပျံ့နှံ့ပုံကို ကြည့်ပြီး သူတို့မှာ တရုတ်အစိုးရမျိုး မရှိဘဲ သူတို့နိုင်ငံတွေမှာ ရောဂါကူးစက်ပျံ့နှံ့မှုကို ထိန်းချုပ်ဖို့ ခုထိမလွယ်ဘူးဆိုတာ တွေ့ရှိခဲ့ပါပြီ။ ကျွန်တော်တို့ အလွန်ခက်ခဲတဲ့ အနေအထားမှာ ရောက်ရှိနေပြီး အခုအခါမှာ ကျွန်တော်တို့အတွက် အပြုသဘောအဆောင်ဆုံးကတော့ ရှေ့ကို မျှော်ကြည့်ပြီး ရှေ့ဆက်နိုင်မယ့် အကောင်းဆုံးနည်းလမ်းကို ရှာဖွေဖို့နဲ့ အခု ကျွန်တော်တို့ဆီမှာ ရှိနေတဲ့ ပြဿနာကို ကိုင်တွယ်ဖို့ပါပဲ။

မေး■ အမေရိကန်နိုင်ငံခြားရေးဝန်ကြီးက ဒီလိုစွပ်စွဲမှုတွေလုပ်ခဲ့ပြီး တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ဒေါသတကြီး ပြန်လည်ပြောဆိုခဲ့တာနဲ့အတူ ဒါက အမေရိကန်- တရုတ် ဆက်ဆံရေးကို ဆိုးရွားစေခဲ့ပုံကို ခင်ဗျား မြင်မှာပါ။ ခင်ဗျားအတွက် ဒါက စိုးရိမ်စရာ မကောင်းဘူးလား။ ကျွန်တော်ဆိုလိုတာက အမေရိကန်နဲ့ တရုတ် ကောင်းမွန်တဲ့ ဆက်ဆံရေးရှိတယ်ဆိုတဲ့ အမြင်နဲ့ ဒီလိုအနေအထားအလယ်မှာ ခင်ဗျား ထိုင်နေတာပဲ။ ဒီဗိုင်းရပ်စ်ပိုးရဲ့ ဘေးထွက်ဆိုးကျိုးက အမေရိကန်- တရုတ် တကယ့် စစ်အေးစစ်ပွဲမျိုး ဖြစ်လာစေနိုင်တဲ့ အန္တရာယ်ရှိသလား။

ဖြေ■ ဒါက ဖြစ်လာနိုင်တဲ့ ကံအဆိုးဆုံး အနေအထားတစ်ရပ်ပါ။ ဒါမတိုင်ခင်ကတောင် အမေရိကန်- တရုတ် ဆက်ဆံရေးက ရှုပ်ထွေးနေနှင့်ပြီးသားပါ။ ဒါပေမဲ့ ဒီဗိုင်းရပ်စ်ကို ကျွန်တော်တို့ ဆက်ပြီး ကိုင်တွယ်ဖြေရှင်းမယ်ဆိုရင် နိုင်ငံတွေအားလုံး အတူတကွ လုပ်ဆောင်ကြအောင် ခင်ဗျား လုပ်ရမှာပါပဲ။ အထူးသဖြင့် အမေရိကန်နဲ့ တရုတ်ပေါ့။ အကောင်းဆုံး အခြေအနေရပ်တွေအောက်မှာ ဒါဟာ လူသားတွေအတွက် အလွန်ခက်ခဲတဲ့ စိန်ခေါ်မှုတစ်ရပ် ဖြစ်လာမှာပါ။ ဒါပေမဲ့ အမေရိကန်နဲ့ တရုတ်တို့က ဗိုင်းရပ်စ်ကို တီထွင်ပြီး ကမ္ဘာလောကထဲ လွှတ်ပေးတယ်ဆိုတာအတွက် တစ်ဦးနဲ့ တစ်ဦး ပြစ်တင် စော်ကားနေကြမယ်ဆိုရင် ဒီပြဿနာကို မကြာမီ ဖြေရှင်းနိုင်ရေးအတွက် အထောက်အကူပြုလိမ့်မယ်လို့ ကျွန်တော် မထင်ပါဘူး။